អាជ្ញាធរខេត្តកណ្តាលចុះរៀបចំសណ្តាប់ធ្នាប់ជុំវិញផ្សារគគីរ កាត់បន្ថយកកស្ទះ និងលើកសោភ័ណ្ឌភាពទីប្រជុំជន

(កណ្តាល)៖ អាជ្ញាធរខេត្តកណ្តាល ដឹកនាំដោយឯកឧត្តម ណុប ដារ៉ា អភិបាលរងខេត្ត បានចុះអនុវត្តវិធានការរៀបចំសណ្តាប់ធ្នាប់តាមដងផ្លូវជុំវិញបរិវេណផ្សារគគីរ ស្រុកកៀនស្វាយ នាព្រឹកថ្ងៃទី១ ខែមេសា ឆ្នាំ២០២៦ ក្នុងគោលបំណងពង្រឹងសណ្តាប់ធ្នាប់សាធារណៈ និងលើកកម្ពស់សោភ័ណ្ឌភាពទីប្រជុំជនឱ្យកាន់តែប្រសើរ។

ក្នុងប្រតិបត្តិការនេះ អាជ្ញាធរ បានផ្តោតលើការរៀបចំទីតាំងលក់ដូរ ដែលរំលោភលើចិញ្ចើមផ្លូវ ការចតយានយន្តគ្មានសណ្តាប់ធ្នាប់ និងការកែលម្អអនាម័យបរិស្ថាន។ អាជីវករដែលដាក់តាំងទំនិញ ឬស្លាកយីហោលយចូលចំណីផ្លូវសាធារណៈ ត្រូវបានណែនាំឱ្យរុះរើជាបន្ទាន់ ដើម្បីធានាភាពរលូននៃចរាចរណ៍ និងសុវត្ថិភាពសាធារណៈ។

ឯកឧត្តម ណុប ដារ៉ា បានបញ្ជាក់ថា វិធានការនេះមានគោលដៅកាត់បន្ថយការកកស្ទះជុំវិញតំបន់ផ្សារ ដែលបណ្តាលមកពីការចតយានយន្តមិនមានរបៀបរៀបរយ និងការលក់ដូររំលោភលើផ្លូវសាធារណៈ ព្រមទាំងជំរុញឱ្យមានការគ្រប់គ្រងសំរាមឱ្យបានត្រឹមត្រូវ។

ប្រជាពលរដ្ឋ និងអ្នកធ្វើដំណើរឆ្លងកាត់តំបន់នេះ បានបង្ហាញការគាំទ្រយ៉ាងច្បាស់លាស់ ចំពោះសកម្មភាពរបស់អាជ្ញាធរ ដោយពួកគេយល់ថា ការរៀបចំសណ្តាប់ធ្នាប់មិនត្រឹមតែធ្វើឱ្យផ្លូវមានភាពទូលាយទេ ប៉ុន្តែថែមទាំងជួយកាត់បន្ថយហានិភ័យគ្រោះថ្នាក់ចរាចរណ៍ និងធ្វើឱ្យបរិយាកាសលក់ដូរមានភាពងាយស្រួលជាងមុនផងដែរ។

ជាមួយគ្នានេះ អាជ្ញាធរ បានអំពាវនាវដល់អាជីវករទាំងអស់ បន្តសហការជាមួយសមត្ថកិច្ច ដោយមិនត្រូវត្រឡប់មករំលោភលើចិញ្ចើមផ្លូវវិញឡើយ បន្ទាប់ពីការរៀបចំរួចរាល់។ អាជ្ញាធរ នឹងបន្តតាមដាន និងចុះត្រួតពិនិត្យជាប្រចាំ ដើម្បីធានាប្រសិទ្ធភាពនៃវិធានការនេះឱ្យបានយូរអង្វែង។

សកម្មភាពនេះ បញ្ជាក់ពីការយកចិត្តទុកដាក់របស់រដ្ឋបាលខេត្ត ក្នុងការកែលម្អសណ្តាប់ធ្នាប់ សោភ័ណ្ឌភាព និងគុណភាពជីវិតប្រជាពលរដ្ឋឱ្យកាន់តែប្រសើរឡើង៕