បង្ក្រាបជនសង្ស័យលួចខ្សែភ្លើងបំភ្លឺសាធារណៈ នៅក្រុងតាខ្មៅ!

(កណ្ដាល)៖ ជនសង្ស័យម្នាក់ដែលប្រើមុខរបររត់កង់បីជាអវតារ ប៉ុន្តែបង្កប់សកម្មភាពលួចកាត់ខ្សែភ្លើងតាមបង្គោលភ្លើងបំភ្លឺសាធារណៈ នៅលើផ្លូវក្រវ៉ាត់ក្រុងទី៣ ត្រូវបានកម្លាំងនគរបាលក្រុងតាខ្មៅ ឃាត់ខ្លួនបានដោយជោគជ័យ ខណៈកំពុងធ្វើសកម្មភាពគួរឱ្យសង្ស័យ។

ប្រតិបត្តិការនេះ ត្រូវបានអនុវត្តតាមបទបញ្ជារបស់ លោកឧត្តមសេនីយ៍ទោ ឈឿន សុចិត្ត ស្នងការនៃស្នងការដ្ឋាននគរបាលខេត្តកណ្ដាល នៅថ្ងៃទី៣ ខែមេសា ឆ្នាំ២០២៦ ដោយកម្លាំងជំនាញសហការជាមួយកម្លាំងប៉ុស្តិ៍នគរបាលរដ្ឋបាលកោះអន្លង់ចិន នៃអធិការដ្ឋាននគរបាលក្រុងតាខ្មៅ ចុះល្បាតតាមដងផ្លូវក្រវ៉ាត់ក្រុងទី៣។

ក្នុងអំឡុងពេលល្បាត កម្លាំងសមត្ថកិច្ចបានប្រទះឃើញម៉ូតូកង់បីឥណ្ឌាមួយគ្រឿង បើកបរទៅមកដោយមានសកម្មភាពគួរឱ្យសង្ស័យ នៅចំណុចភូមិស្វាយពុំត្រង់ សង្កាត់កោះអន្លង់ចិន ក្រុងតាខ្មៅ។ បន្ទាប់ពីធ្វើការឃាត់ត្រួតពិនិត្យ កម្លាំងបានរកឃើញវត្ថុតាងមួយចំនួន រួមមាន កំណាត់ខ្សែភ្លើងចំនួន ៣កំណាត់តូចៗ, កន្ត្រៃពណ៌ក្រហមរុំស្កុតខ្មៅ ១គ្រឿង, ដង្កាប់ចំនួន ២, ដែកសំប៉ែតដងជ័រ ១, ដែកថ្នាំងអំពៅប្រវែងប្រមាណ ១ម៉ែត្រ ១ដើម និងកូនសោរមួយចំនួន ដែលស្ថិតនៅក្នុងម៉ូតូរបស់ជនសង្ស័យ។

ជាមួយគ្នានេះ កម្លាំងសមត្ថកិច្ចក៏បានសង្កេតឃើញថា បង្គោលភ្លើងបំភ្លឺតាមដងផ្លូវនៅតំបន់ខាងលើ មានការបាត់បង់ខ្សែភ្លើងជាបន្តបន្ទាប់។ ក្រោយការសាកសួរ សមត្ថកិច្ចបានឈានដល់ការឃាត់ខ្លួនជនសង្ស័យម្នាក់ ឈ្មោះ សុខ សុភាព ហៅ “ខួច” ភេទប្រុស អាយុ ៤១ឆ្នាំ ជនជាតិខ្មែរ មានទីលំនៅភូមិព្រែកតានូ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មុខរបររត់កង់បី ពាក់ព័ន្ធករណីប៉ុនប៉ងលួចទ្រព្យសម្បត្តិសាធារណៈ និងប្រើប្រាស់សារធាតុញៀនខុសច្បាប់។

បច្ចុប្បន្ន ជនសង្ស័យត្រូវបានបញ្ជូនទៅអយ្យការអមសាលាដំបូងខេត្តកណ្ដាល ដើម្បីបន្តនីតិវិធីតាមផ្លូវច្បាប់។ ករណីនេះបង្ហាញពីការខិតខំប្រឹងប្រែងយ៉ាងម៉ឺងម៉ាត់របស់កម្លាំងនគរបាល ក្នុងការពារ និងថែរក្សាសម្បត្តិសាធារណៈ ព្រមទាំងរក្សាសន្តិសុខសណ្តាប់ធ្នាប់សង្គម៕