កូនប្រុសចេញមុខការពារកិត្តិយសម្ដាយជាចៅសង្កាត់ព្រែកថ្មី ក្រោយមានការចុះផ្សាយពាក់ព័ន្ធនឹងការរៀបចំបរិស្ថាន សណ្ដាប់ធ្នាប់ ការគ្រប់គ្រងឡានដឹកខ្សាច់ និងដេប៉ូខ្សាច់

គួរជម្រាបជូនផងដែរថា បើនិយាយពីសណ្ដាប់ធ្នាប់ និងបរិស្ថាននៅសង្កាត់ព្រែកថ្មីនៃខណ្ឌច្បារអំពៅបច្ចប្បន្ននេះពិតជាកំពុងរងសម្ពាធខ្លាំងដែលទាមទារឱ្យអាជ្ញាធរមូលដ្ឋានគួរចូលរួមដោះស្រាយជាបន្ទាន់ពិតមែន។ បញ្ហាសណ្ដាប់ធ្នាប់ និងបរិស្ថាននៅតំបន់សាធារណៈក្នុងសង្កាត់ព្រែកថ្មី ខណ្ឌច្បារអំពៅ កំពុងក្លាយជាការព្រួយបារម្ភរបស់ប្រជាពលរដ្ឋ ខណៈសកម្មភាពរថយន្តដឹកដី និងខ្សាច់ធ្វើចរាចរណ៍យ៉ាងច្រើនជាបន្តបន្ទាប់ នៅក្បែររង្វង់មូលស្ពានព្រែកសំរោង ត្រើយខាងកើត។

តាមការសង្កេតជាក់ស្ដែង មានរថយន្តដឹកដី និងខ្សាច់រាប់រយជើងក្នុងមួយថ្ងៃ បើកឆ្លងកាត់តំបន់នេះទាំងយប់ទាំងថ្ងៃ ដោយមិនមានវិធានការគ្រប់គ្រងតឹងរ៉ឹង។ សកម្មភាពនេះបានបង្កឲ្យមានការប៉ះពាល់យ៉ាងច្បាស់លាស់ដល់បរិស្ថាន និងសណ្ដាប់ធ្នាប់សាធារណៈ ដូចជា ខ្សាច់ និងដីធូលីហុយរាលដាល បង្កការរំខានដល់អ្នកធ្វើដំណើរ និងប្រជាពលរដ្ឋរស់នៅជុំវិញតំបន់។

មិនត្រឹមតែប៉ុណ្ណោះ ករណីនេះក៏បង្កហានិភ័យគ្រោះថ្នាក់ចរាចរណ៍ផងដែរ ពិសេសពេលផ្លូវរអិលដោយសារខ្សាច់ធ្លាក់ចុះ ឬធូលីហុយចូលភ្នែកអ្នកបើកបរ ដែលអាចនាំឲ្យបាត់បង់ការគ្រប់គ្រងយានយន្ត។ ជាក់ស្ដែង ប្រជាពលរដ្ឋមួយចំនួនបានបញ្ជាក់ថា ករណីគ្រោះថ្នាក់តូចធំបានកើតមានជាញឹកញាប់ ប៉ុន្តែមិនទាន់មានវិធានការការពារយ៉ាងមានប្រសិទ្ធភាពនៅឡើយទេ។

លើសពីនេះ ផ្លូវនៅតំបន់ខាងលើក៏កំពុងរងការខូចខាតយ៉ាងធ្ងន់ធ្ងរ ដោយសារការធ្វើចរាចរណ៍រថយន្តធុនធ្ងន់ជាបន្តបន្ទាប់។ ស្ថានភាពនេះមិនត្រឹមប៉ះពាល់ដល់គុណភាពផ្លូវប៉ុណ្ណោះទេ ប៉ុន្តែថែមទាំងបង្កការលំបាកក្នុងការធ្វើដំណើររបស់ប្រជាពលរដ្ឋប្រចាំថ្ងៃផងដែរ។

មតិសាធារណៈបានលើកឡើងថា មន្ត្រីមូលដ្ឋានសង្កាត់ព្រែកថ្មី និងមន្ត្រីរដ្ឋបាលខណ្ឌច្បារអំពៅ គួរតែយកចិត្តទុកដាក់ និងចូលរួមដោះស្រាយបញ្ហានេះឲ្យបានតឹងរ៉ឹងជាងមុន ដោយដាក់ចេញវិធានការគ្រប់គ្រងច្បាស់លាស់លើរថយន្តដឹកដីខ្សាច់ ដូចជា កំណត់ម៉ោងចរាចរណ៍ បញ្ជាឲ្យគ្របទំនិញឲ្យបានត្រឹមត្រូវ និងពង្រឹងការត្រួតពិនិត្យអនុវត្តច្បាប់។

ការរក្សាសណ្ដាប់ធ្នាប់ និងបរិស្ថាននៅទីសាធារណៈ គឺជាកាតព្វកិច្ចសំខាន់របស់អាជ្ញាធរ ដើម្បីធានាសុវត្ថិភាព និងគុណភាពជីវិតរបស់ប្រជាពលរដ្ឋ។ ប្រសិនបើមិនមានការចាត់វិធានការដែលមានប្រសិទ្ធភាពទេ បញ្ហានេះអាចនឹងកាន់តែធ្ងន់ធ្ងរ និងប៉ះពាល់យូរអង្វែងដល់សហគមន៍ទាំងមូល៕