បង្ក្រាបទីតាំងអនឡាញខុសច្បាប់នៅកាស៊ីណូស្វាយរៀង៖ ឃាត់ខ្លួនជនបរទេស ១០៧នាក់ ពាក់ព័ន្ធល្បែងស៊ីសង និងស្កេម

(ស្វាយរៀង)៖ កម្លាំងនគរបាលជាតិ សហការជាក្រុមប្រតិបត្តិការចម្រុះ បានចុះបង្ក្រាបទីតាំងប្រព្រឹត្តបទល្មើសអនឡាញខុសច្បាប់ រួមទាំងសកម្មភាពឆបោកតាមប្រព័ន្ធបច្ចេកវិទ្យា (Online Scam) នៅក្នុងបរិវេណកាស៊ីណូមួយកន្លែង ក្នុងខេត្តស្វាយរៀង ដោយឃាត់ខ្លួនជនពាក់ព័ន្ធសរុប ១០៧នាក់។

ប្រតិបត្តិការនេះ ដឹកនាំដោយលោកឧត្តមសេនីយ៍ឯក ហែម សុវត្ថិ អគ្គស្នងការរងនគរបាលជាតិ ក្រោមការសម្របសម្រួលនីតិវិធីពីលោក ដូរ៉ា អង្គប្រទាន ព្រះរាជអាជ្ញារង នៃអយ្យការអមសាលាដំបូងខេត្តស្វាយរៀង ដោយបានចុះត្រួតពិនិត្យ និងឆែកឆេរទីតាំងក្រុមហ៊ុនកាស៊ីណូ «សៀងហៃ រីហ្សត» ស្ថិតនៅភូមិចេក ឃុំសំរោង ស្រុកចន្ទ្រា ខេត្តស្វាយរៀង បន្ទាប់ពីមានតម្រុយសង្ស័យពាក់ព័ន្ធនឹងការលបលួចធ្វើអាជីវកម្មអនឡាញខុសច្បាប់។

ប្រតិបត្តិការនេះ អនុវត្តស្របតាមបទបញ្ជាដ៏ម៉ឺងម៉ាត់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា និងក្រោមការដឹកនាំតម្រង់ទិសពី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ដោយមានការគ្រប់គ្រងអនុវត្តពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ។

ជាលទ្ធផល កម្លាំងសមត្ថកិច្ចបានរកឃើញជនបរទេសចំនួន ១០៧នាក់ ក្នុងនោះមានស្ត្រី ២៦នាក់ ស្មើ ៤សញ្ជាតិ រួមមាន៖ *ជនជាតិចិន ៦៧នាក់ (ស្រី ៧នាក់)*ជនជាតិឥណ្ឌូនេស៊ី ២១នាក់ (ស្រី ៩នាក់)*ជនជាតិមីយ៉ាន់ម៉ា ២នាក់*ជនជាតិវៀតណាម ១៧នាក់ (ស្រី ៨នាក់)។

ក្រៅពីនេះ សមត្ថកិច្ចក៏បានរឹបអូសឧបករណ៍ និងសម្ភារៈជាច្រើន ដែលត្រូវបានប្រើប្រាស់សម្រាប់ប្រតិបត្តិការអនឡាញ រួមមាន៖ កំព្យូទ័រលើតុ (All-in-One) ចំនួន ៨៩គ្រឿង, កំព្យូទ័រយួរដៃ ៥៧គ្រឿង, iPad ៧៣គ្រឿង, ម៉ូនីទ័រ ១គ្រឿង, ទូរស័ព្ទដៃចម្រុះម៉ាក ១,៤២១គ្រឿង, ម៉ាស៊ីនបោះពុម្ព ១គ្រឿង និងទូដែក ៧។

ផ្អែកលើការត្រួតពិនិត្យជាក់ស្តែង សមត្ថកិច្ចបានសន្និដ្ឋានថា មានជនសង្ស័យចំនួន ៤នាក់ ពាក់ព័ន្ធនឹងការលបលួចដំណើរការល្បែងស៊ីសងតាមប្រព័ន្ធអនឡាញខុសច្បាប់ តាមរយៈវេបសាយ “BABY SLOT” ខណៈជនសង្ស័យ ២នាក់ទៀត ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា (Online Scam)។

បច្ចុប្បន្ន ជនសង្ស័យ ៤នាក់ ត្រូវបានកសាងសំណុំរឿង និងបញ្ជូនទៅអយ្យការអមសាលាដំបូងខេត្តស្វាយរៀង ចំណែកជនសង្ស័យ ២នាក់ទៀត រួមទាំងវត្ថុតាងពាក់ព័ន្ធ ត្រូវបានប្រគល់ឲ្យស្នងការដ្ឋាននគរបាលខេត្ត ដើម្បីបន្តនីតិវិធីតាមផ្លូវច្បាប់។ ចំណែកជនបរទេស ១០១នាក់ផ្សេងទៀត ត្រូវបានបញ្ជូនទៅអគ្គនាយកដ្ឋានអន្តោប្រវេសន៍ ដើម្បីចាត់ការតាមនីតិវិធីជាបន្ត៕