សន្និសីទជំរុញកំណើនសេដ្ឋកិច្ចតាមវិស័យភស្តុភារកម្ម៖ កម្ពុជា បន្តពង្រឹងសមត្ថភាពប្រកួតប្រជែងក្នុងតំបន់

(ភ្នំពេញ)៖ នៅព្រឹកថ្ងៃពុធ ទី១ ខែមេសា ឆ្នាំ២០២៦ នៅទីស្នាក់ការ ក្រុមប្រឹក្សាអភិវឌ្ឍន៍កម្ពុជា (ក.អ.ក.) ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក.អ.ក. រួមជាមួយលោក Tassilo Bronzer ប្រធានសភាពាណិជ្ជកម្មអឺរ៉ុបប្រចាំកម្ពុជា (EuroCham) បានអញ្ជើញជាសហធិបតី ក្នុងសន្និសីទស្តីពី «ការជំរុញកំណើនសេដ្ឋកិច្ចតាមរយៈវិស័យភស្តុភារកម្ម»។

សន្និសីទនេះ ត្រូវបានរៀបចំឡើងក្រោមកិច្ចសហការរវាង ក.អ.ក. សភាពាណិជ្ជកម្មអឺរ៉ុបប្រចាំកម្ពុជា (EuroCham) និងគណៈកម្មាធិការដឹកជញ្ជូន និងភស្តុភារកម្ម ដោយមានការចូលរួមពីតំណាងស្ថាប័នជាតិ និងអន្តរជាតិជាច្រើន ទាំងផ្ទាល់ និងតាមប្រព័ន្ធអនឡាញ រួមមាន EuroCham ប្រចាំនៅប្រទេសវៀតណាម មីយ៉ាន់ម៉ា សិង្ហបុរី ម៉ាឡេស៊ី និងឡាវ ព្រមទាំងក្រុមប្រឹក្សាធុរកិច្ចអឺរ៉ុប-អាស៊ាន (EU-ABC) និងភាគីពាក់ព័ន្ធផ្សេងទៀត។

សន្និសីទដ៏មានសារៈសំខាន់នេះ ត្រូវបានរៀបចំឡើងក្នុងគោលបំណងយុទ្ធសាស្ត្រចម្បង៤ ចំណុច រួមមាន៖*ទី១ បង្ហាញពីវឌ្ឍនភាព និងសមិទ្ធផលនានា ដែលសម្រេចបានតាមរយៈការអនុវត្តឯកសារទស្សនាទានគោលនយោបាយរបស់កំពង់ផែស្វយ័តក្រុងព្រះសីហនុ (PAS Policy Paper)។*ទី២ រំលេចភាពជោគជ័យនៃគំរូកិច្ចសហការរវាងរាជរដ្ឋាភិបាល និងវិស័យឯកជន ក្នុងការអភិវឌ្ឍ និងលើកកម្ពស់គុណភាពហេដ្ឋារចនាសម្ព័ន្ធ និងសេវាភស្តុភារកម្ម។*ទី៣ បង្ហាញអំពីការធ្វើទំនើបកម្ម និងកំណែទម្រង់ស៊ីជម្រៅក្នុងវិស័យដឹកជញ្ជូនរបស់កម្ពុជា។
និង*ទី៤ ពង្រឹងសមត្ថភាពប្រកួតប្រជែងជាតិ តាមរយៈការលើកកម្ពស់ភាពលេចធ្លោរបស់កម្ពុជា ក្នុងនាមជា «មជ្ឈមណ្ឌលភស្តុភារកម្ម និងពាណិជ្ជកម្ម» ប្រកបដោយសក្តានុពលក្នុងតំបន់។

លើសពីនេះ សន្និសីទក៏បានដាក់ចេញនូវទិសដៅសំខាន់ៗ សម្រាប់ជំរុញការអភិវឌ្ឍវិស័យភស្តុភារកម្មរបស់កម្ពុជា ឱ្យកាន់តែទំនើប និងមានប្រសិទ្ធភាព។ ក្នុងនោះ រួមមានការផ្តល់ព័ត៌មានបច្ចុប្បន្នភាពអំពីការកែលម្អហេដ្ឋារចនាសម្ព័ន្ធកំពង់ផែស្វយ័តក្រុងព្រះសីហនុ ដែលកំពុងត្រូវបានជំរុញដោយកំណើននៃការនាំចេញ ការកំណែទម្រង់ក្នុងវិស័យដឹកជញ្ជូនបែបបញ្ជូនរហ័ស (Express Logistics) និងការសម្រួលនីតិវិធីគយ ព្រមទាំងការបង្កើនកិច្ចសម្របសម្រួលរវាងស្ថាប័នរដ្ឋ និងវិស័យឯកជន។

ជាមួយគ្នានេះ សន្និសីទក៏បានលើកទឹកចិត្តឱ្យមានការបន្តកិច្ចសន្ទនា និងពង្រឹងកិច្ចសហប្រតិបត្តិការឆ្លងដែន ជាមួយដៃគូក្នុងតំបន់ ដើម្បីបង្កើនប្រសិទ្ធភាពខ្សែច្រវាក់ផ្គត់ផ្គង់ និងលើកកម្ពស់សមត្ថភាពប្រកួតប្រជែងរបស់កម្ពុជា ក្នុងបរិបទសេដ្ឋកិច្ចសកល។

ជាលទ្ធផលរំពឹងទុក សន្និសីទនេះនឹងក្លាយជាកាតាលីករយ៉ាងសំខាន់ ក្នុងការលើកកម្ពស់ភាពលេចធ្លោរបស់វិស័យភស្តុភារកម្មកម្ពុជា នៅលើឆាកអន្តរជាតិ ពង្រឹងទំនុកចិត្តវិនិយោគិន និងដៃគូពាណិជ្ជកម្ម និងជំរុញកិច្ចសហប្រតិបត្តិការរវាងអាជ្ញាធរជាតិ ដៃគូអភិវឌ្ឍន៍ និងវិស័យឯកជន ដើម្បីគាំទ្រកំណើនសេដ្ឋកិច្ច-សង្គម ឱ្យកាន់តែរឹងមាំ និងមានភាពធន់ក្នុងអនាគត៕