ហួសកំណត់ហើយ សំណង់នៅដដែល! ម្ចាស់មិនគោរពច្បាប់ ឬអាជ្ញាធរមិនអនុវត្តឲ្យម៉ឹងម៉ាត់?

(កំពង់ចាម)៖ បន្ទាប់ពីលិខិតជូនដំណឹងរបស់អភិបាលស្រុកបាធាយ កំណត់ឲ្យម្ចាស់ទីតាំងកាយអាចម៍ដី និងរុះរើរបងបេតុងដែលសង់លើដីចំណីទន្លេ ក្នុងរយៈពេល១៥ថ្ងៃ (គិតចាប់ពីថ្ងៃទី០៦ ដល់ថ្ងៃទី២០ ខែមីនា ឆ្នាំ២០២៦) ប៉ុន្តែជាក់ស្តែង សំណង់ខុសច្បាប់នៅតែឈររឹងមាំដដែល គ្មានសញ្ញាថាបានអនុវត្តតាមបទបញ្ជាឡើយ។

បញ្ហានេះ បង្កើតសំណួរធំមួយសម្រាប់សាធារណៈ៖ តើម្ចាស់សំណង់មានអំណាចលើច្បាប់ ឬអាជ្ញាធរមិនទាន់អនុវត្តវិធានការឲ្យបានម៉ឹងម៉ាត់? ព្រោះការចាក់អាចម៍ដី និងសាងសង់លើដីចំណីទន្លេ មិនត្រឹមតែជាបទល្មើសផ្លូវច្បាប់ប៉ុណ្ណោះទេ ប៉ុន្តែថែមទាំងប៉ះពាល់ដល់បរិស្ថាន និងលំនឹងធម្មជាតិយ៉ាងធ្ងន់ធ្ងរ។

ប្រជាពលរដ្ឋសង្កេតឃើញថា ប្រសិនបើការអនុវត្តច្បាប់នៅតែយឺតយ៉ាវ ឬមិនស្មើភាពគ្នា នោះនឹងបង្កើតជាគំរូអាក្រក់ ឲ្យមានការលំបាកក្នុងការគ្រប់គ្រងដីធ្លី និងធនធានធម្មជាតិនាពេលអនាគត។ ច្បាប់មិនគួរតែមានសម្រាប់តែសរសេរ ប៉ុន្តែត្រូវអនុវត្តឲ្យមានប្រសិទ្ធភាព និងស្មើភាពចំពោះមនុស្សគ្រប់រូប។

ដូច្នេះ សាធារណៈសូមអំពាវនាវឲ្យអាជ្ញាធរពាក់ព័ន្ធ ពិសេសលោក អ៊ុន ចាន់ដា អភិបាលខេត្តកំពង់ចាម ចាត់វិធានការឲ្យបានច្បាស់លាស់ និងទាន់ពេលវេលា ដើម្បីបង្ហាញថា “ច្បាប់គឺមានតម្លៃពិត” មិនមែនមានតែឯកសារប៉ុណ្ណោះទេ៕