ឧបនាយករដ្ឋមន្ត្រី ស៊ុន ចាន់ថុល៖ វិស័យឯកជនជាមូលដ្ឋានសំខាន់ក្នុងការជំរុញកំណើនសេដ្ឋកិច្ចជាតិ ខណៈរាជរដ្ឋាភិបាលកម្ពុជា តែងតែផ្តល់អាទិភាពខ្ពស់ក្នុងការទទួលស្តាប់បញ្ហាប្រឈម និងដោះស្រាយឱ្យបានទាន់ពេលវេលា

(ភ្នំពេញ)៖ នៅព្រឹកថ្ងៃទី២៥ ខែមីនា ឆ្នាំ២០២៦ នៅទីស្នាក់ការក្រុមប្រឹក្សាអភិវឌ្ឍន៍កម្ពុជា ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានដឹកនាំកិច្ចប្រជុំអន្តរក្រសួង ដើម្បីពិនិត្យ និងពិភាក្សាលើសេចក្តីព្រាងរបាយការណ៍វឌ្ឍនភាព នៃការអនុវត្តវិធានការកែទម្រង់មុតស្រួចជាកញ្ចប់ ដែលបានដាក់ចេញក្នុងវេទិការាជរដ្ឋាភិបាល-ផ្នែកឯកជន លើកទី១៩ ប្រចាំឆមាសទី២ ឆ្នាំ២០២៥។

កិច្ចប្រជុំបានប្រមូលផ្តុំមន្រ្តីជាន់ខ្ពស់ពីបណ្តាក្រសួងសំខាន់ៗ ព្រមទាំងតំណាងវិស័យឯកជន និងភាគីពាក់ព័ន្ធជាច្រើន ដើម្បីពិភាក្សាយ៉ាងស៊ីជម្រៅលើយុទ្ធសាស្ត្រសំខាន់ៗ ចំនួន២ គឺ ការត្រួតពិនិត្យខ្លឹមសាររបាយការណ៍វឌ្ឍនភាព និងការពន្លឿនរៀបចំសៀវភៅណែនាំស្តីពីស្តង់ដានីតិវិធីប្រតិបត្តិ (SOP) សម្រាប់យន្តការវេទិការាជរដ្ឋាភិបាល-ផ្នែកឯកជន (G-PSF) ដែលគ្រោងបញ្ចប់ក្នុងឆមាសទី១ ឆ្នាំ២០២៦។

តាមការវាយតម្លៃរបស់អង្គប្រជុំ សេចក្តីព្រាងរបាយការណ៍វឌ្ឍនភាពបានបង្ហាញពីការអនុវត្តជាក់ស្តែងនៃវិធានការកែទម្រង់ ដែលមានទិសដៅដោះស្រាយបញ្ហាប្រឈមរបស់វិស័យឯកជន និងលើកកម្ពស់បរិយាកាសវិនិយោគនៅកម្ពុជា ឱ្យកាន់តែប្រសើរ។ ជាមួយគ្នានេះ ការរៀបចំ SOP ត្រូវបានរំពឹងថានឹងក្លាយជាគោលដៅសំខាន់មួយ ក្នុងការធានាបាននូវតម្លាភាព ប្រសិទ្ធភាព និងសមត្ថភាពសម្របសម្រួលការងាររវាងរដ្ឋ និងឯកជន។

ក្នុងបរិយាកាសពិភាក្សាដែលពោរពេញដោយស្មារតីបុរេសកម្ម អង្គប្រជុំបានបន្តផ្លាស់ប្តូរយោបល់យ៉ាងសកម្ម និងឯកភាពលើខ្លឹមសារសំខាន់ៗ ដោយគ្រោងដាក់សេចក្តីព្រាងរបាយការណ៍នេះទៅទីស្តីការគណៈរដ្ឋមន្ត្រី មុននឹងរាយការណ៍ជូនប្រមុខរាជរដ្ឋាភិបាល ក្នុងកិច្ចប្រជុំពេញអង្គនាពេលខាងមុខ។

ក្នុងឱកាសនោះ ឯកឧត្តម ស៊ុន ចាន់ថុល បានគូសរំលេចថា វិស័យឯកជនជាមូលដ្ឋានសំខាន់ក្នុងការជំរុញកំណើនសេដ្ឋកិច្ចជាតិ ខណៈរាជរដ្ឋាភិបាលកម្ពុជា តែងតែផ្តល់អាទិភាពខ្ពស់ក្នុងការទទួលស្តាប់បញ្ហាប្រឈម និងដោះស្រាយឱ្យបានទាន់ពេលវេលា។

ជាមួយនឹងការអំពាវនាវឱ្យគ្រប់ភាគីពាក់ព័ន្ធបន្តសហការយ៉ាងជិតស្និទ្ធ ឯកឧត្តមបានលើកទឹកចិត្តឱ្យបម្លែងបញ្ហាប្រឈមទៅជាឱកាស ដើម្បីជំរុញបរិយាកាសវិនិយោគនៅកម្ពុជា ឱ្យកាន់តែមានភាពរស់រវើក និងអាចប្រកួតប្រជែងបានខ្ពស់ក្នុងតំបន់៕