មន្ត្រី២៣៧នាក់ ទទួលមេដាយសំរឹទ្ធការងារ ឯកឧត្តមបណ្ឌិត កៅ ថាច លើកសរសើរខ្ពស់ និងជំរុញបន្តបម្រើប្រជាជនដោយវិជ្ជាជីវៈ

(កណ្តាល)៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម និងជាអនុប្រធានក្រុមការងាររាជរដ្ឋាភិបាលចុះជួយមូលដ្ឋានស្រុកខ្សាច់កណ្តាល នៅព្រឹកថ្ងៃទី២ ខែមេសា ឆ្នាំ២០២៦នេះ បានអញ្ជើញជាអធិបតីភាពក្នុងពិធីបំពាក់មេដាយសំរឹទ្ធការងារ ជូនមន្ត្រីរាជការ និងមន្ត្រីជាប់កិច្ចសន្យានៃរដ្ឋបាលស្រុកខ្សាច់កណ្តាល ចំនួន ២៣៧នាក់ ដែលបានខិតខំប្រឹងប្រែងបំពេញភារកិច្ចដោយស្មោះត្រង់ និងមានប្រសិទ្ធភាពខ្ពស់។

មន្ត្រីដែលទទួលបានការបំពាក់មេដាយសំរឹទ្ធនេះ គឺជាអ្នកដែលបានបំពេញការងារលើសពី១០ឆ្នាំ និងមិនធ្លាប់ទទួលបានគ្រឿងឥស្សរិយយសកន្លងមកឡើយ។ ពិធីនេះក៏មានការចូលរួមពីលោក ចេង ឌីណា អភិបាលនៃគណៈអភិបាលស្រុកខ្សាច់កណ្តាល រួមទាំងក្រុមប្រឹក្សាស្រុក មន្ត្រីរាជការ បុគ្គលិកអប់រំ និងគ្រូបង្រៀន សរុបប្រមាណ ២៥០នាក់។

ក្នុងឱកាសនោះ ឯកឧត្តមបណ្ឌិត កៅ ថាច បានថ្លែងកោតសរសើរ និងវាយតម្លៃខ្ពស់ចំពោះការខិតខំបំពេញការងាររបស់មន្ត្រីរាជការនៅមូលដ្ឋាន ដែលបានលះបង់ពេលវេលា និងកម្លាំងកាយចិត្ត ដើម្បីបម្រើប្រជាពលរដ្ឋ ដោយសម្រេចបានសមិទ្ធផលជាច្រើន ដូចជា ការផ្តល់សេវាសាធារណៈប្រកបដោយប្រសិទ្ធភាព ការដោះស្រាយបញ្ហាប្រឈមជូនប្រជាពលរដ្ឋ និងការរក្សាបានសន្តិសុខ សុវត្ថិភាព និងសណ្តាប់ធ្នាប់សង្គម។

ឯកឧត្តមបណ្ឌិតបានបញ្ជាក់ថា ពិធីបំពាក់មេដាយនៅថ្ងៃនេះ គឺជាការទទួលស្គាល់ស្នាដៃ និងគុណបំណាច់ដ៏មានតម្លៃរបស់មន្ត្រីរាជការ និងមន្ត្រីជាប់កិច្ចសន្យា ដែលបានបំពេញភារកិច្ចដោយមិនខ្លាចការនឿយហត់ ជម្នះឧបសគ្គគ្រប់បែបយ៉ាង និងលះបង់ខ្ពស់ ដើម្បីបម្រើជាតិ និងប្រជាជន។

ជាមួយគ្នានេះ ឯកឧត្តមបណ្ឌិត ក៏បានផ្តល់អនុសាសន៍សំខាន់ៗ ដោយណែនាំឱ្យមន្ត្រីរាជការទាំងអស់ ត្រូវបន្តបំពេញភារកិច្ចដោយឆន្ទៈ និងមនសិការ ចុះជាប់ជាមួយប្រជាពលរដ្ឋនៅមូលដ្ឋាន ដើម្បីស្តាប់ និងដោះស្រាយបញ្ហាប្រឈមនានា ប្រកបដោយយុត្តិធម៌ និងមានប្រសិទ្ធភាព។ ការសម្រេចចិត្តគ្រប់ករណី ត្រូវផ្អែកលើកត្តាសំខាន់៣ គឺ វិចារវិទ្យា ប្រវត្តិសាស្ត្រ និងឡូស៊ិក។

ឯកឧត្តមបណ្ឌិត កៅ ថាច ក៏បានរំលឹកថា មន្ត្រីរាជការត្រូវតែបំពេញតួនាទីឲ្យបានល្អ ប្រកាន់ខ្ជាប់វិជ្ជាជីវៈ និងសីលធម៌ ជាគំរូល្អសម្រាប់យុវជនជំនាន់ក្រោយ ព្រមទាំងបន្តពង្រឹងសាមគ្គីភាពផ្ទៃក្នុង ឲ្យកាន់តែរឹងមាំ ដើម្បីបម្រើប្រជាជន និងជំរុញការអភិវឌ្ឍន៍ស្រុកខ្សាច់កណ្តាល ឲ្យកាន់តែរីកចម្រើនបន្ថែមទៀត៕