សំណង់សង្ស័យអត់ច្បាប់នៅស្រុកស្អាងកំពុងបន្តលេចឡើង! ប្រភពចង្អុលទីតាំងច្បាស់ៗ ខណៈមន្ត្រីជំនាញ លោក ចាប ពលវឌ្ឍន៍ មិនទាន់ហ៊ានបំភ្លឺឱ្យច្បាស់លាស់ ហើយមេឃុំព្រែកគយបានបញ្ជាក់ថា គេអត់បានសុំច្បាប់ពីឃុំទេ!

តាមប្រភពពីលោក ឈាង តាង មេឃុំព្រែកគយ បានឱ្យដឹងថា សំណង់មួយចំនួននៅតែបន្តសាងសង់ដោយគ្មានលិខិតអនុញ្ញាត និងមិនគោរពបទប្បញ្ញត្តិច្បាប់។ ជាក់ស្តែង មានសំណង់មួយស្ថិតនៅចំណុចផ្លូវចូលវត្តស្អាងភ្នំ ក្នុងភូមិព្រែករុន ឃុំព្រែកគយ ដែលត្រូវបានអះអាងថា មិនទាន់មានច្បាប់អនុញ្ញាតសាងសង់ ខណៈការសាងសង់បានអនុវត្តទៅមុខរហូតដល់ជាងពាក់កណ្តាលហើយ។

ពាក់ព័ន្ធករណីនេះ លោក ចាប ពលវឌ្ឍន៍ ប្រធានការិយាល័យរៀបចំដែនដី នគរូបនីយកម្ម សំណង់ និងភូមិបាលស្រុកស្អាង បានឱ្យដឹងថា កំពុងស្វែងរកព័ត៌មានបន្ថែមពីមន្ត្រីជំនាញពាក់ព័ន្ធ ដើម្បីបំភ្លឺស្ថានភាពច្បាប់នៃសំណង់ខាងលើ។ ទោះជាយ៉ាងណា រហូតមកដល់ពេលនេះ មិនទាន់មានការបញ្ជាក់ច្បាស់លាស់ថា សំណង់នោះមានច្បាប់ត្រឹមត្រូវ ឬអត់នៅឡើយ។

ការពន្យារពេលក្នុងការបំភ្លឺ និងភាពមិនច្បាស់លាស់នេះ បង្កើតជាសំណួរចំពោះតួនាទី និងការទទួលខុសត្រូវរបស់អាជ្ញាធរមូលដ្ឋាន ជាពិសេសនៅពេលដែលមានការបញ្ជាក់ពីមេឃុំថា ម្ចាស់សំណង់មិនទាន់បានសុំច្បាប់។ ស្ថានភាពបែបនេះ បង្ហាញថា ការអនុវត្តច្បាប់នៅមូលដ្ឋានមិនទាន់មានប្រសិទ្ធភាពគ្រប់គ្រាន់នៅឡើយទេ។

ប្រភពមួយទៀតបានលើកឡើងថា ការអនុញ្ញាតឱ្យសំណង់អត់ច្បាប់បន្តរីករាលដាល អាចបង្កផលប៉ះពាល់យ៉ាងធ្ងន់ដល់សុវត្ថិភាពសាធារណៈ សណ្ដាប់ធ្នាប់សង្គម និងផែនការអភិវឌ្ឍរយៈពេលវែង ព្រមទាំងប៉ះពាល់ដល់ភាពជឿជាក់របស់ប្រជាពលរដ្ឋលើអាជ្ញាធរផងដែរ។ ប្រភពបន្ថែមថា ក្នុងបរិបទនេះ អាជ្ញាធរពាក់ព័ន្ធគួរត្រូវចុះពិនិត្យជាក់ស្តែងលើទីតាំងដែលមានការលើកឡើង អនុវត្តវិធានការតាមច្បាប់ដោយតឹងរឹង និងបង្ហាញភាពច្បាស់លាស់ចំពោះសាធារណជន។ ព្រមទាំងត្រូវពង្រឹងយន្តការត្រួតពិនិត្យជាប្រព័ន្ធ ដើម្បីទប់ស្កាត់ការកើតមានសំណង់ខុសច្បាប់ថ្មីៗ។

គួររំលឹកថា ឯកឧត្តម ហាក់ សុខមករា អភិបាលរងខេត្តកណ្ដាល បានសង្កត់ធ្ងន់ក្នុងកិច្ចប្រជុំកន្លងមកថា ការគ្រប់គ្រងសំណង់ត្រូវអនុវត្តឱ្យបានម៉ឺងម៉ាត់ និងត្រឹមត្រូវ ដើម្បីធានាសុវត្ថិភាព និងការអភិវឌ្ឍប្រកបដោយរបៀបរៀបរយ។ ដូច្នេះ ការអនុវត្តជាក់ស្តែងនៅមូលដ្ឋាន គឺជាចំណុចសំខាន់ដែលមិនអាចមើលរំលងបានឡើយ៕