បង្ក្រាបដូចភ្លើងឆេះស្មៅ! ល្បែងស៊ីសងអនឡាញខណ្ឌដូនពេញ បិទមិនទាន់ត្រជាក់ បើកវិញបាត់

(ភ្នំពេញ)៖ ករណីល្បែងស៊ីសងខុសច្បាប់តាមប្រព័ន្ធអនឡាញ នៅតាមបណ្តោយផ្លូវលេខ១៥ ក្នុងសង្កាត់ផ្សារកណ្ដាល ខណ្ឌដូនពេញ កំពុងត្រូវបានមហាជនលើកឡើងជាថ្មី បន្ទាប់ពីអាជ្ញាធរធ្លាប់ចុះបង្ក្រាប “ដូចភ្លើងឆេះស្មៅ” ប៉ុន្តែបច្ចុប្បន្ន ត្រូវបានរាយការណ៍ថា បានលបលួចបើកដំណើរការឡើងវិញយ៉ាងស្ងៀមស្ងាត់។

ប្រភពពីប្រជាពលរដ្ឋនៅតំបន់នោះ បានបង្ហើបថា ទីតាំងល្បែងនេះ មិនមែនជាល្បែងធម្មតាទេ ប៉ុន្តែសង្ស័យជាប្រភេទ Online ដែលអាចបង្កប់ការឆបោកតាមប្រព័ន្ធអនឡាញ មានទាំងជនបរទេស និងខ្មែរ ចូលលេងយ៉ាងគគ្រឹកគគ្រេង មិនថាយប់ឬថ្ងៃឡើយ។

សូមរំលឹកថា ប្រមុខរាជរដ្ឋាភិបាលកម្ពុជា បានដាក់បទបញ្ជាយ៉ាងតឹងរឹងឲ្យបង្ក្រាបល្បែងស៊ីសង និងសកម្មភាពស្គែមអនឡាញ “ដាច់ខាតមិនឲ្យសេសសល់” ខណៈអាជ្ញាធររាជធានីភ្នំពេញ ក៏បានបន្តអនុវត្តយ៉ាងសកម្មផងដែរ។ ប៉ុន្តែអ្វីដែលកំពុងធ្វើឲ្យមហាជនភ្ញាក់ផ្អើល គឺមន្ត្រីថ្នាក់ក្រោមខ្លះ នៅតែបង្ហាញភាពអសកម្ម ហាក់បីដូចជាបណ្ដោយឲ្យបទល្មើសបន្តដំណើរការ។

ទីតាំងដែលស្ថិតនៅផ្លូវលេខ១៥ កែងផ្លូវលេខ១១៨ សង្កាត់ផ្សារចាស់ ត្រូវបានគេរាយការណ៍ថា ជាគន្លងដ៏សកម្មនៃល្បែងអនឡាញ មានការភ្នាល់ជាច្រើនប្រភេទដូចជា បាល់ បៀ ឡូតូ និងឆ្នោត។ ប្រភពខ្សឹបថា សកម្មភាពទាំងនេះភាគច្រើនពាក់ព័ន្ធនឹងការឆបោកប្រាក់ពីអ្នកលេងតាមអនឡាញ។

គួរឲ្យចាប់អារម្មណ៍ថា មុននេះអាជ្ញាធរខណ្ឌដូនពេញ ក្រោមការដឹកនាំរបស់លោក ជា ខេមា ធ្លាប់អះអាងថា បានបិទទីតាំងនេះរួចហើយ ប៉ុន្តែស្ថានភាពពិតវិញ គឺកំពុងដំណើរការឡើងវិញ ដោយគ្មានការបង្ក្រាបជាក់ស្តែង។

មិនត្រឹមតែប៉ុណ្ណោះ កម្លាំងនគរបាលខណ្ឌដូនពេញ ដែលដឹកនាំដោយលោកវរសេនីយ៍ឯក ទៀង ច័ន្ទសា ក៏ត្រូវបានប្រជា ពលរដ្ឋរិះគន់ថា ហាក់ដូចជាធ្វើមិនដឹងមិនឮចំពោះបញ្ហានេះ ទាំងដែលជាបទល្មើសធ្ងន់ធ្ងរ និងផ្ទុយនឹងបទបញ្ជាថ្នាក់ដឹកនាំ។

ជុំវិញករណីនេះ មហាជនបានលើ់កជាសំណួរថា តើហេតុអ្វីបានជាទីតាំងល្បែងអនឡាញដ៏ធំមួយនេះ អាចបន្តដំណើរការបានយ៉ាងរលូន? និងតើមានការបិទបាំង ឬផលប្រយោជន៍ណាមួយនៅពីក្រោយឬទេ?

មហាជនសូមអំពាវនាវដល់អាជ្ញាធរខណ្ឌដូនពេញ អាជ្ញាធររាជធានីភ្នំពេញ និងស្នងការដ្ឋាននគរបាលរាជធានីភ្នំពេញ ចាត់វិធានការយ៉ាងតឹងរ៉ឹង និងពិនិត្យជាក់ស្តែងចំពោះទីតាំងខាងលើនេះ ដើម្បីបញ្ចប់បញ្ហា និងរក្សាសុវត្ថិភាពសង្គមឲ្យមានប្រសិទ្ធភាព៕