ឯកឧត្តម ហាក់ សុខមករា៖ រាល់សំណង់ដែលល្មើស នឹងត្រូវផ្អាកជាបណ្តោះអាសន្ន ឬរុះរើចោល ក្នុងករណីមិនអាចកែតម្រូវបាន!

(កណ្តាល)៖ ឯកឧត្តម ហាក់ សុខមករា បានគូសបញ្ជាក់ថា ដើម្បីធានាបាននូវសណ្តាប់ធ្នាប់សាធារណៈ សោភ័ណ្ឌភាពក្នុងមូលដ្ឋានស្រុក និងជាពិសេសសុវត្ថិភាពរបស់អ្នករស់នៅរដ្ឋបាលខេត្តបានដាក់ចេញនូវវិធានការតឹងរ៉ឹងបន្ថែមទៀត ក្នុងការទប់ស្កាត់រាល់ការសាងសង់ទាំងឡាយណាដែលពុំមានច្បាប់អនុញ្ញាតត្រឹមត្រូវ។ក្នុងនោះ អាជ្ញាធរត្រូវអនុវត្តច្បាប់ស្តីពីសំណង់ឱ្យបានហ្មត់ចត់បំផុត ដោយតម្រូវឱ្យម្ចាស់សំណង់ទាំងអស់ត្រូវសុំច្បាប់អនុញ្ញាតសាងសង់ មុននឹងចាប់ផ្តើមសកម្មភាពឈូសឆាយ ឬចាក់គ្រឹះ។

ការគូសបញ្ជាក់របស់ឯកឧត្តម ហាក់ សុខមករា អភិបាលរងខេត្តកណ្តាលនៅក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋចំនួន១២ភូមិ ក្នុងស្រុកស្អាង សុរប ៨,៨៤៤ប័ណ្ណ នាព្រឹកថ្ងៃទី២ ខែមេសា ឆ្នាំ២០២៦ នៅក្នុងបរិវេនសាលាស្រុកស្អាង។

នៅក្នុងពិធីនោះ ឯកឧត្តមអភិបាលរងខេត្តបានសង្កត់ធ្ងន់ថា រាល់សំណង់ដែលល្មើស នឹងត្រូវផ្អាកជាបណ្តោះអាសន្ន ឬរុះរើចោល ក្នុងករណីមិនអាចកែតម្រូវបាន។ មន្ត្រីជំនាញត្រូវធ្វើការបញ្ជ្រាបចំណេះដឹងផ្នែកច្បាប់ដល់ប្រជាពលរដ្ឋ ផ្សព្វផ្សាយអំពីនីតិវិធីនៃការសុំច្បាប់សាងសង់ គឺជាកិច្ចការចាំបាច់។

ឯកឧត្តមបន្តថា ប្រជាពលរដ្ឋត្រូវយល់ដឹងថា ការសាងសង់មានច្បាប់មិនត្រឹមតែការពារពួកគាត់ពីផ្លូវច្បាប់ប៉ុណ្ណោះទេ ប៉ុន្តែថែមទាំងធានាថាផ្ទះសម្បែង ឬអគារនោះមានគុណភាពបច្ចេកទេសត្រឹមត្រូវ មិនងាយរងគ្រោះថ្នាក់ដួលរំលំ។

ឯកឧត្តមបានបន្តគូសបញ្ជាក់ថា ការលុបបំបាត់សំណង់គ្មានច្បាប់ មិនត្រឹមតែជួយឱ្យស្រុករបស់យើងមានរបៀបរៀបរយប៉ុណ្ណោះទេ ប៉ុន្តែវាគឺជាការការពារអាយុជីវិត និងទ្រព្យសម្បត្តិរបស់ប្រជាពលរដ្ឋផ្ទាល់តែម្តង។

សំដៅពង្រឹងសុវត្ថិភាពក្នុងការរស់នៅរបស់ប្រជាជន
ឯកឧត្តមអភិបាលរងខេត្តបានសំណូមពរដល់ប្រជាពលរដ្ឋអោយមានការប្រុងប្រយ័ត្នខ្ពស់ចំពោះករណីឆបោកតាមប្រព័ន្ធអនឡាញ (Scam Online) ក្នុងមូលដ្ឋានរបស់យើងព្រោះសកម្មភាពឆបោកតាមរយៈប្រព័ន្ធអនឡាញបានបង្កឱ្យមានការបាត់បង់ទ្រព្យសម្បត្តិ និងប៉ះពាល់ដល់សន្តិសុខផ្ទាល់ខ្លួនរបស់បងប្អូនប្រជាពលរដ្ឋ។

