លោកឧត្តមសេនីយ៍ត្រី ម៉េង ស្រ៊ុន លេចធ្លោស្មារតីជាតិនិយម ខិតខំគាំទ្រវីរៈកងទ័ពនៅព្រះវិហារ

(កំពង់ស្ពឺ)៖ ក្នុងស្មារតីជាតិនិយម និងការយកចិត្តទុកដាក់ខ្ពស់ចំពោះកងកម្លាំងនៅសមរភូមិមុខ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ​កងរាជអាវុធហត្ថ​ខេត្តកំពង់ស្ពឺ បានចាត់ឱ្យក្រុមការងារ រៀបចំ និងនាំយកសម្ភារៈគ្រឿងឧបភោគបរិភោគមួយចំនួន ដើម្បីឧបត្ថម្ភជូនដល់បងប្អូនវីរៈកងទ័ពជួរមុខ នៃអង្គភាពវរសេនាតូចលេខ៦១ បញ្ជាការដ្ឋានរថក្រោះ អគ្គបញ្ជាការ ដែលកំពុងឈរជើងនៅទិសខេត្តព្រះវិហារ។

សកម្មភាពនេះបានប្រព្រឹត្តឡើងនៅទីបញ្ជាការដ្ឋាន​កងរាជអាវុធហត្ថ​ខេត្តកំពង់ស្ពឺ នាខែមេសា ឆ្នាំ២០២៦ ដោយមានការរៀបចំយ៉ាងម៉ឺងម៉ាត់ និងមានការចូលរួមយ៉ាងសកម្មពីក្រុមការងារ និងសប្បុរសជនពាក់ព័ន្ធ។

សម្ភារៈដែលបានឧបត្ថម្ភរួមមាន ទឹកសុទ្ធចំនួន ១០០កេស និងមីចំនួន ៥០កេស ដែលជាចំណែកមួយក្នុងការគាំទ្រផ្នែកជីវភាពប្រចាំថ្ងៃ និងលើកទឹកចិត្តដល់កងទ័ពកំពុងបំពេញភារកិច្ចការពារដែនអធិបតេយ្យភាពជាតិ។

ការចូលរួមឧបត្ថម្ភនេះ បង្ហាញឱ្យឃើញយ៉ាងច្បាស់ពីការដឹកនាំប្រកបដោយវិជ្ជាជីវៈ និងទឹកចិត្តស្មោះត្រង់ចំពោះជាតិរបស់លោកឧត្តមសេនីយ៍ត្រី ម៉េង ស្រ៊ុន ព្រមទាំងការសហការរួមចំណែកពីក្រុមការងារ និងសប្បុរសជនទាំងក្នុង និងក្រៅតំបន់ ដែលបានបន្តគាំទ្រយ៉ាងសកម្មមកជាបន្តបន្ទាប់។

ជាមួយគ្នានេះ លោកមេបញ្ជាការក៏បានផ្ញើសារជូនពរដល់បងប្អូនវីរៈកងទ័ពជួរមុខទាំងអស់ សូមមានសុខភាពល្អ កម្លាំងកាយមាំមួន និងបន្តអនុវត្តភារកិច្ចដ៏ឧត្តុង្គឧត្តម ក្នុងការពារបូរណភាពទឹកដី និងរក្សាសុខសន្តិភាពជូនប្រជាជនកម្ពុជា។

សកម្មភាពដ៏មានអត្ថន័យនេះ គឺជាគំរូល្អមួយនៃការរួមចំណែករវាងកងកម្លាំង និងសង្គម ក្នុងការគាំទ្រគ្នាទៅវិញទៅមក ដើម្បីបន្តថែរក្សាស្ថិរភាព សន្តិសុខ និងអភិវឌ្ឍន៍ជាតិឱ្យកាន់តែរឹងមាំ៕