សមត្ថកិច្ចស្រុកបាទីឃាត់ខ្លួនជនសង្ស័យម្នាក់ តាមដីកាតុលាការ ពាក់ព័ន្ធគ្រឿងញៀន

(តាកែវ)៖ កម្លាំងនគរបាលស្រុកបាទី បានអនុវត្តដីកាបង្គាប់ឲ្យចាប់ខ្លួនជនសង្ស័យម្នាក់ ពាក់ព័ន្ធករណីរក្សាទុក និងប្រើប្រាស់សារធាតុញៀនខុសច្បាប់ ដោយជោគជ័យ នៅថ្ងៃទី២៧ ខែមីនា ឆ្នាំ២០២៦ វេលាម៉ោងប្រមាណ ០១ និង៣០នាទីយប់។

ប្រតិបត្តិការនេះ អនុវត្តតាមការចង្អុលបង្ហាញរបស់លោកឧត្តមសេនីយ៍ទោ ម៉ែន លី ស្នងការនគរបាលខេត្តតាកែវ និងក្រោមការសម្របសម្រួលពីតំណាងអយ្យការអមសាលាដំបូងខេត្តតាកែវ។ លោកវរសេនីយ៍ទោ មូល សារ៉ាត់ អធិការនគរបាលស្រុកបាទី បានបញ្ជាកម្លាំងប៉ុស្តិ៍នគរបាលរដ្ឋបាលចំបក់ ចុះល្បាតក្នុងមូលដ្ឋាន។

ក្នុងអំឡុងពេលចុះល្បាត កម្លាំងបានប្រទះឃើញជនសង្ស័យម្នាក់នៅចំណុចហាងលក់បបរ ស្ថិតក្នុងភូមិរុន ឃុំចំបក់ ដែលជាមុខសញ្ញាមានដីកាបង្គាប់ឲ្យចាប់ខ្លួន លេខ ៦៤ (ឍ) ដចន/២៥ ចុះថ្ងៃទី២៥ ខែធ្នូ ឆ្នាំ២០២៥ ចេញដោយចៅក្រមស៊ើបសួរ ពាក់ព័ន្ធបទល្មើសគ្រឿងញៀន។

ជនសង្ស័យឈ្មោះ មាន មករា ភេទប្រុស អាយុ ២៦ ឆ្នាំ មុខរបរមិនពិតប្រាកដ មានទីលំនៅភូមិរុន ឃុំចំបក់ ស្រុកបាទី ខេត្តតាកែវ ត្រូវបានឃាត់ខ្លួន និងនាំមកអធិការដ្ឋាននគរបាលស្រុកបាទី ដើម្បីសាកសួរ និងអនុវត្តនីតិវិធី។

បច្ចុប្បន្ន ជនត្រូវចោទត្រូវបានបញ្ជូនទៅស្នងការដ្ឋាននគរបាលខេត្តតាកែវ ដើម្បីបន្តនីតិវិធីតាមច្បាប់។ ករណីនេះបង្ហាញពីការបន្តរឹតបន្តឹងអនុវត្តច្បាប់របស់សមត្ថកិច្ច ក្នុងការបង្ក្រាបបទល្មើសគ្រឿងញៀននៅមូលដ្ឋាន៕