រាជរដ្ឋាភិបាលកម្ពុជាបាននិងកំពុងបន្តជំរុញដំណើរការកែទម្រង់រដ្ឋបាលឱ្យកាន់តែស៊ីជម្រៅ ទូលំទូលាយ និងមានភាពស៊ីចង្វាក់ប្រទាក់ក្រឡាគ្នា

(ភ្នំពេញ)៖ រាជរដ្ឋាភិបាលកម្ពុជាបាននិងកំពុងបន្តជំរុញដំណើរការកែទម្រង់រដ្ឋបាលឱ្យកាន់តែស៊ីជម្រៅ ទូលំទូលាយ និងមានភាពស៊ីចង្វាក់ប្រទាក់ក្រឡាគ្នា ដោយផ្តោតលើការកសាងប្រព័ន្ធអភិបាលកិច្ចដែលមានប្រសិទ្ធភាព ថ្លៃថ្នូរ និងឆ្លើយតបតម្រូវការជាក់ស្តែងរបស់ប្រជាពលរដ្ឋ។ ការកែទម្រង់នេះ មិនត្រឹមតែជាគោលនយោបាយស្នូលប៉ុណ្ណោះទេ ប៉ុន្តែជាមូលដ្ឋានសម្រាប់ការអភិវឌ្ឍជាតិប្រកបដោយចីរភាព និងភាពរឹងមាំក្នុងរយៈពេលវែងផងដែរ។

ក្នុងបរិបទនៃការប្រកួតប្រជែងសេដ្ឋកិច្ច និងសង្គមកាន់តែខ្លាំង ការលើកកម្ពស់អភិបាលកិច្ចត្រូវបានដាក់ជាអាទិភាព ដោយភ្ជាប់ជាមួយនឹងការប្រយុទ្ធប្រឆាំងអំពើពុករលួយ និងការពង្រឹងសុចរិតភាពក្នុងវិស័យសាធារណៈ និងឯកជន។ វិធានការទាំងនេះ មានគោលបំណងបង្កើនភាពជឿទុកចិត្តរបស់ប្រជាពលរដ្ឋ និងវិនិយោគិន ព្រមទាំងធានាថាការផ្តល់សេវាសាធារណៈអាចប្រព្រឹត្តទៅដោយមានប្រសិទ្ធភាព រហ័ស និងតម្លាភាព។

ជាមួយគ្នានេះ ក្នុងនីតិកាលទី៧ នៃរដ្ឋសភា រាជរដ្ឋាភិបាលបានកំណត់ទិសដៅច្បាស់លាស់លើការអនុវត្តន៍កំណែទម្រង់សំខាន់ៗ ចំនួនបួន រួមមាន៖ *ទី១. ការពង្រឹង និងកែទម្រង់ស្ថាប័ន ដើម្បីធានាប្រព័ន្ធដឹកនាំមានសមត្ថភាព និងច្បាស់លាស់ក្នុងតួនាទីភារកិច្ច។*ទី២. ការលើកកម្ពស់សមត្ថភាពធនធានមនុស្ស និងប្រសិទ្ធភាពការងារ ដើម្បីបង្កើតមន្ត្រីដែលមានជំនាញ វិន័យ និងទំនួលខុសត្រូវខ្ពស់។ *ទី៣. ការពង្រឹងភាពស្អាតស្អំក្នុងរដ្ឋបាលសាធារណៈ ដោយផ្តោតលើសុចរិតភាព និងការកាត់បន្ថយអំពើមិនប្រក្រតីគ្រប់រូបភាព។*ទី៤.ការលើកកម្ពស់ប្រសិទ្ធភាពនៃច្បាប់ និងប្រព័ន្ធយុត្តិធម៌ ដើម្បីធានាថាការអនុវត្តច្បាប់មានសមធម៌ និងស្មើភាពសម្រាប់គ្រប់ភាគី។

ថ្លែងក្នុងវេទិកាកែទម្រង់ស្តីពី «ការលើកកម្ពស់អភិបាលកិច្ចក្នុងរដ្ឋបាលសាធារណៈ» នាថ្ងៃទី០៣ ខែមេសា ឆ្នាំ២០២៦ ឯកឧត្តម ហ៊ុន ម៉ានី ឧបនាយករដ្ឋមន្រ្តី និងរដ្ឋមន្រ្តីក្រសួងមុខងារសាធារណៈ បានបញ្ជាក់ថា «ការកែទម្រង់ទាំងនេះគឺជាចលករសំខាន់សម្រាប់លើកកម្ពស់គុណភាពអភិបាលកិច្ច និងបង្កើតមូលដ្ឋានរឹងមាំសម្រាប់ការផ្តល់សេវាសាធារណៈដែលមានប្រសិទ្ធភាព និងគួរឱ្យជឿទុកចិត្ត»។

កំណែទម្រង់រដ្ឋបាលមិនមែនជាការងាររយៈពេលខ្លីទេ ប៉ុន្តែជាដំណើរដែលត្រូវការការចូលរួមយ៉ាងសកម្មពីគ្រប់ភាគី ដើម្បីធានាថាប្រព័ន្ធអភិបាលកិច្ចកម្ពុជាអាចឆ្លើយតបនឹងបញ្ហាប្រឈម និងឱកាសថ្មីៗក្នុងយុគសម័យបច្ចុប្បន្ន៕