ក្តៅៗ! គម្រោងហ្វូណនតេជោ កំណាត់ទី២ ត្រៀមបើកការដ្ឋាន ឧបនាយករដ្ឋមន្ត្រី ស៊ុន ចាន់ថុល ចុះពិនិត្យទីតាំងផ្ទាល់នៅតាកែវ

(តាកែវ)៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានអចិន្ត្រៃយ៍គណៈកម្មាធិការពិសេស នារសៀលថ្ងៃព្រហស្បតិ៍ ទី២ ខែមេសា ឆ្នាំ២០២៦នេះ ចុះពិនិត្យផ្ទៀងផ្ទាត់ទីតាំងត្រៀមរៀបចំពិធីបើកការដ្ឋានសាងសង់គម្រោងគ្រប់គ្រងធនធានទឹកចម្រុះហ្វូណនតេជោ កំណាត់ទី២។មានការអញ្ជើញអមដំណើរដោយឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានលេខាធិការដ្ឋានគណៈកម្មាធិការពិសេសនិងឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម រួមជាមួយថ្នាក់ដឹកនាំជាន់ខ្ពស់ជាច្រើនរូបទៀត។

ទីតាំងគម្រោងស្ថិតនៅភូមិត្រើយឃ្លោក ឃុំដូងខ្ពស់ ស្រុកបូរីជលសារ ខេត្តតាកែវ ដោយមានការចូលរួមពីថ្នាក់ដឹកនាំក្រសួង-ស្ថាប័នពាក់ព័ន្ធ ក្រុមហ៊ុនសាងសង់ និងមន្ត្រីជំនាញជាច្រើនរូប ដែលបានចុះពិនិត្យលម្អិតលើស្ថានភាពទីតាំង និងការត្រៀមរៀបចំបច្ចេកទេស មុនដំណើរការបើកការដ្ឋានជាផ្លូវការ។

ការចុះពិនិត្យនេះ មានគោលបំណងធានាថា ការរៀបចំទាំងអស់មានភាពរួចរាល់ ត្រឹមត្រូវ និងស្របតាមផែនការដែលបានកំណត់ ដើម្បីធានាបាននូវការអនុវត្តគម្រោងឲ្យមានប្រសិទ្ធភាព និងគុណភាពខ្ពស់។

គួរបញ្ជាក់ថា គម្រោងគ្រប់គ្រងធនធានទឹកចម្រុះហ្វូណនតេជោ កំណាត់ទី២ នឹងត្រូវបើកការដ្ឋានសាងសង់ជាផ្លូវការ នៅថ្ងៃទី១១ ខែមេសា ឆ្នាំ២០២៦ ខាងមុខនេះ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

គម្រោងដ៏សំខាន់នេះ ត្រូវបានរំពឹងថា នឹងរួមចំណែកយ៉ាងសំខាន់ក្នុងការគ្រប់គ្រងធនធានទឹក បង្កើនប្រសិទ្ធភាពប្រព័ន្ធស្រោចស្រព កាត់បន្ថយហានិភ័យទឹកជំនន់ និងគាំទ្រការអភិវឌ្ឍន៍វិស័យកសិកម្ម និងសេដ្ឋកិច្ចនៅតំបន់ភាគត្បូងនៃប្រទេសឲ្យកាន់តែរីកចម្រើន៕