ឯកឧត្តមបានបន្ថែមថា ការជួលផ្ទះឬបន្ទប់ឱ្យជនបរទេសស្នាក់នៅ គឺជាប្រភពចំណូលដ៏ល្អមួយសម្រាប់បងប្អូនប្រជាពលរដ្ឋ ប៉ុន្តែវាក៏តម្រូវឱ្យមានការយកចិត្តទុកដាក់ និងការប្រុងប្រយ័ត្នខ្ពស់ផ្នែកសន្តិសុខផងដែរ។ ដើម្បីចូលរួមបង្ការបទល្មើសផ្សេងៗ និងរក្សាសុវត្ថិភាពសង្គម បងប្អូនម្ចាស់ផ្ទះគួរទៅរាយការណ៍ទៅកាន់ប៉ុស្តិ៍នគរបាលរដ្ឋបាលដែលនៅជិតបំផុត ឬអាជ្ញាធរមូលដ្ឋានការចូលរួមរបស់បងប្អូន គឺជាផ្នែកមួយដ៏សំខាន់ក្នុងការរក្សាសន្តិសុខ សណ្តាប់ធ្នាប់សាធារណៈ និងបង្ការបទល្មើសឆ្លងដែនផ្សេងៗ។

ឯកឧត្តមបានសង្កត់ធ្ងន់ថា បច្ចុប្បន្នបញ្ហាគ្រឿងញៀន និងល្បែងស៊ីសងគ្រប់ប្រភេទ នៅតែជាបញ្ហាប្រឈមដ៏ធំដែលទាមទារឱ្យមានការយកចិត្តទុកដាក់ខ្ពស់ និងការបង្ក្រាបឱ្យមានប្រសិទ្ធភាពពីសំណាក់អាជ្ញាធរមូលដ្ឋានដែលជាកម្លាំងជួរមុខមានតួនាទីយ៉ាងសំខាន់ត្រូវក្តាប់ឱ្យជាប់នូវមុខសញ្ញាដែលពាក់ព័ន្ធនឹងការចែកចាយ ប្រើប្រាស់គ្រឿងញៀន និងទីតាំងល្បែងស៊ីសងខុសច្បាប់ក្នុងមូលដ្ឋាន។ត្រូវចាត់វិធានការបង្ក្រាបដោយគ្មានការយោគយល់ ឬការយឺតយ៉ាវ ចំពោះទីតាំងណាដែលលួចលាក់បើកល្បែងស៊ីសង ឬកន្លែងជួញដូរគ្រឿងញៀន និងបន្តជំរុញការអប់រំដល់ប្រជាពលរដ្ឋ ជាពិសេសយុវជន ឱ្យយល់ដឹងពីផលវិបាកនៃល្បែងស៊ីសង និងគ្រឿងញៀន តាមរយៈគោលនយោបាយ «ភូមិ-ឃុំ សង្កាត់ មានសុវត្ថិភាព»។

ក្នុងឱកាសនោះ ឯកឧត្តម ហាក់ សុខមករា បានអំពាវនាវដល់បងប្អូនដែលទទួលបានប័ណ្ណកម្មសិទ្ធដីធ្លីត្រូវទុកដាក់ និងថែរក្សាឱ្យបានត្រឹមត្រូវព្រោះប័ណ្ណកម្មសិទ្ធិគឺជាឯកសារមរតក និងជាទ្រព្យសំខាន់ បងប្អូនប្រជាពលរដ្ឋអាចប្រើប្រាស់ប័ណ្ណនេះដើម្បីដាក់បញ្ចាំនៅធនាគារ ឬគ្រឹះស្ថានមីក្រូហិរញ្ញវត្ថុស្របច្បាប់ ដើម្បីទទួលបានទុនយកមកប្រកបរបរទទួលទាន ដើម្បីបង្កើនជីវភាពក្នុងគ្រួសារ៕