កម្ពុជាបន្តពង្រឹងសមត្ថភាពបង្ក្រាប “Online Scams”៖ រយៈពេល៩ខែ បង្ក្រាបជាង២៥០ករណី និងបណ្តេញជនបរទេសជាង១១,០០០នាក់

(ភ្នំពេញ)៖ ឯកឧត្តមសន្តិបណ្ឌិត ឆៃ ស៊ីណារិទ្ធ ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានប្រចាំការ នៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) បានជម្រាបជូនថ្នាក់ដឹកនាំ និងសមាជិកសមាជិកាព្រឹទ្ធសភា និងរដ្ឋសភា នៃព្រះរាជាណាចក្រកម្ពុជាថា ក្នុងរយៈពេល៩ខែចុងក្រោយ ចាប់ពីខែកក្កដា ឆ្នាំ២០២៥ ដល់ខែមីនា ឆ្នាំ២០២៦ សមត្ថកិច្ចកម្ពុជាបានបង្ក្រាបអំពើឆបោកតាមប្រព័ន្ធបច្ចេកវិទ្យា បានចំនួនជាង២៥០ករណី និងបានកសាងសំណុំរឿងបញ្ជូនទៅតុលាការ ចំនួន៨០ករណី ពាក់ព័ន្ធជនសង្ស័យប្រមាណ៧៥០នាក់ ដែលមានសញ្ជាតិចម្រុះ រួមមាន ចិន ថៃ វៀតណាម ជប៉ុន កូរ៉េខាងត្បូង សិង្ហបុរី និងខ្មែរ។

ការបញ្ជាក់នេះធ្វើឡើងក្នុងឱកាសដែលឯកឧត្តម ដឹកនាំប្រតិភូនៃលេខាធិការដ្ឋានគ.ប.ឆ.ប. ចូលរួមកិច្ចប្រជុំស្តីពី «ការបោសសម្អាតការឆបោកតាមប្រព័ន្ធបច្ចេកវិទ្យា (Online Scams) នៅកម្ពុជា» ក្រោមអធិបតីភាពដ៏ខ្ពង់ខ្ពស់របស់ឯកឧត្តម ធន់ វឌ្ឍនា អនុប្រធានទី២ ព្រឹទ្ធសភា នៅព្រឹកថ្ងៃទី១ ខែមេសា ឆ្នាំ២០២៦ នៅវិមានសាមគ្គីភាព នៃព្រឹទ្ធសភា ដោយមានការចូលរួមសរុបចំនួន២១៣នាក់។

ឯកឧត្តមសន្តិបណ្ឌិត ឆៃ ស៊ីណារិទ្ធ បានបញ្ជាក់បន្ថែមថា ក្នុងប្រតិបត្តិការបោសសម្អាតទូទាំងប្រទេសក្នុងរយៈពេលដូចគ្នា សមត្ថកិច្ចបានបណ្តេញជនបរទេសចំនួនជាង១១,០០០នាក់ ដែលពាក់ព័ន្ធនឹងសកម្មភាពឆបោកអនឡាញ ដោយរួមមានសញ្ជាតិចិន វៀតណាម ឥណ្ឌូណេស៊ី មីយ៉ាន់ម៉ា ប៉ាគីស្ថាន និងថៃ។ ជាមួយគ្នានេះ អាជ្ញាធរបានបន្តចុះត្រួតពិនិត្យទីតាំងសង្ស័យជាង១០,០០០កន្លែង នៅតាមបណ្តារាជធានី-ខេត្ត ដែលមានវត្តមានជនបរទេសប្រមាណ៨០,០០០នាក់ ពី៧៨សញ្ជាតិ ស្នាក់នៅ។

បើយោងតាមការវាយតម្លៃរបស់អាជ្ញាធរ បច្ចុប្បន្នក្រុមឧក្រិដ្ឋជនឆបោកអនឡាញ បានផ្លាស់ប្តូរយុទ្ធសាស្ត្រពីការប្រមូលផ្តុំគ្នានៅកាស៊ីណូ ឬអគារធំៗ មកជាការបំបែកជាក្រុមតូចៗ ដោយលាក់ខ្លួននៅតាមបុរី ផ្ទះល្វែង និងខុនដូ ក្នុងគោលបំណងគេចវាងការតាមចាប់ពីសមត្ថកិច្ច។

