បទបញ្ជាដ៏តឹងរ៉ឹងពីប្រមុខរាជរដ្ឋាភិបាលបញ្ជាឲ្យស្រាវជ្រាវបណ្ដាញលួចនាំប្រេងខុសច្បាប់ និងចាត់វិធានការខ្ពស់បំផុត

(ភ្នំពេញ)៖ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបង្ហាញការយកចិត្តទុកដាក់យ៉ាងខ្ពស់ចំពោះព័ត៌មានដែលត្រូវបានផ្សព្វផ្សាយដោយបណ្ដាញសារព័ត៌មានថៃ ពាក់ព័ន្ធនឹងសកម្មភាពសង្ស័យនៃបណ្ដាញលួចនាំប្រេងឥន្ធនៈខុសច្បាប់ចូលមកលក់នៅក្នុងប្រទេសកម្ពុជា។

ក្នុងនាមជាប្រមុខរាជរដ្ឋាភិបាល សម្ដេចធិបតីបានចេញបទបញ្ជាដាច់ខាតទៅកាន់អាជ្ញាធរនិងស្ថាប័នពាក់ព័ន្ធ រួមមាន ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល ឯកឧត្តម ស ថេត អគ្គស្នងការនគរបាលជាតិ និង ឯកឧត្តម គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា ឱ្យចូលរួមសហការស្រាវជ្រាវករណីនេះយ៉ាងម៉ឺងម៉ាត់ ដើម្បីបញ្ជាក់ការពិតឱ្យបានច្បាស់លាស់។

សម្ដេចធិបតីបានបញ្ជាក់យ៉ាងតឹងរឹងថា ប្រសិនបើរកឃើញថាមានសកម្មភាពខុសច្បាប់ពិតប្រាកដ អាជ្ញាធរត្រូវស្វែងរកមុខសញ្ញាពាក់ព័ន្ធទាំងអស់ ដោយមិនលើកលែងនរណាម្នាក់ និងត្រូវអនុវត្តវិធានការច្បាប់យ៉ាងតឹងរឹងបំផុត។ ក្នុងករណីមានការចូលរួមពីក្រុមហ៊ុនប្រេងណាមួយ នឹងត្រូវដកហូតអាជ្ញាប័ណ្ណជាអចិន្ត្រៃយ៍។ ខណៈបើមានមន្ត្រីរាជការ ឬកងកម្លាំងប្រដាប់អាវុធពាក់ព័ន្ធ នឹងត្រូវបញ្ចប់តួនាទី និងបណ្ដេញចេញពីក្របខណ្ឌដោយគ្មានការលើកលែង ទោះបីមានឋានន្តរស័ក្តិ ឬមុខតំណែងខ្ពស់យ៉ាងណាក៏ដោយ។

ជាមួយគ្នានេះ សម្ដេចធិបតីក៏បានរំលឹកផងដែរថា រាជរដ្ឋាភិបាលកម្ពុជា បានសម្រេចផ្អាកការទិញប្រេងឥន្ធនៈ និងឧស្ម័នឥន្ធនៈគ្រប់ប្រភេទពីប្រទេសថៃ ចាប់តាំងពីខែមិថុនា ឆ្នាំ២០២៥ ហើយបច្ចុប្បន្នកម្ពុជា មិនមានតម្រូវការនាំចូលប្រេងពីប្រទេសនេះឡើយ ដោយសារតែមានប្រភពផ្គត់ផ្គង់គ្រប់គ្រាន់ពីទីផ្សារអន្តរជាតិផ្សេងៗ។

វិធានការដាច់ខាតនេះ បង្ហាញពីការប្តេជ្ញាចិត្តរឹងមាំរបស់រាជរដ្ឋាភិបាល ក្នុងការរក្សាសុចរិតភាពទីផ្សារ ការពារសេដ្ឋកិច្ចជាតិ និងទប់ស្កាត់អំពើខុសច្បាប់គ្រប់ទម្រង់ ដើម្បីធានាបាននូវបរិយាកាសអាជីវកម្មត្រឹមត្រូវ និងប្រកបដោយភាពស្មើភាពក្នុងសង្គម៕