វិស័យយុត្តិធម៌ដាក់គោលដៅថ្មី ពង្រឹងការអនុវត្តច្បាប់ និងវិន័យអង្គចៅក្រម

(ភ្នំពេញ)៖ នៅថ្ងៃទី២៥ និងទី២៦ ខែមីនា ឆ្នាំ២០២៦ ឯកឧត្តម កើត រិទ្ធ ឧបនាយករដ្ឋមន្ត្រី និងរដ្ឋមន្ត្រីក្រសួងយុត្តិធម៌ បានដឹកនាំដោយផ្ទាល់កិច្ចពិភាក្សាសំខាន់ៗ ៣ ប្រធានបទ ក្នុងសន្និបាតបូកសរុបលទ្ធផលការងារវិស័យយុត្តិធម៌ឆ្នាំ២០២៥ និងកំណត់ទិសដៅអាទិភាពសម្រាប់ឆ្នាំ២០២៦។

ប្រធានបទទី១ ពាក់ព័ន្ធនឹងសុពលភាពនៃកិច្ចសន្យាទិញលក់អចលនវត្ថុ មានការចូលរួមពីមន្ត្រីជាន់ខ្ពស់ និងតំណាងស្ថាប័នតុលាការ ដើម្បីពិនិត្យលើបញ្ហាច្បាប់ និងការអនុវត្តជាក់ស្តែង។ ប្រធានបទទី២ ស្តីពីបញ្ហាប្រឈមក្នុងសំណុំរឿងអនុវត្តដោយបង្ខំ ត្រូវបានលើកឡើងយ៉ាងច្បាស់លាស់ ដោយផ្តោតលើការពន្យារពេល និងប្រសិទ្ធភាពនៃការអនុវត្តសេចក្តីសម្រេចតុលាការ។ ខណៈប្រធានបទទី៣ គឺពាក់ព័ន្ធនឹងក្របខ័ណ្ឌវិន័យសម្រាប់អង្គចៅក្រម ដោយមានគោលបំណងលើកកម្ពស់សីលធម៌វិជ្ជាជីវៈ និងភាពទុកចិត្តសាធារណៈ។

ក្រោយការពិភាក្សាយ៉ាងផុសផុល អង្គសន្និបាតបានឯកភាពលើសេចក្តីសម្រេចរួមសម្រាប់ប្រធានបទទី១ និងទី២ ដើម្បីធានាសុវត្ថិភាពគតិយុត្តក្នុងប្រតិបត្តិការទិញលក់អចលនវត្ថុ និងបង្កើនសង្គតិភាពក្នុងការបកស្រាយច្បាប់នៅគ្រប់សាលាជម្រះក្តី។ ទន្ទឹមនឹងនេះ ក៏មានគោលដៅជំរុញការអនុវត្តសំណុំរឿងដោយបង្ខំឱ្យមានល្បឿនលឿនឡើង លើកកម្ពស់តម្លៃសេចក្តីសម្រេចស្ថាពរ និងការពារសិទ្ធិស្របច្បាប់របស់ភាគីពាក់ព័ន្ធ ជាពិសេសភាគីដែលឈ្នះក្តី។

សម្រាប់ប្រធានបទទី៣ អង្គសន្និបាតបានយល់ស្របថា ត្រូវបន្តអនុវត្តវិធានការវិន័យចំពោះចៅក្រម និងព្រះរាជអាជ្ញាឱ្យបានម៉ឺងម៉ាត់ ដើម្បីលើកកម្ពស់កិត្តិយស និងសេចក្តីថ្លៃថ្នូរនៃវិស័យយុត្តិធម៌។ ព្រមជាមួយនេះ ក៏មានការស្នើឱ្យក្រុមប្រឹក្សាវិន័យពាក់ព័ន្ធធានាថា នីតិវិធីអធិការកិច្ច និងវិន័យ ត្រូវអនុវត្តដោយតម្លាភាព ប្រសិទ្ធភាព និងសុក្រឹតភាព ខណៈដែលក៏ធានាសិទ្ធិការពារខ្លួនរបស់មន្ត្រីដែលពាក់ព័ន្ធផងដែរ៕