បង្ក្រាបមិនដកដៃឡើយ! កម្លាំងអាវុធហត្ថកំពង់ស្ពឺចាប់ខ្លួនជនសង្ស័យ៥នាក់ ពាក់ព័ន្ធគ្រឿងញៀន បញ្ជូនតុលាការភ្លាមៗ

(កំពង់ស្ពឺ)៖ កម្លាំងជំនាញកងរាជអាវុធហត្ថខេត្តកំពង់ស្ពឺ បន្តអនុវត្តវិធានការយ៉ាងម៉ឺងម៉ាត់ ក្នុងការបង្ក្រាបបទល្មើសគ្រឿងញៀន ដោយបានធ្វើការឃាត់ខ្លួនជនសង្ស័យជាបន្តបន្ទាប់ និងបញ្ជូនទៅសាលាដំបូងខេត្ត ដើម្បីចាត់ការតាមនីតិវិធីច្បាប់។

ប្រតិបត្តិការនេះ ត្រូវបានអនុវត្តក្រោមបទបញ្ជាដ៏តឹងរ៉ឹងរបស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ និងមានការសម្របសម្រួលផ្នែកនីតិវិធីពីលោកព្រះរាជអាជ្ញា អមសាលាដំបូងខេត្តកំពង់ស្ពឺ។

ជាក់ស្តែង នៅវេលាម៉ោង៨:២២នាទីព្រឹក ថ្ងៃទី២៧ ខែមីនា ឆ្នាំ២០២៦ កម្លាំងមូលដ្ឋានកងរាជអាវុធហត្ថក្រុងច្បារមនបានបង្ក្រាប និងឃាត់ខ្លួនស្ត្រីជនសង្ស័យចំនួន២នាក់ ពាក់ព័ន្ធករណីគ្រឿងញៀន នៅចំណុចភូមិភ្នំដី សង្កាត់ច្បារមន ក្រុងច្បារមន។ ជនសង្ស័យរួមមាន៖ ប៊ីន ស្រីលាភ អាយុ ៣៧ឆ្នាំ និង សោម រក្សា អាយុ ៣០ឆ្នាំ ដែលមានមុខរបរមិនពិតប្រាកដ និងរស់នៅក្នុងក្រុងច្បារមន។

បន្តទៅទៀត នៅវេលាម៉ោង១១:២១នាទីព្រឹក ថ្ងៃដដែល កម្លាំងជំនាញបានពង្រីកការស្រាវជ្រាវ ដល់ផ្ទះសង្ស័យមួយកន្លែង ស្ថិតនៅភូមិសន្តិភាព ឃុំតាំងក្រួច ស្រុកសំរោងទង ដោយឃាត់ខ្លួនជនសង្ស័យបន្ថែមចំនួន ៣នាក់ រួមមាន៖ ប៊ុន គីមហាក់ អាយុ ៣៦ឆ្នាំ, ហួ គីមម៉េង អាយុ ២១ឆ្នាំ និង តូច តារ៉ា អាយុ ៣៣ឆ្នាំ។

ក្នុងប្រតិបត្តិការនេះ សមត្ថកិច្ចបានចាប់យកវត្ថុតាងសំខាន់ៗ រួមមាន ម្សៅក្រាមសថ្លាសង្ស័យជាសារធាតុញៀន ចំនួន ២កញ្ចប់ ទម្ងន់សរុប ១.៤៣ក្រាម រថយន្ត ១គ្រឿង ទូរស័ព្ទ ៥គ្រឿង ម៉ូតូ ២គ្រឿង ដែកកេះ ៤ និងឧបករណ៍ប្រើប្រាស់គ្រឿងញៀនមួយចំនួនទៀត។

បច្ចុប្បន្ន ជនសង្ស័យទាំង៥នាក់ រួមជាមួយវត្ថុតាង ត្រូវបានកម្លាំងជំនាញការិយាល័យប្រឆាំងគ្រឿងញៀន កសាងសំណុំរឿង បញ្ជូនទៅសាលាដំបូងខេត្តកំពង់ស្ពឺ ដើម្បីចាត់ការតាមនីតិវិធីច្បាប់៕