រដ្ឋមន្ត្រី ហេង សួរ ជំរុញទំនាក់ទំនងវិជ្ជាជីវៈក្នុងវិស័យ GFT ឱ្យរឹងមាំ និងចីរភាព!

(ភ្នំពេញ)៖ នៅព្រឹកថ្ងៃទី២៦ ខែមីនា ឆ្នាំ២០២៦ ឯកឧត្តម ហេង សួរ រដ្ឋមន្ត្រីក្រសួងការងារ បានអញ្ជើញជាអធិបតីបើកវេទិកាទំនាក់ទំនងវិជ្ជាជីវៈ សម្រាប់វិស័យកាត់ដេរសម្លៀកបំពាក់ ស្បែកជើង និងផលិតផលធ្វើដំណើរ (GFT) ដោយគូសបញ្ជាក់ថា ទំនាក់ទំនងវិជ្ជាជីវៈរឹងមាំ គឺអាស្រ័យលើការចូលរួមសន្ទនាសង្គមដោយស្មោះត្រង់ពីគ្រប់ភាគី ពិសេសនិយោជក និងកម្មករ។

ក្នុងវេទិកាដែលធ្វើឡើងនៅសណ្ឋាគារ Hyatt Regency ភ្នំពេញ ឯកឧត្តមបានលើកឡើងថា ក្នុងបរិបទសេដ្ឋកិច្ចពិភពលោកមិនប្រាកដប្រជា ការពង្រឹងកិច្ចសហប្រតិបត្តិការ និងការយល់ចិត្តគ្នា គឺជាគន្លឹះក្នុងការរក្សាបរិយាកាសវិនិយោគ និងការងារ។

ឯកឧត្តមក៏បានបញ្ជាក់ថា កម្ពុជាកំពុងពង្រឹងយន្តការសន្ទនាសង្គមគ្រប់កម្រិត ព្រមទាំងលើកកម្ពស់ការអនុលោមច្បាប់ការងារ សុវត្ថិភាព និងសិទ្ធិកម្មករ ដើម្បីធានាបាននូវភាពសុខដុម និងប្រកួតប្រជែងក្នុងវិស័យ GFT។

ជាមួយគ្នានេះ ដៃគូអន្តរជាតិ ក៏បានបង្ហាញការគាំទ្របន្ត ក្នុងការអភិវឌ្ឍប្រព័ន្ធទំនាក់ទំនងវិជ្ជាជីវៈឱ្យកាន់តែរឹងមាំ និងចីរភាព ដើម្បីជំរុញផលិតភាព និងស្ថិរភាពការងារនៅកម្ពុជា៕