អាជ្ញាធរនគរបាលខេត្តបាត់ដំបងកោះហៅម្ចាស់រថយន្ត ឈ្មោះ ស៊ីវ ជ័យសិដ្ឋ ពាក់ព័ន្ធគ្រោះថ្នាក់ចរាចរណ៍ស្លាប់៥នាក់

(បាត់ដំបង)៖ ស្នងការដ្ឋាននគរបាលខេត្តបាត់ដំបង បានចេញសេចក្ដីជូនដំណឹងអញ្ជើញឲ្យបុគ្គលម្នាក់ឈ្មោះ ស៊ីវ ជ័យសិដ្ឋ ភេទប្រុស កើតថ្ងៃទី០២ ខែធ្នូ ឆ្នាំ២០០៦ ជាម្ចាស់កម្មសិទ្ធរថយន្តម៉ាក Mercedes-Benz AMG GT53 ពាក់ផ្លាកលេខ កម្ពុជា C.S.6168 ចូលខ្លួនមកបំភ្លឺ ពាក់ព័ន្ធនឹងករណីគ្រោះថ្នាក់ចរាចរណ៍ធ្ងន់ធ្ងរ។

យោងតាមការបញ្ជាក់ពីសមត្ថកិច្ច គ្រោះថ្នាក់នេះបានកើតឡើងកាលពីយប់ថ្ងៃទី២៧ ខែមីនា ឆ្នាំ២០២៦ វេលាម៉ោង ២២ និង ៤០ នាទី នៅលើផ្លូវជាតិលេខ៥ ត្រង់ចំណុចភូមិកកោះ ឃុំកកោះ ស្រុកមោងឫស្សី ខេត្តបាត់ដំបង បណ្តាលឲ្យមានជនរងគ្រោះស្លាប់សរុបចំនួន ៥នាក់ ក្នុងនោះមានបុរស ២នាក់ និងស្ត្រី ៣នាក់ ដែលជាករណីបង្កឲ្យមានការភ្ញាក់ផ្អើលយ៉ាងខ្លាំងនៅមូលដ្ឋាន។

ក្នុងន័យនេះ ស្នងការដ្ឋាននគរបាលខេត្តបាត់ដំបង បានកំណត់ឲ្យឈ្មោះ ស៊ីវ ជ័យសិដ្ឋ ចូលខ្លួនមកធ្វើការបំភ្លឺនៅការិយាល័យនគរបាលចរាចរណ៍ផ្លូវគោក នៅថ្ងៃទី០១ ខែមេសា ឆ្នាំ២០២៦ វេលាម៉ោង ១០:០០ នាទី ព្រឹក ជាកំណត់ ដើម្បីបន្តនីតិវិធីស៊ើបអង្កេតតាមច្បាប់។

សមត្ថកិច្ចក៏បានបញ្ជាក់ថា ករណីនេះកំពុងស្ថិតក្រោមការស៊ើបអង្កេតយ៉ាងម៉ត់ចត់ ដើម្បីកំណត់ហេតុផល និងទំនួលខុសត្រូវតាមផ្លូវច្បាប់ ដោយផ្អែកលើភស្តុតាង និងនីតិវិធីជាក់ស្តែង។ ជាមួយគ្នានេះ អាជ្ញាធរអំពាវនាវឲ្យអ្នកពាក់ព័ន្ធចូលរួមសហការជាមួយសមត្ថកិច្ច ដើម្បីធានាបាននូវយុត្តិធម៌សម្រាប់ជនរងគ្រោះ៕