គ្រឿងញៀនជាង៤៤គីឡូក្រាម និងអាវុធខ្លី៤ដើម ត្រូវបានដកហូត

(ស្វាយរៀង)៖ កម្លាំងស្នងការដ្ឋាននគរបាលខេត្តស្វាយរៀងបានបើកប្រតិបត្តិការបង្ក្រាបបណ្ដាញជួញដូរ និងកែឆ្នៃគ្រឿងញៀន ព្រមទាំងកាន់កាប់អាវុធខុសច្បាប់មួយករណី នៅក្រុងបាវិត ដោយដកហូតគ្រឿងញៀនសរុបជាង ៤៤គីឡូក្រាម និងអាវុធខ្លី ៤ដើម។

ប្រតិបត្តិការនេះ អនុវត្តតាមបទបញ្ជាអគ្គស្នងការនគរបាលជាតិ និងការចង្អុលដឹកនាំពីថ្នាក់ដឹកនាំស្នងការដ្ឋានខេត្ត ដោយមានការសម្របសម្រួលពីតំណាងអយ្យការ កាលពីថ្ងៃទី១៨ ខែមីនា ឆ្នាំ២០២៦។ កម្លាំងជំនាញ បានសហការជាមួយនគរបាលក្រុងបាវិត ធ្វើការឃាត់ខ្លួនជនសង្ស័យចំនួន៥នាក់ ដែលមានជនបរទេសសរុប៥នាក់។

តាមការបញ្ជាក់ពីសមត្ថកិច្ច ករណីនេះត្រូវបានស្រាវជ្រាវយ៉ាងម៉ត់ចត់ មុនឈានដល់ការចុះបង្ក្រាប ដោយរកឃើញទាំងសារធាតុញៀនជាច្រើនប្រភេទ រួមមាន កេតាមីន, MDMA, ហេរ៉ូអុីន និងសារធាតុផ្សេងៗទៀត ជាមួយឧបករណ៍កែឆ្នៃពាក់ព័ន្ធ។ លើសពីនេះ ក៏មានអាវុធខ្លី ៤ដើម និងគ្រាប់កាំភ្លើងជាង ២០០គ្រាប់ ដែលបង្ហាញពីលក្ខណៈធ្ងន់ធ្ងរនៃបណ្ដាញនេះ។

បច្ចុប្បន្ន ជនសង្ស័យ និងវត្ថុតាង ត្រូវបានសមត្ថកិច្ចកំពុងកសាងសំណុំរឿង បញ្ជូនទៅសាលាដំបូងខេត្តស្វាយរៀង ដើម្បីអនុវត្តតាមនីតិវិធីច្បាប់បន្ត៕