សង្គមច្រឡំមនុស្ស តែភស្តុតាងមិនច្រឡំ! អ្នកបើកពិតត្រូវឃុំខ្លួន ខណៈកូនចៅហ្វាយស្រុកកងមាសត្រូវរួចខ្លួន!

(កណ្ដាល)៖ ពាក្យមួយឃ្លា ក្លាយជាព្យុះសង្គម! តែច្បាប់បង្ហាញអ្នកបើកពិត ករណីគ្រោះថ្នាក់ចរាចរណ៍មួយនៅខណ្ឌឫស្សីកែវ ក្លាយជាប្រធានបទក្តៅមិនត្រឹមតែដោយសារការបុកប៉ះប៉ុន្តែដោយសារការយល់ច្រឡំរបស់សាធារណជនផងដែរ។ ពេលខ្លះ អ្វីដែលមើលឃើញ មិនមែនជាការពិតទាំងស្រុងទេ។

នៅព្រឹកថ្ងៃទី២៤ ខែមីនា ឆ្នាំ២០២៦ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចឃុំខ្លួនស្ត្រីម្នាក់ជាបណ្តោះអាសន្ន បន្ទាប់ពីរកឃើញថា នាងជាអ្នកបើករថយន្តបង្កគ្រោះថ្នាក់ ក្នុងស្ថានភាពស្រវឹង និងបើកគេចខ្លួន។ ខណៈពេលដែលបុរសម្នាក់ ដែលត្រូវបានសង្គមចោទប្រកាន់ដំបូងថាជាអ្នកបើកបរ ត្រូវបានដោះលែងវិញ ព្រោះគ្មានភស្តុតាងច្បាស់លាស់បញ្ជាក់ពីបទល្មើស។

ហេតុការណ៍កើតឡើងនៅយប់ថ្ងៃទី១៨ ខែមីនា ឆ្នាំ២០២៦ នៅសង្កាត់គីឡូម៉ែត្រលេខ៦ ខណ្ឌឫស្សីកែវ បន្ទាប់ពីរថយន្តម៉ាក FORTHING មួយគ្រឿង បើកបុកម៉ូតូក្មេងប្រុសអាយុ១១ឆ្នាំ បណ្តាលឲ្យរងរបួសធ្ងន់ ហើយអូសម៉ូតូទៅមុខជាង៧០ម៉ែត្រ។ ទិដ្ឋភាពនេះ មិនត្រឹមជាគ្រោះថ្នាក់ធម្មតា ប៉ុន្តែជាការបង្ហាញពីហានិភ័យធ្ងន់ធ្ងរនៃការបើកបរក្នុងស្ថានភាពមិនមានការគ្រប់គ្រងខ្លួន។

អ្វីដែលធ្វើឲ្យសង្គមក្តៅគគុក គឺពាក្យមួយឃ្លារបស់បុរសអ្នករួមដំណើរ ដែលស្ថិតក្នុងស្ថានភាពស្រវឹងជោគជាំ បាននិយាយថា «បើងាប់សង ២ម៉ឺនដុល្លារ»។ ពាក្យនេះបានបង្កអារម្មណ៍ខឹងសម្បា ដល់ប្រជាពលរដ្ឋនៅកន្លែងកើតហេតុ រហូតនាំឲ្យមានអំពើហិង្សាប្រឆាំងវិញ។ ប៉ុន្តែច្បាប់ មិនវាស់វែងតាមអារម្មណ៍សង្គមទេ វាវាស់តាមភស្តុតាង។

ការស៊ើបអង្កេត និងកាមេរ៉ាសុវត្ថិភាព បញ្ជាក់យ៉ាងច្បាស់ថា អ្នកបើកពិត គឺស្ត្រីម្នាក់ ខណៈបុរសខាងលើស្ថិតក្នុងស្ថានភាពស្រវឹងខ្លាំង ដល់ថ្នាក់ត្រូវគេគ្រាឡើងឡាន មិនអាចបើកបរបាន។ នេះបង្ហាញថា ការវិនិច្ឆ័យតាមភ្នែក និងអារម្មណ៍ អាចនាំឲ្យសង្គមច្រឡំទិសបានយ៉ាងងាយ។

លើសពីនេះ ការរកឃើញថា អ្នកបើកមានជាតិអាល់កុល ០.៥២ mg/L និងព្យាយាមគេចខ្លួនពីកន្លែងកើតហេតុ គឺជាភស្តុតាងគ្រប់គ្រាន់សម្រាប់ការចោទប្រកាន់តាមច្បាប់ចរាចរណ៍ផ្លូវគោក។ ច្បាប់មិនមើលថា អ្នកជានរណា ឬមានផ្ទៃខាងក្រោយបែបណាទេ ប៉ុន្តែមើលតែអំពើ និងភស្តុតាង៕