គ្រោះថ្នាក់ចរាចរណ៍ធ្ងន់ធ្ងរ នៅស្រុកមោងឫស្សី ស្លាប់៥នាក់ របួសធ្ងន់១នាក់ ខណៈអ្នកបើករថយន្តរត់គេចខ្លួន

(បាត់ដំបង)៖ គ្រោះថ្នាក់ចរាចរណ៍ដ៏ធ្ងន់ធ្ងរមួយ បានកើតឡើងនៅយប់ថ្ងៃទី២៧ ខែមីនា ឆ្នាំ២០២៦ វេលាម៉ោង ២២និង៤០នាទី លើកំណាត់ផ្លូវជាតិលេខ៥ ចន្លោះគីឡូម៉ែត្រលេខ ២៤៦-២៤៧ ស្ថិតក្នុងភូមិកកោះ ឃុំកកោះ ស្រុកមោងឫស្សី បណ្តាលឲ្យមនុស្សចំនួន ៥នាក់ស្លាប់ និងម្នាក់ទៀតរងរបួសធ្ងន់។

យោងតាមរបាយការណ៍របស់លោកវរសេនីយ៍ឯក ស គឹមឡុង អធិការនគរបាលស្រុកមោងឫស្សី បានឲ្យដឹងថា ហេតុការណ៍នេះកើតឡើងរវាងរថយន្តមួយគ្រឿង ម៉ាក Mercedes Benz AMG GT53 ពណ៌ខ្មៅ ពាក់ផ្លាកលេខកម្ពុជា C.S.6168 ដែលអ្នកបើកបរមិនទាន់ស្គាល់អត្តសញ្ញាណ (បានរត់គេចខ្លួនបន្ទាប់ពីកើតហេតុ) និងម៉ូតូចំនួន២គ្រឿងដែលធ្វើដំណើរស្របទិសគ្នា។
ប្រភពដដែលបន្តថា រថយន្តបានធ្វើដំណើរពីទិសខាងត្បូង (ភ្នំពេញ) ឆ្ពោះទៅទិសខាងជើង (បាត់ដំបង) ក្នុងល្បឿនលឿន ហើយបានបុកពីក្រោយម៉ូតូទាំង២គ្រឿងពេញទំហឹង បណ្ដាលឲ្យមានអ្នកស្លាប់ និងរងរបួសយ៉ាងធ្ងន់ធ្ងរ។

ជនរងគ្រោះនៅលើម៉ូតូទី១ រួមមាន៖ អ្នកបើកបរឈ្មោះ ប៉ុក ស៊ីណាប់ អាយុ៣២ឆ្នាំ (ស្លាប់) និងអ្នករួមដំណើរ២នាក់ គឺកុមារីអាយុ១០ឆ្នាំ (ស្លាប់) និងកុមារាអាយុ៧ឆ្នាំ (រងរបួសធ្ងន់) ដែលត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកមោងឫស្សី។

សម្រាប់ម៉ូតូទី២ អ្នកបើកបរឈ្មោះ សួន ធានី អាយុ៥០ឆ្នាំ (ស្លាប់) និងអ្នករួមដំណើរ២នាក់ផ្សេងទៀត គឺស្ត្រីអាយុ៤៣ឆ្នាំ និងកុមារាអាយុ៧ឆ្នាំ សុទ្ធតែបានបាត់បង់ជីវិតនៅកន្លែងកើតហេតុ។
តាមការពិនិត្យជាក់ស្តែងរបស់សមត្ថកិច្ចជំនាញ បានបញ្ជាក់ថា មូលហេតុបឋម គឺបណ្តាលមកពីការបើកបរល្បឿនលឿន និងមិនប្រុងប្រយ័ត្នរបស់រថយន្ត ដែលបានបុកពីក្រោយយានយន្តផ្សេងទៀតដែលកំពុងធ្វើដំណើរស្របទិស។

បច្ចុប្បន្ន កម្លាំងនគរបាលជំនាញ កំពុងបន្តស្រាវជ្រាវស្វែងរកអ្នកបើកបររថយន្តដែលបានរត់គេចខ្លួន ដើម្បីយកមកទទួលខុសត្រូវតាមច្បាប់ ខណៈយានយន្តពាក់ព័ន្ធត្រូវបានយកទៅរក្សាទុកសម្រាប់ធ្វើការពិនិត្យបន្ត។ដោយឡែក សាកសពជនរងគ្រោះទាំងអស់ ត្រូវបានសមត្ថកិច្ចធ្វើកំណត់ហេតុរួចរាល់ ហើយប្រគល់ជូនក្រុមគ្រួសារដើម្បីរៀបចំពិធីបុណ្យតាមប្រពៃណី។

គ្រោះថ្នាក់នេះ ជាហេតុការណ៍មួយទៀតដែលរំលឹកឲ្យអ្នកប្រើប្រាស់ផ្លូវគ្រប់រូប ប្រុងប្រយ័ត្ន និងគោរពច្បាប់ចរាចរណ៍ ដើម្បីកាត់បន្ថយគ្រោះថ្នាក់ដែលអាចបណ្ដាលឲ្យបាត់បង់ជីវិត និងទ្រព្យសម្បត្តិ៕