អំណោយមនុស្សធម៌បន្តឆ្លុះបញ្ចាំង! ផ្ទះទេវតា១ខ្នង ជាមួយអណ្ដូងទឹក និងភ្លើងសូឡា ប្រគល់ជូនលោកយាយទុគតជន នៅខេត្តកំពង់ធំ

(កំពង់ធំ)៖ នៅព្រឹកថ្ងៃទី១ ខែមេសា ឆ្នាំ២០២៦ លោកជំទាវ ហ៊ុន ម៉ាណា អគ្គនាយិកាវិទ្យុ-ទូរទស្សន៍បាយ័ន បានអញ្ជើញចូលរួមប្រគល់ផ្ទះទេវតាចំនួន១ខ្នង ជូនលោកយាយ ឡៃ នឿន អាយុ ៦៧ឆ្នាំ ដែលមានជីវភាពខ្វះខាត រស់នៅភូមិក្របៅ ឃុំដូង ស្រុកប្រាសាទបល្ល័ង្ក ខេត្តកំពង់ធំ។

ផ្ទះទេវតាដែលត្រូវបានប្រគល់ជូននេះ ជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្ដេចគតិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងសម្ដេចធិបតី ហ៊ុន ម៉ាណែត និងលោកជំទាវ ពេជ ចន្ទមុន្នី ហ៊ុនម៉ាណែត ដែលតែងតែយកចិត្តទុកដាក់ចំពោះសុខទុក្ខប្រជាពលរដ្ឋគ្រប់ទីកន្លែង។

លោកយាយ ឡៃ នឿន ជាស្ត្រីមេម៉ាយ មិនមានប្តី ហើយបច្ចុប្បន្នរស់នៅជាមួយចៅស្រីអាយុ៨ឆ្នាំ ក្នុងស្ថានភាពលំបាក។ ការទទួលបានផ្ទះថ្មីនេះ បានជួយលើកកម្ពស់ជីវភាព និងផ្តល់ក្តីសង្ឃឹមថ្មីដល់គ្រួសាររបស់លោកយាយ។

ក្រៅពីផ្ទះសម្បែង អំណោយក៏រួមមានអណ្ដូងទឹកស្អាត ប្រព័ន្ធទឹកប្រើប្រាស់ និងការតំឡើងភ្លើងសូឡាទាំងខាងក្នុង និងខាងក្រៅផ្ទះ ដែលជាដំណោះស្រាយប្រកបដោយចីរភាព សម្រាប់ជីវិតប្រចាំថ្ងៃ។

ក្នុងឱកាសនោះ លោកជំទាវ ហ៊ុន ម៉ាណា បានពាំនាំនូវការសួរសុខទុក្ខ និងសារផ្តាំផ្ញើពីសំណាក់ថ្នាក់ដឹកនាំកំពូល ដែលតែងតែគិតគូរអំពីសុខុមាលភាពប្រជាពលរដ្ឋ ដោយមិនប្រកាន់ទីកន្លែង ឬពេលវេលា។

បន្ថែមពីនេះ លោកជំទាវក៏បានផ្តល់ជូនអំណោយជាច្រើនរួមមាន សម្ភារៈប្រើប្រាស់ប្រចាំថ្ងៃ អាហារ សម្ភារៈផ្ទះបាយ សម្លៀកបំពាក់ ថ្នាំពេទ្យ និងថវិកា ដើម្បីជួយសម្រួលជីវភាពរស់នៅ។

បន្ទាប់ពីពិធីប្រគល់ផ្ទះ លោកជំទាវបានបន្តអញ្ជើញទៅកាន់សាលាបឋមសិក្សាហ៊ុនសែន ក្របៅ ដើម្បីជួបសិស្សានុសិស្សចំនួន ៥៨៣នាក់ និងចែកជូនកាតាបសិក្សា ដែលជាអំណោយពីថ្នាក់ដឹកនាំដដែល។

ជាមួយគ្នានេះ ដោយយល់ឃើញពីតម្រូវការពិតប្រាកដក្នុងវិស័យអប់រំ លោកជំទាវបានសម្រេចគាំទ្រការសាងសង់អគារសិក្សាចំនួន២ខ្នង សរុប១០បន្ទប់ និងបន្ទប់ទឹក ជាចំណងដៃសម្រាប់លោកគ្រូអ្នកគ្រូ និងសិស្សានុសិស្សនៅតំបន់នេះ។

សកម្មភាពមនុស្សធម៌នេះ ត្រូវបានចាត់ទុកថា ជាការចូលរួមដ៏សំខាន់ក្នុងការកាត់បន្ថយភាពក្រីក្រ លើកកម្ពស់សុខុមាលភាពសង្គម និងជំរុញអនាគតយុវជនកម្ពុជា ឲ្យកាន់តែប្រសើរឡើងជាបន្តបន្ទាប់៕