រដ្ឋមន្ត្រីព័ត៌មានជួបរដ្ឋសភា ជំរុញព័ត៌មានពិត ប្រឆាំងព័ត៌មានក្លែងក្លាយ ដោយល្បឿន និងភាពទុកចិត្ត

(ភ្នំពេញ)៖ នៅព្រឹកថ្ងៃទី២៥ ខែមីនា ឆ្នាំ២០២៦ ឯកឧត្ដម នេត្រ ភក្ត្រា រដ្ឋមន្ត្រីក្រសួងព័ត៌មាន បានដឹកនាំក្រុមការងារចូលរួមប្រជុំជាមួយគណៈកម្មការទី៥ និងសមាជិកគណៈកម្មការចំនួន៩ នៃ រដ្ឋសភា ដើម្បីពិភាក្សាវឌ្ឍនភាពអនុវត្តច្បាប់ និងគោលនយោបាយវិស័យសារព័ត៌មាន ក្នុងនីតិកាលទី៧។

ក្នុងកិច្ចប្រជុំនេះ ដែលដឹកនាំដោយឯកឧត្ដម សួស យ៉ារ៉ា រដ្ឋមន្ត្រីបានគូសបញ្ជាក់ថា រាជរដ្ឋាភិបាលក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីបន្តធានាសិទ្ធិសេរីភាពសារព័ត៌មាន ការបញ្ចេញមតិ និងសិទ្ធិទទួលព័ត៌មានរបស់ប្រជាពលរដ្ឋ ស្របតាមរដ្ឋធម្មនុញ្ញ និងបរិបទសង្គមបច្ចុប្បន្ន។

ជាមួយគ្នានេះ ក្រសួងព័ត៌មានបានដើរតួនាទីស្នូលក្នុងការប្រយុទ្ធប្រឆាំងព័ត៌មានក្លែងក្លាយ ដោយផ្តោតលើការផ្តល់ព័ត៌មាន “ថ្មី ពិត លឿន និងទូលំទូលាយ” ដើម្បីឆ្លើយតបទាន់ពេលវេលា និងបង្កើនទំនុកចិត្តសាធារណៈ។ រដ្ឋមន្ត្រីបានបញ្ជាក់ថា គន្លឹះសំខាន់គឺ “កុំទុកឱ្យព័ត៌មានក្លែងក្លាយរស់យូរ ត្រូវដាក់ការពិតជំនួសឱ្យបានលឿន”។

ក្រសួងក៏បានពង្រឹងកិច្ចសហការជាមួយស្ថាប័នពាក់ព័ន្ធ ដើម្បីផ្ទៀងផ្ទាត់ និងបំភ្លឺព័ត៌មានដោយផ្អែកលើភស្តុតាងច្បាស់លាស់ ព្រមទាំងលើកកម្ពស់ចំណេះដឹងព័ត៌មានវិទ្យា (media literacy) ដល់សាធារណជន ឱ្យអាចបែងចែកព័ត៌មានពិត និងព័ត៌មានក្លែងក្លាយបានយ៉ាងមានប្រសិទ្ធភាព។

អង្គប្រជុំបានវាយតម្លៃថា ការឆ្លើយតបព័ត៌មានមិនពិតកាន់តែមានល្បឿន និងប្រសិទ្ធភាពខ្ពស់ ដែលជួយកាត់បន្ថយការរីករាលដាលព័ត៌មានបំភាន់ និងការពារស្ថិរភាពសង្គម។ ក្នុងន័យនេះ ការផ្សព្វផ្សាយព័ត៌មានពិតឱ្យបានលឿន ត្រឹមត្រូវ និងទុកចិត្តបាន ត្រូវបានចាត់ទុកជាគន្លឹះសម្រាប់ឈ្នះលើព័ត៌មានក្លែងក្លាយ៕