មន្ត្រីល្អនៅមូលដ្ឋាន! លោក ម៉េង ស្រ៊ុន ចុះដល់មូលដ្ឋាន បម្រើប្រជាជន ដោយចិត្តស្មោះ!

(កំពង់ស្ពឺ)៖ នៅព្រឹកថ្ងៃទី២២ ខែមីនា ឆ្នាំ២០២៦ ស្ថិតនៅឃុំអមលាំង ស្រុកថ្ពង ខេត្តកំពង់ស្ពឺ លោក ម៉េង ស៊្រុន មេបញ្ជាការកងរាជអាវុធហត្ថខេត្តកំពង់ស្ពឺ និងជាសមាជិកអចិន្ត្រៃយ៍គណៈកម្មាធិការគណបក្សខេត្តបានបន្តបង្ហាញពីតួនាទីជាមេដឹកនាំសកម្ម និងពោរពេញដោយការទទួលខុសត្រូវខ្ពស់ ដោយដឹកនាំក្រុមការងារចុះមូលដ្ឋាន សហការជាមួយអាជ្ញាធរស្រុកថ្ពង រួមមានអភិបាលស្រុក អភិបាលរង អធិការដ្ឋាននគរបាល និងរដ្ឋបាលឃុំ អញ្ជើញចុះពិនិត្យ និងជំរុញការអនុវត្តយុទ្ធនាការបន្តសុពលភាពអត្តសញ្ញាណប័ណ្ណសញ្ជាតិខ្មែរ។

យុទ្ធនាការនេះ ផ្តោតលើការផ្តល់សេវាជូនប្រជាពលរដ្ឋនៅក្នុងភូមិទាំង១៧ នៃឃុំអមលាំង ដោយរៀបចំទីតាំងសេវានៅប៉ុស្តិ៍នគរបាលរដ្ឋបាលឃុំ ដើម្បីបន្តសុពលភាពអត្តសញ្ញាណប័ណ្ណដែលផុតកំណត់ ក៏ដូចជាជំរុញឱ្យប្រជាពលរដ្ឋគ្រប់អាយុដែលមិនទាន់មានអត្តសញ្ញាណប័ណ្ណ អញ្ជើញមកធ្វើថ្មី និងដោះស្រាយឯកសារពាក់ព័ន្ធផ្សេងៗឱ្យបានគ្រប់លក្ខខណ្ឌ។សកម្មភាពនេះបានជួយកាត់បន្ថយភាពលំបាក និងចំណាយពេលវេលារបស់ប្រជាពលរដ្ឋ ឱ្យទទួលបានសេវាសាធារណៈយ៉ាងងាយស្រួល និងមានប្រសិទ្ធភាពខ្ពស់។

ក្នុងនាមជាមន្ត្រីគណបក្សប្រជាជនកម្ពុជា លោក ម៉េង ស៊្រុន ត្រូវបានគេគោរពថា ជាមេដឹកនាំគំរូ ដែលមានទាំងសមត្ថភាព ស្មោះត្រង់ និងមានចិត្តស្រឡាញ់ប្រជាពលរដ្ឋយ៉ាងជ្រាលជ្រៅ។ សកម្មភាពជាក់ស្តែងរបស់លោកនៅមូលដ្ឋាន គឺជាភស្តុតាងច្បាស់លាស់នៃការបម្រើប្រជាជនដោយចិត្តស្មោះ និងជួយពង្រឹងជំនឿរបស់ប្រជាពលរដ្ឋចំពោះអាជ្ញាធរ។

ក្នុងឱកាសនោះដែរ លោកបានអំពាវនាវដល់បងប្អូនប្រជាពលរដ្ឋទាំងអស់ សូមបន្តចូលរួមផ្សព្វផ្សាយ និងជួយប្រាប់ដល់អ្នកដែលមិនទាន់បានធ្វើអត្តសញ្ញាណប័ណ្ណ ឱ្យអញ្ជើញមកបំពេញបែបបទឱ្យបានគ្រប់គ្នា និងទាន់ពេលវេលា ដើម្បីធានាសិទ្ធិស្របច្បាប់ និងភាពងាយស្រួលក្នុងការប្រើប្រាស់សេវាសាធារណៈនានា។

ជាមួយគ្នានេះផងដែរ លោក ម៉េង ស៊្រុន ក៏បានថ្លែងអំណរគុណ និងកោតសរសើរខ្ពស់ចំពោះក្រុមការងារគ្រប់លំដាប់ថ្នាក់ ដែលបានខិតខំបំពេញភារកិច្ចដោយវិជ្ជាជីវៈ និងការទទួលខុសត្រូវខ្ពស់។

ដើម្បីជាការលើកទឹកចិត្ត លោកក៏បានប្រគល់ថវិកាចំនួន ១,៤០០,០០០ រៀល ទឹកបរិសុទ្ធ៣០កេះ និងនំ២០ប្រអប់ធំ ជូនដល់ក្រុមការងារ ដែលកំពុងបម្រើការងារយ៉ាងខិតខំក្នុងយុទ្ធនាការនេះផងដែរ។

សកម្មភាពដ៏មានអត្ថន័យនេះ បានបញ្ជាក់ថា មេដឹកនាំល្អ គឺមិនត្រឹមតែដឹកនាំដោយពាក្យសំដីប៉ុណ្ណោះទេ ប៉ុន្តែត្រូវអនុវត្តដោយសកម្មភាពជាក់ស្តែង និងការយកចិត្តទុកដាក់ចំពោះប្រជាពលរដ្ឋជាអាទិភាព។

មន្ត្រីល្អ កើតចេញពីការបម្រើប្រជាជនដោយចិត្តស្មោះ លោក ម៉េង ស៊្រុន គឺជាគំរូដ៏ល្អប្រសើរដែលគួរឲ្យគោរព និងគាំទ្រយ៉ាងខ្ពង់ខ្ពស់៕