បណ្ឌិត កៅ ថាច៖ អង្ករខ្មែរ មិនត្រឹមជាផលិតផលកសិកម្ម ប៉ុន្តែជាមោទនភាពជាតិ និងថាមពលសេដ្ឋកិច្ច

(ភ្នំពេញ)៖ នៅថ្ងៃទី២៦ ខែមីនា ឆ្នាំ២០២៦ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយក ធនាគារអភិវឌ្ឍន៍ជនបទ និងកសិកម្ម បានអញ្ជើញចូលរួមផ្តល់បទបាឋកថាខ្លី ក្នុងកម្មវិធីអបអរសាទរខួប១៥ឆ្នាំ នៃការកកើតរបស់ AMRU RICE ដែលជាក្រុមហ៊ុនឈានមុខមួយក្នុងវិស័យកែច្នៃ និងនាំចេញអង្ករកម្ពុជា។

ក្នុងឱកាសនោះ ឯកឧត្តមបណ្ឌិតប្រតិភូ បានវាយតម្លៃខ្ពស់ចំពោះតួនាទីរបស់ AMRU RICE ក្នុងការលើកកម្ពស់គុណភាពអង្ករកម្ពុជា ឱ្យឈានដល់ស្តង់ដារអន្តរជាតិ និងពង្រីកទីផ្សារនាំចេញទៅកាន់ពិភពលោក ដែលជាកត្តាសំខាន់ក្នុងការជំរុញកំណើនសេដ្ឋកិច្ចជាតិ។

ឯកឧត្តមបានគូសបញ្ជាក់ថា អង្ករកម្ពុជា មិនមែនជាផលិតផលកសិកម្មធម្មតាទេ ប៉ុន្តែជានិមិត្តរូបនៃជីវភាពរស់នៅរបស់ប្រជាកសិករ ជាសសៃឈាមសេដ្ឋកិច្ច និងជាមោទនភាពជាតិ។ គ្រប់គ្រាប់អង្ករខ្មែរ បានបង្ហាញពីការខិតខំប្រឹងប្រែង ការអត់ធ្មត់ និងការតស៊ូយ៉ាងខ្លាំងរបស់ប្រជាកសិករ ចាប់ពីវាលស្រែ ដល់រោងម៉ាស៊ីនកិនស្រូវ ហើយបន្តដល់ទីផ្សារអន្តរជាតិ។

ជាមួយគ្នានេះ ឯកឧត្តមបណ្ឌិត ក៏បានលើកឡើងថា វិស័យស្រូវអង្ករ គឺជាវិស័យដែលទាមទារការអត់ធ្មត់ ការប្រឹងប្រែង និងការបត់បែនខ្ពស់ ទៅតាមបម្រែបម្រួលអាកាសធាតុ និងលក្ខខណ្ឌទីផ្សារ។ ដូច្នេះ កសិករគ្រប់រូបត្រូវតែផ្លាស់ប្តូរទិសដៅទៅរកការធ្វើកសិកម្មប្រកបដោយចីរភាព ដើម្បីធានាសន្តិសុខស្បៀង និងការអភិវឌ្ឍរយៈពេលវែង។

កម្មវិធីខួប១៥ឆ្នាំនេះ ត្រូវបានមើលឃើញថា ជាផ្នែកមួយនៃការឆ្លុះបញ្ចាំងពីវឌ្ឍនភាពរបស់វិស័យអង្ករកម្ពុជា និងជាកម្លាំងជំរុញឱ្យមានការចូលរួមកាន់តែសកម្មពីភាគីពាក់ព័ន្ធទាំងអស់ ក្នុងការពង្រឹងខ្សែច្រវាក់តម្លៃ កែលម្អគុណភាព និងបង្កើនសមត្ថភាពប្រកួតប្រជែងរបស់អង្ករខ្មែរ នៅលើឆាកអន្តរជាតិ៕