ឯកឧត្តម គួច ចំរើន៖ សង្គ្រាមសម័យថ្មី ត្រូវការយោធិនឆ្លាតបច្ចេកវិទ្យា

(កណ្ដាល)៖ ឯកឧត្តម គួច ចំរើន បានលើកទឹកចិត្តយោធិនកងរាជអាវុធហត្ថថ្មី ឱ្យខិតខំសិក្សាបច្ចេកវិទ្យា និងសម្រួចចិត្តក្នុងការហ្វឹកហាត់ ដោយបញ្ជាក់ថា “សង្គ្រាមសម័យបច្ចុប្បន្ន គឺជាសមរភូមិបច្ចេកវិទ្យា”។

ការលើកឡើងឯកឧត្តម គួច ចំរើន អភិបាលខេត្តកណ្ដាល ធ្វើឡើងក្នុងឱកាសអញ្ជើញជូនដំណើរយោធិនថ្មី ១៥នាក់ ចូលហ្វឹកហ្វឺននៅវិទ្យាស្ថានកងរាជអាវុធហត្ថ កាលពីព្រឹកថ្ងៃទី២៣ ខែមីនា ឆ្នាំ២០២៦ នៅខេត្តកណ្ដាល។

ឯកឧត្តមបានបញ្ជាក់ថា ការយល់ដឹងបច្ចេកវិទ្យា គឺជាគន្លឹះការពារបូរណភាពទឹកដី និងអាចជួយបញ្ចៀសហានិភ័យ ព្រមទាំងបង្កើនសមត្ថភាពប្រយុទ្ធឱ្យមានប្រសិទ្ធភាពខ្ពស់។

ជាមួយគ្នានេះ ឯកឧត្តមក៏បានអបអរសាទរយុទ្ធជនស្ម័គ្រចិត្ត ដែលបានជាប់ជ្រើសរើស និងរំលឹកឱ្យគោរពវិន័យ សាមគ្គីភាព និងខិតខំហ្វឹកហាត់ ដើម្បីក្លាយជាកម្លាំងរឹងមាំក្នុងការការពារសន្តិសុខ និងបង្ក្រាបបទល្មើសនៅមូលដ្ឋាន៕