សម្ដេចធិបតីកោតសរសើរស្វាយរៀង បង្ក្រាប Online Scam ខ្លាំងក្លា ជំរុញសន្តិសុខដើម្បីទាក់ទាញវិនិយោគ

(ភ្នំពេញ)៖ សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា បានថ្លែងកោតសរសើរដល់គណៈបញ្ជាការឯកភាព ខេត្តស្វាយរៀង ដែលបានខិតខំប្រឹងប្រែងបង្ក្រាបបទល្មើសឆបោកតាមអនឡាញ (Online Scam) យ៉ាងសកម្ម ព្រមទាំងណែនាំឱ្យបន្តយកចិត្តទុកដាក់បង្ក្រាបបន្ថែម ដើម្បីធានាសន្តិសុខ សុវត្ថិភាព និងសណ្ដាប់ធ្នាប់សង្គម ជូនប្រជាពលរដ្ឋ និងវិនិយោគិន។

ការលើកឡើងនេះ ត្រូវបានធ្វើឡើងនៅព្រឹកថ្ងៃទី២៦ ខែមីនា ឆ្នាំ២០២៦ ក្នុងឱកាសសម្ដេចធិបតី អញ្ជើញជាអធិបតីភាពសម្ពោធដាក់ឱ្យប្រើប្រាស់រោងចក្រប្រព្រឹត្តកម្មទឹកស្អាតក្រុងស្វាយរៀង ដែលមានទុនវិនិយោគសរុបប្រមាណ ៣០,៦លានដុល្លារអាមេរិក និងបើកការដ្ឋានគម្រោងពង្រីកហេដ្ឋារចនាសម្ព័ន្ធទឹកស្អាតក្នុងខេត្តចំនួន៥ ក្រោមជំនួយហិរញ្ញប្បទានឥតសំណងពី ជប៉ុន តាមរយៈ JICA។

សម្ដេចធិបតីបានមានប្រសាសន៍ថា៖ «ខ្ញុំសូមអរគុណ និងកោតសរសើរដល់ឯកឧត្តមអភិបាលខេត្ត និងគណៈអភិបាលខេត្ត ដែលបានប្ដេជ្ញាចិត្តខ្ពស់អនុវត្តតាមបញ្ជារបស់រាជរដ្ឋាភិបាល ធ្វើយ៉ាងណាមិនឲ្យខេត្តស្វាយរៀងក្លាយជាតំបន់ប៉ះពាល់ដល់កេរ្តិ៍ឈ្មោះ និងសន្តិសុខ»។

សម្ដេចធិបតីបានគូសបញ្ជាក់ថា សន្តិសុខ និងសុវត្ថិភាព គឺជាគន្លឹះសំខាន់សម្រាប់ទាក់ទាញវិនិយោគិន និងជំរុញការអភិវឌ្ឍឧស្សាហកម្ម។ សម្ដេចក៏បានបង្ហាញក្ដីសង្ឃឹមថា ក្នុងរយៈពេល២០ឆ្នាំខាងមុខ ការអភិវឌ្ឍវិស័យរោងចក្រ នឹងមិនកំណត់ត្រឹមតំបន់បាវិតទេ ប៉ុន្តែអាចពង្រីកទៅតំបន់ជុំវិញយ៉ាងទូលំទូលាយ។

ជាមួយគ្នានេះ សម្ដេចធិបតីបានលើកឡើងថា បញ្ហាឆបោកអនឡាញ គឺជាបញ្ហាតំបន់ ដែលទាមទារការសហការយ៉ាងសកម្មពីភាគីកម្ពុជា ក្នុងការបង្ការ និងបោសសម្អាត ដើម្បីរក្សាបរិយាកាសសុវត្ថិភាពសម្រាប់សង្គម និងសេដ្ឋកិច្ចជាតិ។

តាមការបញ្ជាក់ សមត្ថកិច្ចក្នុង ខេត្តស្វាយរៀង បានបន្តបង្ក្រាបបទល្មើសនេះជាបន្តបន្ទាប់ ដោយឃាត់ខ្លួនជនសង្ស័យជាច្រើននាក់ ជាពិសេសជនបរទេស ព្រមទាំងរឹបអូសវត្ថុតាងពាក់ព័ន្ធ។ អាជ្ញាធរខេត្តក៏បានអំពាវនាវឱ្យម្ចាស់អាជីវកម្ម ដូចជា កាស៊ីណូ អាផាតមិន និងផ្ទះសំណាក់ សហការផ្តល់ព័ត៌មាន និងមិនអនុញ្ញាតឲ្យជនសង្ស័យស្នាក់នៅ ដើម្បីទប់ស្កាត់បទល្មើសឱ្យមានប្រសិទ្ធភាពខ្ពស់។

យោងតាមរបាយការណ៍របស់ ក្រសួងមហាផ្ទៃ ចាប់ពីថ្ងៃទី១ ខែមករា ដល់ថ្ងៃទី១៤ ខែមីនា ឆ្នាំ២០២៦ សមត្ថកិច្ចបានបើកប្រតិបត្តិការបង្ក្រាបចំនួន៩៨ទីតាំង នៅទូទាំងប្រទេស រួមមាន រាជធានីភ្នំពេញ និងបណ្តាខេត្តជាច្រើនទៀត។

ក្នុងប្រតិបត្តិការទាំងនេះ សមត្ថកិច្ចបានឃាត់ខ្លួនមនុស្សចំនួន៥,៧៧១នាក់ ពី២៣សញ្ជាតិ ដោយក្នុងនោះ បានបញ្ជូនទៅអគ្គនាយកដ្ឋានអន្តោប្រវេសន៍ ៤,៤០៧នាក់ បញ្ជូនទៅតុលាការ ១២៧នាក់ និងអនុញ្ញាតឲ្យត្រឡប់ទៅវិញ ៣៤២នាក់ ខណៈ ៨៩៥នាក់ កំពុងបន្តនីតិវិធី។

គួរបញ្ជាក់ថា ខេត្តស្វាយរៀង ជាខេត្តមានសក្កានុពលសេដ្ឋកិច្ច និងមានទីតាំងយុទ្ធសាស្ត្រសំខាន់ ជាប់ព្រំដែនប្រទេសវៀតណាម មានច្រកទ្វារព្រំដែនអន្តរជាតិចំនួន២ និងមានចម្ងាយប្រមាណ១២៥គីឡូម៉ែត្រពី រាជធានីភ្នំពេញ ដែលកំពុងក្លាយជាគោលដៅសំខាន់សម្រាប់វិនិយោគ និងអភិវឌ្ឍន៍ឧស្សាហកម្មនៅតំបន់ខាងកើត៕