សម្ដេចតេជោ ហ៊ុន សែន លើកឡើងករណីស្ត្រីម្នាក់យកប្តីពីរ អំពាវនាវឲ្យបំភ្លឺចំពោះសង្គម

(ភ្នំពេញ)៖ សម្ដេចតេជោ ហ៊ុន សែន ប្រធានព្រឹទ្ធសភាជាតិបានបង្ហាញអារម្មណ៍បុគ្គលមួយ ដោយបញ្ជាក់ថា មិនពាក់ព័ន្ធនឹងការងាររដ្ឋនោះឡើយ ប៉ុន្តែជាការយល់ឃើញផ្ទាល់ចំពោះបាតុភូតសង្គមដែលកំពុងត្រូវបានចែករំលែកយ៉ាងទូលំទូលាយលើបណ្តាញសង្គម។

សម្ដេចបានលើកឡើងអំពីស្ត្រីម្នាក់ ដែលត្រូវបានគេរាយការណ៍ថា មានប្តីពីរនាក់ក្នុងពេលតែមួយ និងរស់នៅជាមួយគ្នាដោយបើកចំហ ដូចជា ជិះរថយន្តជាមួយគ្នា ហូបបាយជាមួយគ្នា និងធ្វើការជាមួយគ្នា បង្កឲ្យមានការភ្ញាក់ផ្អើល និងជជែកវែកញែកយ៉ាងខ្លាំងក្នុងមហាជន។

ជាមួយគ្នានេះ សម្ដេចបានចោទសួរថា តើករណីនេះជាការពិតប្រាកដ ឬគ្រាន់តែជាការសម្ដែងដើម្បីទាក់ទាញអ្នកមើលប៉ុណ្ណោះ។ ប្រសិនបើជាការពិត សម្ដេចបានបង្ហាញការព្រួយបារម្ភថា វាអាចប៉ះពាល់ដល់តម្លៃប្រពៃណីសង្គមខ្មែរ ដែលផ្អែកលើគោលការណ៍គ្រួសារ “ប្តីមួយប្រពន្ធមួយ”។

សម្ដេចក៏បានបញ្ជាក់ថា ជាទូទៅ បុរសដែលមានប្រពន្ធលើសពីមួយ តែងតែធ្វើដោយលាក់លៀម ដោយខ្លាចទាំងជម្លោះគ្រួសារ ក៏ដូចជាការប៉ះទង្គិចនឹងច្បាប់ ដែលបានកំណត់យ៉ាងច្បាស់អំពីរបៀបរស់នៅក្នុងគ្រួសារ។

ក្នុងបរិបទនេះ ការលើកឡើងរបស់សម្ដេច មិនត្រឹមតែជាការចែករំលែកទស្សនៈផ្ទាល់ទេ ប៉ុន្តែថែមទាំងជាការបញ្ជាក់ពីសារៈសំខាន់នៃការគោរពច្បាប់ និងតម្លៃសង្គម។ ជាពិសេស ស្របតាមមាត្រា ៤៥ នៃរដ្ឋធម្មនុញ្ញ ដែលធានាសិទ្ធិស្មើភាពរវាងបុរស និងស្ត្រី ប៉ុន្តែអាពាហ៍ពិពាហ៍ត្រូវអនុវត្តតាមលក្ខខណ្ឌច្បាប់ និងគោលការណ៍ស្ម័គ្រចិត្ត “ប្តីមួយប្រពន្ធមួយ”។

ជាអ្នកដឹកនាំមានបទពិសោធន៍យូរឆ្នាំ សម្ដេចតេជោក៏បានអំពាវនាវឲ្យសាមីខ្លួន ឬអ្នកពាក់ព័ន្ធ ចេញមុខបំភ្លឺបញ្ហានេះ ប្រសិនបើអាចធ្វើទៅបាន ដើម្បីបញ្ចប់ការយល់ច្រឡំ និងរក្សាបាននូវតម្លៃសង្គមខ្មែរ៕