ជាមួយគ្នានេះ ឯកឧត្តមក៏បានបង្ហាញអំពីទម្រង់ឆបោកសំខាន់ៗ ដែលរួមមាន ការបោកប្រាស់តាមរយៈការបង្កើតទំនាក់ទំនងស្នេហា (Romance Scam) ការបញ្ឆោតឱ្យវិនិយោគដើម្បីទទួលផលចំណេញខ្ពស់ ការប្រើប្រាស់កម្មវិធីឈ្នះរង្វាន់ ដើម្បីបន្លំឱ្យផ្ទេរប្រាក់ ការលួចយកទិន្នន័យឯកជន និងការផ្សព្វផ្សាយការងារប្រាក់ខែខ្ពស់ជាធ្នាក់ជាដើម។

ដើម្បីពង្រឹងប្រសិទ្ធភាព និងធានានិរន្តរភាពក្នុងការប្រយុទ្ធប្រឆាំងបទល្មើសបច្ចេកវិទ្យា រាជរដ្ឋាភិបាលកម្ពុជាបានរៀបចំសេចក្តីព្រាងច្បាប់ស្តីពីការប្រឆាំងបទល្មើសបច្ចេកវិទ្យា ដែលត្រូវបានរដ្ឋសភាអនុម័តកាលពីថ្ងៃទី៣០ ខែមីនា ឆ្នាំ២០២៦ ហើយគ្រោងនឹងដាក់ឱ្យព្រឹទ្ធសភាពិនិត្យអនុម័តបន្ត នាពេលឆាប់ៗខាងមុខ។ រាជរដ្ឋាភិបាលជឿជាក់ថា ច្បាប់នេះនឹងក្លាយជាមូលដ្ឋានច្បាប់សំខាន់ក្នុងការទប់ស្កាត់ និងបង្ក្រាបឧក្រិដ្ឋកម្មឌីជីថលឱ្យមានប្រសិទ្ធភាពខ្ពស់។

ក្នុងឱកាសនោះដែរ ឯកឧត្តម ធន់ វឌ្ឍនា អនុប្រធានទី២ ព្រឹទ្ធសភា បានសម្តែងការគាំទ្រខ្ពស់ចំពោះចំណាត់ការរបស់រាជរដ្ឋាភិបាលក្នុងការបង្ក្រាបអំពើឆបោកអនឡាញ ដែលបានទទួលស្គាល់ពីអន្តរជាតិ និងបានរួមចំណែកស្ដារមុខមាត់ប្រទេសជាតិឡើងវិញ។ ឯកឧត្តមបានបញ្ជាក់ថា បញ្ហាឆបោកអនឡាញ គឺជាបញ្ហាសកល ដែលប្រទេសជាច្រើនកំពុងប្រឈម មិនមែនមានតែប្រទេសកម្ពុជាប៉ុណ្ណោះឡើយ។

ជាមួយគ្នានេះ កិច្ចប្រជុំក៏បានផ្តល់វេទិកាសំខាន់សម្រាប់សមាជិកព្រឹទ្ធសភា និងរដ្ឋសភា ក្នុងការប្តូរយោបល់ លើកឡើងសំណួរ និងចែករំលែកបទពិសោធន៍ ដើម្បីរួមចំណែកស្វែងរកដំណោះស្រាយប្រសើរឡើងសម្រាប់ការប្រយុទ្ធប្រឆាំងឧក្រិដ្ឋកម្មឆ្លងដែននេះ។

សូមរំលឹកថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានប្តេជ្ញាចិត្តយ៉ាងមុតមាំក្នុងការបោសសម្អាតបទល្មើសឆបោកតាមប្រព័ន្ធបច្ចេកវិទ្យាឱ្យអស់ពីកម្ពុជា ត្រឹមខែមេសា ឆ្នាំ២០២៦ ដោយបានបញ្ជាក់ថា កម្ពុជាមិនមែនជាទីកន្លែងសម្រាប់ឧក្រិដ្ឋជនបច្ចេកវិទ្យាប្រើប្រាស់ប្រព្រឹត្តបទល្មើសឡើយ ហើយអ្នកពាក់ព័ន្ធទាំងអស់ នឹងត្រូវទទួលខុសត្រូវតាមច្បាប់យ៉ាងតឹងរឹង ដោយគ្មានការលើកលែង៕