បង្ក្រាបក្រុមចាប់បង្ខាំងជំរិតទារប្រាក់! ឃាត់ខ្លួនជនសង្ស័យ ១១នាក់ សង្គ្រោះជនរងគ្រោះ ៣នាក់

(ភ្នំពេញ)៖ ដោយអនុវត្តតាមបទបញ្ជាដ៏ម៉ឺងម៉ាត់របស់លោកនាយឧត្តមសេនីយ៍ ស ថេត អគ្គស្នងការនគរបាលជាតិ កម្លាំងនាយកដ្ឋាននគរបាលព្រហ្មទណ្ឌ បានបើកប្រតិបត្តិការស្រាវជ្រាវ និងបង្ក្រាបករណីចាប់បង្ខាំងមនុស្សខុសច្បាប់ និងជំរិតទារប្រាក់ ដោយជោគជ័យ ឃាត់ខ្លួនជនសង្ស័យចំនួន ១១នាក់ និងសង្គ្រោះជនរងគ្រោះចំនួន៣នាក់។

ប្រភពព័ត៌មានបានឲ្យដឹងថា នៅថ្ងៃទី៣០ ខែមីនា ឆ្នាំ២០២៦ នាយកដ្ឋាននគរបាលព្រហ្មទណ្ឌ បានទទួលពាក្យបណ្តឹងពីជនរងគ្រោះឈ្មោះ Phan Van Tien ភេទប្រុស អាយុ ២៣ឆ្នាំ ជនជាតិវៀតណាម ដែលបានរាយការណ៍ថា មិត្តស្រីរបស់ខ្លួនឈ្មោះ Lam Thi Nheu អាយុ ២១ឆ្នាំ ត្រូវបានជនមិនស្គាល់អត្តសញ្ញាណ ចាប់បង្ខាំង និងជំរិតទារប្រាក់ កាលពីថ្ងៃទី២៥ ខែមីនា ឆ្នាំ២០២៦ វេលាម៉ោង ០៣៖៤០នាទី នៅចំណុចសង្កាត់វត្តភ្នំ ខណ្ឌដូនពេញ រាជធានីភ្នំពេញ។

បន្ទាប់ពីទទួលបានព័ត៌មាន កម្លាំងជំនាញបានអនុវត្តតាមបទបញ្ជារបស់លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ ដោយដឹកនាំកម្លាំងស្រាវជ្រាវដោយលោកឧត្តមសេនីយ៍ត្រី ហ៊ុន មុន្នីរ័ត្ន និងសហការជាមួយស្នងការដ្ឋាននគរបាលខេត្តព្រះសីហនុ ធ្វើការស្រាវជ្រាវយ៉ាងយកចិត្តទុកដាក់ រហូតកំណត់បានអត្តសញ្ញាណ និងទីតាំងសម្ងំរបស់ក្រុមជនសង្ស័យ។

រហូតមកដល់ថ្ងៃទី០១ ខែមេសា ឆ្នាំ២០២៦ វេលាម៉ោង ២១៖២០នាទី កម្លាំងសមត្ថកិច្ចបានចុះប្រតិបត្តិការ បង្ក្រាប និងជួយសង្គ្រោះជនរងគ្រោះដោយសុវត្ថិភាព ព្រមទាំងឃាត់ខ្លួនជនសង្ស័យចំនួន ១១នាក់ នៅចំណុចសង្កាត់២ ក្រុងព្រះសីហនុ ខេត្តព្រះសីហនុ។

តាមការស្រាវជ្រាវបឋម ក្រុមជនសង្ស័យបានប្រើល្បិចណាត់ជួបនារីរងគ្រោះក្រោមរូបភាពបម្រើសេវាផ្លូវភេទ បន្ទាប់មកធ្វើសកម្មភាពចាប់បង្ខាំង និងជំរិតទារប្រាក់។ គេក៏រកឃើញថា ក្រុមនេះធ្លាប់បានប្រព្រឹត្តសកម្មភាពដូចគ្នាច្រើនលើកមកហើយ មុននឹងត្រូវសមត្ថកិច្ចបង្ក្រាបបាន។

បច្ចុប្បន្ន ជនសង្ស័យទាំងអស់ កំពុងត្រូវបានសាកសួរនៅនាយកដ្ឋាននគរបាលព្រហ្មទណ្ឌ ដើម្បីកសាងសំណុំរឿង និងចាត់ការតាមនីតិវិធីច្បាប់បន្ត៕