បង្ក្រាបបណ្តាញឆបោកអនឡាញ! អាជ្ញាធរភ្នំពេញឃាត់ខ្លួនជនជាតិវៀតណាម១៧នាក់ ពាក់ព័ន្ធសកម្មភាពលួចថតវីដេអូអាសអាភាស ដើម្បីជំរិតទារប្រាក់

(ភ្នំពេញ)៖ កម្លាំងជំនាញនៃគណៈបញ្ជាការឯកភាពរដ្ឋបាលរាជធានីភ្នំពេញ បានបើកប្រតិបត្តិការឆែកឆេរអគារ MSK ស្ថិតក្នុងសង្កាត់ទួលទំពូងទី១ ខណ្ឌចំការមន និងបានឃាត់ខ្លួនជនជាតិវៀតណាមចំនួន ១៧នាក់ (ស្រី ០២នាក់) ពាក់ព័ន្ធសកម្មភាពសង្ស័យឆបោកតាមប្រព័ន្ធបច្ចេកវិទ្យា។

ប្រតិបត្តិការនេះបានអនុវត្តនៅថ្ងៃទី៣០ ខែមីនា ឆ្នាំ២០២៦ ក្រោមការបញ្ជាផ្ទាល់ពីឯកឧត្តម ឃួង ស្រេង អភិបាលរាជធានីភ្នំពេញ និងឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដោយមានការចូលរួមពីអាជ្ញាធរខណ្ឌចំការមន និងការសម្របសម្រួលនីតិវិធីពីតំណាងអយ្យការ។

តាមការចុះត្រួតពិនិត្យជាក់ស្តែង ក្រុមការងារបានរកឃើញភាពមិនប្រក្រតីនៅជាន់ទី៧ និងជាន់ទី១០ នៃអគារនោះ ហើយបានឃាត់ខ្លួនមនុស្សសរុប១៧នាក់ ក្នុងនោះមាន ០៧នាក់ ពុំមានលិខិតឆ្លងដែនត្រឹមត្រូវ។

ជាលទ្ធផលនៃប្រតិបត្តិការ សមត្ថកិច្ចបានរឹបអូសវត្ថុតាងជាច្រើនដែលពាក់ព័ន្ធនឹងសកម្មភាពឆបោក រួមមាន ម៉ូនីទ័រ ៣០គ្រឿង ទូរស័ព្ទដៃ ៧៣គ្រឿង កុំព្យូទ័រ All-in-One ចំនួន ០៦គ្រឿង និង CPU ចំនួន ២៧គ្រឿង។

សមត្ថកិច្ចបានបញ្ជាក់ថា ក្រុមនេះប្រើប្រាស់ល្បិច “លោងលោមស្នេហា” ដើម្បីទាក់ទាញជនរងគ្រោះ មុននឹងលួចថតវីដេអូអាសអាភាស ហើយយកវាទៅប្រើសម្រាប់គំរាមកំហែង ឬជំរិតទារប្រាក់។ ប្រសិនបើជនរងគ្រោះមិនគោរពតាម ក្រុមជនល្មើសនឹងគំរាមផ្ញើវីដេអូនោះទៅក្រុមគ្រួសារ ឬកន្លែងការងារ ដើម្បីបង្ខូចកេរ្តិ៍ឈ្មោះ។

បច្ចុប្បន្ន ជនសង្ស័យទាំង១៧នាក់ រួមទាំងវត្ថុតាង ត្រូវបានប្រគល់ជូនស្នងការដ្ឋាននគរបាលរាជធានីភ្នំពេញ ដើម្បីបន្តសាកសួរ និងកសាងសំណុំរឿងបញ្ជូនទៅតុលាការ តាមនីតិវិធីច្បាប់។

ជាមួយគ្នានេះ លេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា បានឲ្យដឹងថា ចាប់ពីឆ្នាំ២០២៥ ដល់សប្ដាហ៍ទី២ ខែមីនា ឆ្នាំ២០២៦ អាជ្ញាធរបានបង្ក្រាប និងបិទខ្ទប់ទីតាំងពាក់ព័ន្ធនឹង Online Scams សរុប ២៣៦កន្លែង នៅទូទាំងប្រទេស។

តាមរបាយការណ៍ក្រសួងយុត្តិធម៌ ក្នុងរយៈពេល ៨ខែចុងក្រោយ តុលាការបានដោះស្រាយសំណុំរឿងឆបោកអនឡាញចំនួន ៧៩ករណី និងផ្តន្ទាទោសជនពាក់ព័ន្ធសរុប ៦៩៧នាក់ ខណៈមានមេខ្លោង និងបក្ខពួកជាង ២២ម៉ឺននាក់ បានគេចខ្លួនចេញពីប្រទេស។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានប្តេជ្ញាចិត្តយ៉ាងមុតមាំក្នុងការបោសសម្អាតបទល្មើសឆបោកតាមប្រព័ន្ធបច្ចេកវិទ្យាឲ្យអស់ពីកម្ពុជា នៅមុនខែមេសា ឆ្នាំ២០២៦ ដោយបញ្ជាក់ថា កម្ពុជាមិនអនុញ្ញាតឲ្យក្លាយជាគោលដៅសម្រាប់ឧក្រិដ្ឋជនបច្ចេកវិទ្យាឡើយ ហើយជនណាដែលពាក់ព័ន្ធ នឹងត្រូវទទួលទោសតាមច្បាប់យ៉ាងតឹងរ៉ឹង ដោយគ្មានការយោគយល់៕