ឆែកឆេររឹតបន្តឹងសន្តិសុខក្នុងពន្ធនាគារ! អាជ្ញាធរខេត្តស្វាយរៀងចាត់វិធានការក្តៅ ដកហូតវត្ថុហាមឃាត់ក្នុងអគារឃុំបុរស!

(ស្វាយរៀង)៖ ដើម្បីពង្រឹងសុវត្ថិភាព និងធានាការគ្រប់គ្រងមានប្រសិទ្ធភាពក្នុងពន្ធនាគារ លោកឧត្តមអគ្គានុរក្សថ្នាក់លេខ៣ គង់ សំអាត ប្រធានពន្ធនាគារខេត្តស្វាយរៀង បានចង្អុលបង្ហាញឱ្យអនុវត្តវិធានការឆែកឆេរយ៉ាងតឹងរឹង នៅក្នុងបរិវេណអគារឃុំបុរស។

ក្រោមការដឹកនាំដោយលោកឧត្តមអគ្គានុរក្សថ្នាក់លេខ៣ អ៊ុំ រ៉ាយឿង អនុប្រធានពន្ធនាគារ ទទួលបន្ទុកការិយាល័យប្រតិបត្តិ កម្លាំងមន្រ្តីការិយាល័យសន្តិសុខ និងការិយាល័យជំនាញទាំង៥ បានចូលរួមអនុវត្តប្រតិបត្តិការឆែកឆេរតាមបន្ទប់នីមួយៗ ដោយផ្តោតលើការពិនិត្យស្វែងរក និងដកហូតវត្ថុហាមឃាត់ដែលអាចបង្កហានិភ័យដល់សន្តិសុខក្នុងពន្ធនាគារ។

ប្រតិបត្តិការនេះបានប្រព្រឹត្តឡើងនៅថ្ងៃទី០១ ខែមេសា ឆ្នាំ២០២៦ ក្នុងបរិវេណពន្ធនាគារខេត្តស្វាយរៀង ដោយអនុវត្តតាមនីតិវិធីយ៉ាងម៉ឺងម៉ាត់ មានវិន័យ និងគោរពតាមស្តង់ដារអនុវត្តការងាររបស់វិស័យពន្ធនាគារ។

អាជ្ញាធរបានបញ្ជាក់ថា ការឆែកឆេរប្រចាំនេះ គឺជាវិធានការសំខាន់ក្នុងការការពារ និងទប់ស្កាត់សកម្មភាពល្មើសផ្សេងៗ បង្កើនសុវត្ថិភាព និងរក្សារបៀបរបបក្នុងពន្ធនាគារ ឱ្យស្របតាមគោលការណ៍ច្បាប់ និងសិទ្ធិមនុស្ស។

រូបភាព៖ ពន្ធនាគារខេត្តស្វាយរៀង