រដ្ឋមន្ត្រី ប៉េង ពោធិ៍នា ចុះបង្ក្រាបរថយន្តដឹកលើសទម្ងន់យ៉ាងតឹងរ៉ឹង នៅខេត្តព្រៃវែង ទាំងកណ្ដាលអាធ្រាត្រ

(ព្រៃវែង)៖ ក្នុងការពង្រឹងការអនុវត្តច្បាប់ចរាចរណ៍ និងការពារសុវត្ថិភាពផ្លូវថ្នល់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំក្រុមការងារត្រួតពិនិត្យចល័ត ចុះប្រតិបត្តិការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ដោយផ្ទាល់នៅវេលាម៉ោង ១២:៣០នាទី ទៀបភ្លឺ ព្រឹកថ្ងៃទី៣ ខែមេសា ឆ្នាំ២០២៦ នៅចំណុចផ្លូវលេខ៣៨៤ ភូមិភ្លយ សង្កាត់តាកោ ក្រុងព្រៃវែង ខេត្តព្រៃវែង។

ប្រតិបត្តិការនេះ មានការសហការយ៉ាងជិតស្និទ្ធជាមួយស្ថានីយជញ្ជីងអចល័តព្រៃព្នៅ និងកងកម្លាំងសមត្ថកិច្ចពាក់ព័ន្ធ ដោយក្រុមការងារបានឃាត់រថយន្តចំនួន២គ្រឿង ដែលរកឃើញថា ផ្ទុកទម្ងន់សរុបចន្លោះពី ៤២ តោន ដល់ ៨៨ តោន លើសកម្រិតអនុញ្ញាតចន្លោះពី ១៧ តោន ដល់ ៤៣ តោន ស្មើនឹង ៦៨% ដល់ ៩៥% នៃកម្រិតច្បាប់។ រថយន្តទាំងនេះត្រូវបានពិន័យតាមបទប្បញ្ញត្តិ មាត្រា ៦០ នៃច្បាប់ស្តីពីផ្លូវថ្នល់។

ឆ្លៀតក្នុងឱកាសនោះ ឯកឧត្តមរដ្ឋមន្ត្រីបានដាក់ចេញវិធានការសំខាន់ៗ ដើម្បីបង្កើនប្រសិទ្ធភាពនៃការគ្រប់គ្រង និងបង្ក្រាបបទល្មើស ដូចជា ការដំឡើងប្រព័ន្ធកាមេរ៉ាសុវត្ថិភាព (CCTV) នៅគ្រប់ស្ថានីយជញ្ជីង ដោយភ្ជាប់ត្រួតពិនិត្យមកកាន់ទីស្នាក់ការកណ្ដាល និងទូរស័ព្ទដៃរបស់ថ្នាក់ដឹកនាំដោយផ្ទាល់។

ជាមួយគ្នានេះ ក្រសួងនឹងអនុវត្តវិធានការយ៉ាងតឹងរ៉ឹងចំពោះមន្ត្រីណាដែលពាក់ព័ន្ធ ឬចូលរួមអនុញ្ញាតឱ្យមានសកម្មភាពដឹកលើសទម្ងន់ ដោយអនុវត្ត “អភិក្រមទី៥ គឺវះកាត់” ដោយគ្មានការលើកលែង។ ទន្ទឹមនឹងនេះ ក្រុមការងារពិសេសក៏ត្រូវបានបង្កើតឡើង ដើម្បីតាមដាន និងបង្ក្រាបរថយន្តដែលគេចវាងមិនចូលថ្លឹងនៅស្ថានីយជញ្ជីងផងដែរ។

បន្ថែមលើនេះ ក្រសួងកំពុងរៀបចំផែនការដំឡើងស្លាកសញ្ញាសម្គាល់ជាមុន ដើម្បីជូនដំណឹងដល់អ្នកដឹកជញ្ជូនអំពីវត្តមានស្ថានីយត្រួតពិនិត្យ និងជញ្ជីងចល័ត ខណៈជំរុញឲ្យមានការគោរពច្បាប់យ៉ាងតឹងរ៉ឹង។

ក្រសួងសាធារណការ និងដឹកជញ្ជូន សូមអំពាវនាវដល់ប្រជាពលរដ្ឋ អាជីវករ និងអ្នកដឹកជញ្ជូនទាំងអស់ ចូលរួមគោរពច្បាប់ ឈប់ដឹកលើសទម្ងន់កម្រិតកំណត់ ដើម្បីការពារសុវត្ថិភាពផ្លូវថ្នល់ និងអាយុកាលហេដ្ឋារចនាសម្ព័ន្ធជាតិឲ្យបានយូរអង្វែង៕