អាជ្ញាធរបដិសេធ! ករណី “Yi Chanra” ចោទសមត្ថកិច្ចទាមទារ ៧០០ដុល្លារ ជាព័ត៌មានមិនពិត

(កណ្តាល)៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានចេញសេចក្តីបំភ្លឺជាផ្លូវការ ពាក់ព័ន្ធនឹងការចែករំលែកព័ត៌មានលើបណ្តាញសង្គមហ្វេសប៊ុក ពីគណនីឈ្មោះ “Yi Chanra” ដែលបានលើកឡើងអំពីករណីសមត្ថកិច្ចទាមទារថវិកាចំនួន ៧០០ដុល្លារ ក្នុងការជួយបញ្ជូនបុគ្គលម្នាក់ទៅកាន់មណ្ឌលអប់រំកែប្រែ (បន្សាបគ្រឿងញៀន)។

យោងតាមបទបញ្ជារបស់លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល អធិការដ្ឋាននគរបាលក្រុងអរិយក្សត្រ បានបញ្ជាកម្លាំងជំនាញចុះស្រាវជ្រាវ និងពិនិត្យយ៉ាងម៉ត់ចត់លើករណីខាងលើ។

លទ្ធផលស្រាវជ្រាវបង្ហាញថា នៅព្រឹកថ្ងៃទី២៧ ខែមីនា ឆ្នាំ២០២៦ ស្ត្រីម្នាក់ឈ្មោះ រួន ចន្ថា បានមកជួបកម្លាំងជំនាញប្រឆាំងគ្រឿងញៀន ដើម្បីស្នើសុំជំនួយក្នុងការបញ្ជូនកូនរបស់ខ្លួនទៅមណ្ឌលអប់រំកែប្រែ ដោយសារតែមានអាការៈអុកឡុកគ្រួសារ នៅពេលផឹកស្រា។

តាមការបញ្ជាក់របស់ម្ដាយផ្ទាល់ កូនរបស់គាត់មិនបានប្រើប្រាស់សារធាតុញៀនឡើយ ប៉ុន្តែមានបញ្ហាផ្លូវចិត្ត និងញៀនស្រា។ ក្នុងន័យនេះ កម្លាំងជំនាញបានពន្យល់យ៉ាងច្បាស់ថា ការបញ្ជូនទៅមណ្ឌលបន្សាបគ្រឿងញៀន តម្រូវឱ្យមានលក្ខខណ្ឌជាក់លាក់ គឺត្រូវមានសារធាតុញៀនក្នុងខ្លួនជាមុនសិន ទើបអាចទទួលបានការព្យាបាលនៅមណ្ឌលរដ្ឋ។

បន្ថែមពីនេះ សមត្ថកិច្ចបានផ្តល់យោបល់ថា អាចស្វែងរកមណ្ឌលឯកជន ប៉ុន្តែអាចត្រូវចំណាយថវិកាប្រហែល ៧០០ដុល្លារ សម្រាប់សេវាផ្សេងៗ ដូចជា ការស្នាក់នៅ អាហារ ការព្យាបាល និងការថែទាំ។ ទោះជាយ៉ាងណា ការចំណាយនេះ គឺជាការបង់សេវាផ្ទាល់ទៅមណ្ឌលឯកជន មិនមែនជាការទាមទារថវិកាពីសមត្ថកិច្ចឡើយ។

ក្រោយពេលទទួលបានការពន្យល់ ស្ត្រីរូបនោះបានបញ្ជាក់ថា ខ្លួនមិនមានលទ្ធភាពបង់ថ្លៃសេវានោះទេ ហើយបានត្រឡប់ទៅផ្ទះវិញដោយស្ម័គ្រចិត្ត។

ជាក់ស្តែង ករណីដែលត្រូវបានផ្សព្វផ្សាយថា “សមត្ថកិច្ចទាមទារថវិកា ៧០០ដុល្លារ” គឺជាព័ត៌មានមិនពិត និងបង្កឱ្យមានការយល់ច្រឡំក្នុងសាធារណៈមតិ។

អាស្រ័យដូចបានបញ្ជាក់ខាងលើ ស្នងការដ្ឋាននគរបាលខេត្តកណ្តាល សូមអំពាវនាវដល់សាធារណជន និងបណ្តាញសារព័ត៌មានទាំងអស់ សូមពិនិត្យប្រភពព័ត៌មានឱ្យបានច្បាស់លាស់ មុននឹងធ្វើការចែករំលែក ដើម្បីជៀសវាងការភាន់ច្រឡំ និងការប៉ះពាល់ដល់កិត្តិយសស្ថាប័នពាក់ព័ន្ធ៕