បង្ក្រាបករណីគ្រឿងញៀន និងអាវុធខុសច្បាប់នៅស្រុកបាទី៖ ឃាត់ខ្លួនជនសង្ស័យ៧នាក់ របួសសមត្ថកិច្ច ២នាក់ និងប្រជាពលរដ្ឋ ២នាក់

(តាកែវ)៖ កម្លាំងជំនាញប្រឆាំងគ្រឿងញៀន បានបើកប្រតិបត្តិការបង្ក្រាបករណីជួញដូរ​គ្រឿងញៀន និងកាន់កាប់ប្រើប្រាស់អាវុធខុសច្បាប់មួយករណី ដោយឃាត់ខ្លួនជនសង្ស័យសរុប៧នាក់ ក្នុងនោះមានស្ត្រី ១នាក់ និងរឹបអូសវត្ថុតាងជាច្រើន បន្ទាប់ពីមានការសហការយ៉ាងសកម្មរវាងកម្លាំងពាក់ព័ន្ធជាច្រើនអង្គភាព។

ប្រតិបត្តិការនេះ បានអនុវត្តឡើងនៅវេលាម៉ោង ១៣៖៥២នាទី ថ្ងៃទី០២ ខែមេសា ឆ្នាំ២០២៦ ដោយកម្លាំងការិយាល័យគ្រឿងញៀន សហការជាមួយកម្លាំងមន្ទីរប្រឆាំងគ្រឿងញៀន កម្លាំងអធិការដ្ឋាននគរបាលស្រុកបាទី ប៉ុស្តិ៍នគរបាលរដ្ឋបាលត្រពាំងសាប ប៉ុស្តិ៍កណ្ដឹង និងកងកម្លាំងអន្តរាគមន៍ខេត្ត ចុះបង្ក្រាបនៅភូមិសាស្ត្រស្រុកបាទី ខេត្តតាកែវ។

ក្នុងប្រតិបត្តិការនេះ បានបណ្តាលឲ្យកម្លាំងសមត្ថកិច្ច ២នាក់ រងរបួស រួមមាន៖ ឈ្មោះ ធៀង ឧត្ដម និងឈ្មោះ អ៊ុក សារិន ខណៈប្រជាពលរដ្ឋ ២នាក់ ក៏រងរបួសផងដែរ ក្នុងនោះមានស្ត្រីម្នាក់ឈ្មោះ ប៉េល ផាន អាយុ ៥៧ឆ្នាំ និងចៅប្រុសម្នាក់។

ជនសង្ស័យដែលត្រូវបានឃាត់ខ្លួន មានចំនួន ៧នាក់ រួមមាន៖
១- ព្រឿង សារាជ ភេទប្រុស អាយុ ៣២ឆ្នាំ
២- ព្រឿង សារ៉ាត់ ភេទប្រុស អាយុ ២៣ឆ្នាំ
៣- សូត្រ សារ៉ាត់ ហៅ ពុំ ភេទប្រុស អាយុ ២៦ឆ្នាំ
៤- ហុីង កុសល់ ភេទប្រុស អាយុ ៤៩ឆ្នាំ
៥- ទ្រី សៀកម៉េង ភេទប្រុស អាយុ ២១ឆ្នាំ
៦- មិច វឿន ភេទស្រី
៧- គី ដាលីន ភេទប្រុស

វត្ថុតាងដែលសមត្ថកិច្ចរឹបអូសបាន រួមមាន៖ អាវុធប្រភេទ K59 ចំនួន ២ដើម, អាវុធខ្លីម៉ាក Glock ចំនួន ១ដើម, ជញ្ជីងថ្លឹងថ្នាំញៀន ២គ្រឿង, ម្សៅក្រាមពណ៌សថ្លា ១កញ្ចប់, ស្រោមកាំភ្លើង ១, បង់ ៤ និងគ្រាប់កាំភ្លើងសរុប ២២គ្រាប់។

បច្ចុប្បន្ន ជនសង្ស័យទាំងអស់ រួមទាំងវត្ថុតាង ត្រូវបានសមត្ថកិច្ចកសាងសំណុំរឿង ដើម្បីបន្តនីតិវិធីតាមផ្លូវច្បាប់ ខណៈអាជ្ញាធរបានបញ្ជាក់ថា នឹងបន្តពង្រឹងវិធានការបង្ក្រាបបទល្មើសគ្រឿងញៀន និងអាវុធខុសច្បាប់ ដើម្បីធានាសុវត្ថិភាពសង្គម និងសណ្តាប់ធ្នាប់សាធារណៈ៕