បន្ទាយមានជ័យចេញសេចក្តីប្រកាសពីរៀបចំដី ផ្ទះបណ្តោះអាសន្ន ជួយពលរដ្ឋរងគ្រោះតំបន់ព្រំដែន

(បន្ទាយមានជ័យ)៖ រដ្ឋបាលខេត្តបន្ទាយមានជ័យបានចេញសេចក្តីប្រកាសព័ត៌មាន ជូនដំណឹងដល់សាធារណជន និងអ្នកពាក់ព័ន្ធទាំងអស់ ពាក់ព័ន្ធករណីប្រជាពលរដ្ឋនៅតាមតំបន់ព្រំដែនកម្ពុជា–ថៃ ដែលរងផលប៉ះពាល់ដោយសារការហ៊ុំព័ទ្ធដីធ្លី មិនអាចចូលរស់នៅលើទីតាំងដើមបាន ក្នុងភូមិជាច្រើននៃស្រុកអូរជ្រៅ និងស្រុកថ្មពួក។

ក្នុងនោះ រាជរដ្ឋាភិបាលបានបង្ហាញការយកចិត្តទុកដាក់ខ្ពស់ ដោយរៀបចំគម្រោងដី និងសាងសង់ផ្ទះជាបណ្តោះអាសន្ន លើផ្ទៃដីប្រមាណ ៤០០ ហិកតា នៅស្រុកស្វាយចេក ដើម្បីផ្តល់ទីជម្រកសុវត្ថិភាព និងធានាជីវភាពបឋមជូនប្រជាពលរដ្ឋដែលរងគ្រោះ។

អាជ្ញាធរខេត្តបានបញ្ជាក់យ៉ាងច្បាស់ថា ការផ្តល់ដី និងផ្ទះនេះ មិនមែនជាការដោះដូរជាមួយដីធ្លីដើមរបស់ប្រជាពលរដ្ឋឡើយ ប៉ុន្តែជាវិធានការបណ្តោះអាសន្ន ខណៈរង់ចាំដំណោះស្រាយផ្លូវការរវាងរាជរដ្ឋាភិបាលកម្ពុជា និងភាគីថៃ ដើម្បីឲ្យប្រជាពលរដ្ឋអាចវិលត្រឡប់ទៅរស់នៅលើដីដើមវិញនៅពេលអនាគត។

សេចក្តីប្រកាសនេះក៏អំពាវនាវឲ្យប្រជាពលរដ្ឋ និងអ្នកសារព័ត៌មានទាំងអស់ទទួលយកព័ត៌មានពីប្រភពផ្លូវការ និងចូលរួមគាំទ្រដល់ការរៀបចំរបស់អាជ្ញាធរ ក្នុងការពារសន្តិសុខ និងសុខុមាលភាពរបស់ប្រជាពលរដ្ឋតំបន់ព្រំដែន៕