យុទ្ធនាការ «Say No to Fake News» ជំហានទី២ ត្រៀមដំណើរការ ពង្រឹងសន្តិសុខព័ត៌មាន និងអក្ខរកម្មឌីជីថលនៅកម្ពុជា

(ភ្នំពេញ)៖ យុទ្ធនាការ «និយាយថាទេចំពោះព័ត៌មានក្លែងក្លាយ» (Say No to Fake News) ដែលជាគំនិតផ្តួចផ្តើមរបស់ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មានត្រូវបានប្រកាសថា នឹងបន្តទៅជំហានទី២ ក្នុងពេលឆាប់ៗខាងមុខនេះ ដើម្បីបន្តពង្រឹងសន្តិសុខ និងសុវត្ថិភាពព័ត៌មាននៅកម្ពុជា។

តាមការបញ្ជាក់ក្នុងសារដែលបានបង្ហោះលើបណ្តាញសង្គមហ្វេសប៊ុក នារសៀលនេះ យុទ្ធនាការជំហានទី២ នឹងកើតមានបន្ទាប់ពីការអនុវត្តជំហានទី១ ដែលបានដំណើរការពីថ្ងៃទី១ ខែមេសា ឆ្នាំ២០២៥ រហូតដល់ចុងខែមីនា ឆ្នាំ២០២៦ បញ្ចប់ដោយជោគជ័យ និងទទួលបានលទ្ធផលគួរឱ្យមោទនភាព។

ក្នុងរយៈពេលមួយឆ្នាំកន្លងមកនេះ យុទ្ធនាការបានផ្តោតសំខាន់លើការលើកកម្ពស់អក្ខរកម្មព័ត៌មាន និងប្រព័ន្ធផ្សព្វផ្សាយ ព្រមទាំងអក្ខរកម្មឌីជីថល ដោយបញ្ជ្រាបចំណេះដឹងទៅដល់ប្រជាពលរដ្ឋយ៉ាងទូលំទូលាយ។ ជាក់ស្តែង មានអ្នកចូលរួមផ្ទាល់ជាង ៤,០០០នាក់ ទូទាំងប្រទេស ដែលបានក្លាយជាឃោសិកាសំខាន់ក្នុងការផ្សព្វផ្សាយសារ និងបន្តចែករំលែកចំណេះដឹងទៅសហគមន៍របស់ខ្លួន។

សកម្មភាពនៅទូទាំង២៥រាជធានី-ខេត្ត បានបង្កើតឥទ្ធិពលដល់ប្រជាពលរដ្ឋជិត ១០លាននាក់ បង្ហាញពីវិសាលភាពនៃការចូលរួម និងការឆ្លើយតបវិជ្ជមានពីសង្គម។ ជាមួយគ្នានេះ ក្រសួងព័ត៌មានក៏បានសហការជាមួយក្រសួងប្រៃសណីយ៍ និងទូរគមនាគមន៍ ក្នុងការផ្សព្វផ្សាយសារអប់រំតាមប្រព័ន្ធទូរស័ព្ទ ដល់ប្រជាពលរដ្ឋសរុបជាង២៣ លានគណនី ដែលមនុស្សម្នាក់អាចទទួលបានសារជាច្រើនដង។

លទ្ធផលសរុបបង្ហាញថា ប្រជាពលរដ្ឋកាន់តែមានការយល់ដឹងច្បាស់លាស់អំពីវិធានការការពារខ្លួនពីព័ត៌មានក្លែងក្លាយ ដោយចាប់ផ្តើមមានវប្បធម៌ផ្ទៀងផ្ទាត់ប្រភពព័ត៌មាន មុននឹងជឿ ឬចែករំលែក។ ការកើនឡើងនៃការជឿជាក់លើប្រភពព័ត៌មានផ្លូវការ និងការចូលរួមអប់រំគ្នាទៅវិញទៅមកក្នុងសហគមន៍ ក៏ជាសញ្ញាវិជ្ជមានមួយនៃភាពរឹងមាំផ្នែកព័ត៌មាន។

ជំហានទី២ នៃយុទ្ធនាការនេះ ត្រូវបានរំពឹងថា នឹងបន្តលើកកម្ពស់វិជ្ជាជីវៈសារព័ត៌មាន ការប្រើប្រាស់បច្ចេកវិទ្យាឌីជីថលយ៉ាងទំនួលខុសត្រូវ និងការពង្រឹងភាពធន់នៃសង្គមចំពោះព័ត៌មានក្លែងក្លាយ ក្នុងបរិបទពិភពលោកដែលព័ត៌មានរីករាលដាលយ៉ាងលឿន និងស្មុគស្មាញ៕