រដ្ឋមន្ត្រីបរិស្ថានព្រមាន “មិនលើកលែង” ចំពោះអ្នកបំផ្លាញធនធានធម្មជាតិ

(ភ្នំពេញ)៖ ក្នុងពេលដែលបទល្មើសព្រៃឈើនៅតែជាបញ្ហារសើបនៅមូលដ្ឋាន ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានបញ្ជាក់ជាថ្មីនូវជំហរម៉ឺងម៉ាត់៖ អ្នកបំផ្លាញធនធានធម្មជាតិ មិនមានសិទ្ធិគេចផុតពីច្បាប់ឡើយ។

ថ្លែងក្នុងសិក្ខាសាលាថ្ងៃទី២៤ ខែមីនា ឆ្នាំ២០២៦ នៅទីស្តីការក្រសួង ឯកឧត្តមបានរំលេចថា វិធានការគ្រប់គ្រងធនធានធម្មជាតិកំពុងត្រូវអនុវត្តយ៉ាងតឹងរ៉ឹង ស្របតាមយុទ្ធសាស្ត្ររដ្ឋាភិបាល និងគោលដៅការពារតំបន់អភិរក្ស ព្រមទាំងលើកកម្ពស់ជីវភាពសហគមន៍មូលដ្ឋាន។

ចំណុចគួរឲ្យកត់សម្គាល់ គឺការបញ្ជាឲ្យមន្ទីរបរិស្ថានខេត្តពាក់ព័ន្ធ បន្តចុះត្រួតពិនិត្យ និងទប់ស្កាត់បទល្មើសគ្រប់ប្រភេទ មិនត្រឹមតែចាប់ឃាត់គ្រឿងចក្រ ប៉ុន្តែត្រូវ “រកឲ្យឃើញអ្នកនៅពីក្រោយ” ដើម្បីយកមកទទួលខុសត្រូវតាមច្បាប់។ នេះជាសារច្បាស់ថា បណ្ដាញខាងក្រោយ មិនអាចលាក់ខ្លួនក្រោយឧបករណ៍ ឬឈ្មោះអ្នកដទៃបានទៀតទេ។

ជាមួយគ្នានេះ ក្រសួងក៏ដាក់ចេញវិធានការគ្រប់គ្រងសម្ភារដកហូត ដូចជាឈើខុសច្បាប់ ឲ្យមានប្រព័ន្ធត្រឹមត្រូវ និងយកទៅបម្រើប្រយោជន៍សហគមន៍ ជៀសវាងការបាត់បង់ ឬប្រើប្រាស់ខុសគោលបំណង។

គួររំលឹកផងដែរថា មន្រ្តីបរិស្ថានគឺជាអ្នកបម្រើជាតិ មិនមែនជាអ្នកបើកផ្លូវឲ្យបទល្មើសឡើយ។ ការអនុវត្តច្បាប់យ៉ាងម៉ឺងម៉ាត់ គឺជាចំណុចកណ្ដាលក្នុងការពារព្រៃឈើ និងធនធានធម្មជាតិឲ្យនៅសល់សម្រាប់ជំនាន់ក្រោយ៕