ស្វាយរៀង និងតំបន់ខាងកើត នឹងក្លាយជាមជ្ឈមណ្ឌលឧស្សាហកម្មក្នុង២០ឆ្នាំ!

(ភ្នំពេញ)៖ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសយ៉ាងច្បាស់ថា រាជរដ្ឋាភិបាលកំពុងដាក់ទិសដៅយុទ្ធសាស្ត្រយ៉ាងវែងឆ្ងាយ ដើម្បីអភិវឌ្ឍ ខេត្តស្វាយរៀង និងបណ្តាខេត្តទិសខាងកើត ឱ្យក្លាយជាតំបន់ឧស្សាហកម្ម និងកសិ-ឧស្សាហកម្មមានសក្កានុពលខ្ពស់ ក្នុងរយៈពេល២០ឆ្នាំខាងមុខ ដើម្បីទាក់ទាញវិនិយោគ និងជំរុញកំណើនសេដ្ឋកិច្ចជាតិ។

ការបញ្ជាក់នេះ ត្រូវបានធ្វើឡើងក្នុងពិធីសម្ពោធដាក់ឱ្យដំណើរការជាផ្លូវការរោងចក្រប្រព្រឹត្តកម្មទឹកស្អាតអណ្តូងតាសី ក្នុងក្រុងស្វាយរៀង ព្រមទាំងពិធីបើកការដ្ឋានពង្រីកហេដ្ឋារចនាសម្ព័ន្ធទឹកស្អាតបន្ថែមសម្រាប់ខេត្តចំនួន៥ នៅព្រឹកថ្ងៃទី២៦ ខែមីនា ឆ្នាំ២០២៦។

សម្តេចធិបតីបានលើកឡើងថា កម្ពុជា និងជប៉ុន បានបន្តសហការយ៉ាងជិតស្និទ្ធ ក្នុងការអភិវឌ្ឍហេដ្ឋារចនាសម្ព័ន្ធ និងសមិទ្ធផលជាច្រើន ដែលបានចូលរួមលើកកម្ពស់ជីវភាពប្រជាពលរដ្ឋ។ ជាក់ស្តែង គម្រោងទឹកស្អាតនៅស្វាយរៀង គឺជាផ្នែកមួយនៃការធានាថា ប្រជាពលរដ្ឋទទួលបានសេវាទឹកស្អាតប្រកបដោយគុណភាព និងសុវត្ថិភាព។

ជាមួយគ្នានេះ ខេត្តស្វាយរៀងត្រូវបានពិចារណាថា មានសក្កានុពលសេដ្ឋកិច្ចខ្ពស់ មិនត្រឹមតែវិស័យកសិកម្មប៉ុណ្ណោះទេ ប៉ុន្តែរួមទាំងវិស័យឧស្សាហកម្ម និងកសិ-ឧស្សាហកម្មផងដែរ។ ដោយហេតុនេះ រាជរដ្ឋាភិបាលកំពុងជំរុញយ៉ាងសកម្មឱ្យមានការវិនិយោគលើរោងចក្រ និងសហគ្រាស ដើម្បីបម្លែងតំបន់នេះឱ្យក្លាយជាគោលដៅវិនិយោគសំខាន់មួយនៅតំបន់ខាងកើត។

សម្តេចធិបតីក៏បានគូសបញ្ជាក់ថា កម្ពុជាកំពុងរៀបចំខ្លួនឱ្យក្លាយជាប្រទេសអភិវឌ្ឍ ដោយផ្អែកលើសមត្ថភាពប្រជាជន ជាពិសេសយុវជន ដែលមានចំណេះដឹង និងជំនាញលើវិស័យសំខាន់ៗ ដូចជា កសិ-ឧស្សាហកម្ម ឧស្សាហកម្ម កម្មន្តសាល និងកសិកម្ម។ ព្រមជាមួយនេះ ក៏មានការអនុវត្តយុទ្ធនាការបង្ក្រាបបទល្មើសបច្ចេកវិទ្យា ដើម្បីធានាសន្តិសុខ និងបង្កើតបរិយាកាសល្អសម្រាប់វិនិយោគិន។

គម្រោងរោងចក្រទឹកស្អាតអណ្តូងតាសី នឹងផ្តល់អត្ថប្រយោជន៍យ៉ាងច្រើន ដល់សុខភាពសាធារណៈ និងបរិស្ថាន ដោយជួយកាត់បន្ថយហានិភ័យជំងឺ និងលើកកម្ពស់គុណភាពជីវិតរបស់ប្រជាពលរដ្ឋ។ ខណៈគម្រោងពង្រីកទឹកស្អាតសម្រាប់ខេត្តចំនួន៥ រួមមាន ខេត្តកំពង់ធំ, ខេត្តមណ្ឌលគិរី, ខេត្តពោធិ៍សាត់ និង ខេត្តកំពត នឹងជួយពង្រឹងមូលដ្ឋានសម្រាប់ការអភិវឌ្ឍសេដ្ឋកិច្ចមូលដ្ឋាន និងឧស្សាហកម្មនៅទូទាំងប្រទេស។

នៅចុងក្រោយ សម្តេចធិបតីបានបញ្ជាក់ថា រាជរដ្ឋាភិបាលមានយុទ្ធសាស្ត្រច្បាស់លាស់ ក្នុងការជំរុញសេដ្ឋកិច្ចបៃតង ពង្រឹងអភិបាលកិច្ចបរិស្ថាន និងបន្តវិនិយោគលើហេដ្ឋារចនាសម្ព័ន្ធសំខាន់ៗ ដូចជា ទឹកស្អាត អនាម័យ និងប្រព័ន្ធគ្រប់គ្រងសំណល់ នៅទូទាំងប្រទេស ដោយអនុវត្តតាមទិសស្លោកថា៖ «ទីណាមានទឹកស្អាត ទីនោះនឹងមានការផ្លាស់ប្តូរសេដ្ឋកិច្ច»៕