«សប្បាយក្លាយជាទុក្ខ»៖ ពាក្យដាស់តឿនពីថ្នាក់ដឹកនាំ ជាមេរៀនសង្គមសម្រាប់យុវជន និងមាតាបិតា

(ភ្នំពេញ)៖ នៅថ្ងៃទី១ ខែមេសា ឆ្នាំ២០២៦ ឯកឧត្តម ជុំ កុសល់ រដ្ឋលេខាធិការក្រសួងព័ត៌មាន បានបង្ហោះសារតាមបណ្ដាញសង្គម ដោយបង្ហាញការសោកស្តាយយ៉ាងខ្លាំងចំពោះហេតុការណ៍មួយដែលពាក់ព័ន្ធនឹងយុវជនវ័យក្មេង ដែលបានបង្កឲ្យ «សប្បាយក្លាយជាទុក្ខ» ទាំងសម្រាប់ខ្លួនឯង និងគ្រួសារ។

ឯកឧត្តមបានលើកឡើងថា ករណីនេះគួរឲ្យអាណិត និងគួរឲ្យសោកស្តាយ ព្រោះជាបុគ្គលវ័យក្មេងដែលមានសំណាងកើតក្នុងគ្រួសារដែលមានស្ថានភាពល្អ មានកិត្តិយស និងសក្តានុពលគ្រប់គ្រាន់ ប៉ុន្តែវិញទៀត មិនអាចរក្សាតម្លៃ និងអត្តសញ្ញាណឲ្យសមនឹងកិត្តិយសគ្រួសារបាន។

ជាមួយគ្នានេះ ឯកឧត្តមបានបញ្ជាក់ថា ទុក្ខដែលកើតឡើងមិនត្រឹមតែប៉ះពាល់ដល់បុគ្គលនោះប៉ុណ្ណោះទេ ប៉ុន្តែបានប៉ះពាល់ដល់គ្រួសារទាំងមូល និងបន្សល់ទុកវិប្បដិសារីអស់មួយជីវិត។ ហេតុការណ៍នេះត្រូវបានចាត់ទុកថា ជាមេរៀនដ៏សំខាន់សម្រាប់កូនៗអ្នកមាន អ្នកមានអំណាចមួយចំនួន ដែលងាយរងឥទ្ធិពលនៃអំណាច និងទ្រព្យសម្បត្តិ រហូតភ្លេចខ្លួន និងធ្វើអំពើមិនសមរម្យក្នុងសង្គម។

ឯកឧត្តមក៏បានដាស់តឿនដល់យុវជនទាំងឡាយឲ្យមានការយល់ដឹង បើកភ្នែក បើកចិត្ត មើលឃើញតម្លៃពិតនៃជីវិត និងសង្គម ជៀសវាងការរស់នៅដោយភាពភ្លើតភ្លើន ឬគិតថាខ្លួនឯងលើសគេ។ ព្រមទាំងបានរំលឹកដល់មាតាបិតាមួយចំនួន ដែលមានសម្បត្តិ និងអំណាច ឲ្យពិចារណាឡើងវិញអំពីការអប់រំកូន កុំឲ្យការទំយើកូនហួសហេតុ ក្លាយជាមូលហេតុនាំទៅរកវិបត្តិនាពេលក្រោយ។

ឯកឧត្តមបានបង្ហាញមោទនភាពចំពោះការអប់រំកូនដោយគន្លងធម៌ ទោះបីជាមិនមានសម្បត្តិសម្បូរបែបក៏ដោយ ប៉ុន្តែកូនអាចឈរលើជើងខ្លួនឯង មានការខិតខំប្រឹងប្រែង និងរស់នៅដោយកិត្តិយសយ៉ាងពេញលេញ។

ប្រសាសន៍របស់ឯកឧត្ដមចង់បង្ហាញឲ្យឃើញថា ការអប់រំ និងតម្លៃសីលធម៌នៅក្នុងគ្រួសារ គឺជាគ្រឹះដ៏សំខាន់បំផុតក្នុងការបង្កើតមនុស្សល្អសម្រាប់សង្គម មិនមែនជាការពឹងផ្អែកលើទ្រព្យសម្បត្តិ ឬអំណាចតែប៉ុណ្ណោះឡើយ៕