បង្ក្រាបទីតាំង Online Scam នៅសែនសុខ ឃាត់ខ្លួន៤៩នាក់

(ភ្នំពេញ)៖ កម្លាំងនគរបាលរាជធានីភ្នំពេញ បានបើកប្រតិបត្តិការបង្ក្រាបសំបុកឆបោកតាមប្រព័ន្ធបច្ចេកវិទ្យា នៅសណ្ឋាគារមួយក្នុងខណ្ឌសែនសុខ កាលពីរសៀលថ្ងៃទី២២ មីនា ២០២៦ ដោយឃាត់ខ្លួនជនសង្ស័យសរុប៤៩នាក់ និងដកហូតសម្ភារៈជាច្រើនពាក់ព័ន្ធបទល្មើស។

ប្រតិបត្តិការនេះធ្វើឡើងក្រោមការដឹកនាំរបស់អាជ្ញាធររាជធានីភ្នំពេញ និងសម្របសម្រួលដោយតំណាងអយ្យការ ខណៈវត្ថុតាងដកហូតមានកុំព្យូទ័រ ទូរស័ព្ទដៃជាច្រើនរយគ្រឿង និងស៊ីមកាតបរទេស។

ការស៊ើបអង្កេតបឋមបង្ហាញថា ក្រុមជនសង្ស័យបានប្រើប្រាស់កម្ពុជា ជាគោលដៅបង្កើតគម្រោង “វិនិយោគក្លែងក្លាយ” ដើម្បីឆបោកជនរងគ្រោះនៅក្រៅប្រទេស ជាពិសេសប្រទេសម៉ាឡេស៊ី ហើយទើបផ្លាស់ទីតាំងពីខេត្តត្បូងឃ្មុំ។

បច្ចុប្បន្ន សមត្ថកិច្ចកំពុងបន្តនីតិវិធីច្បាប់ និងស្រាវជ្រាវរកមេខ្លោង ខណៈរាជរដ្ឋាភិបាលក្រោមការដឹកនាំរបស់ ហ៊ុន ម៉ាណែត ប្តេជ្ញាបង្ក្រាបបទល្មើសបច្ចេកវិទ្យាឲ្យអស់ ដោយមិនអនុញ្ញាតឲ្យកម្ពុជាក្លាយជាទីជម្រកឧក្រិដ្ឋជនឡើយ៕