ល្បែងស៊ីសងខុសច្បាប់ផ្ទុះកណ្ដាលក្រុងបាត់ដំបង! អាជ្ញាធរមើលរំលង ឬមានអ្វីលាក់បាំងនៅពីក្រោយ?
(បាត់ដំបង)៖ ក្នុងរយៈពេលចុងក្រោយនេះ បញ្ហាល្បែងស៊ីសងខុសច្បាប់នៅក្រុងបាត់ដំបងកំពុងក្លាយជាប្រធានបទក្តៅ ដែលមហាជននាំគ្នាលើកឡើងយ៉ាងច្រើន។ ពិសេសនៅតំបន់សង្កាត់ចំការសំរោង ត្រូវបានរាយការណ៍ថា មានវង់ល្បែង “ម៉ែអាង៉ោ” ដំណើរការយ៉ាងគគ្រឹកគគ្រេង មានទាំងអាប៉ោង បៀរ និងល្បែងផ្សេងៗ ទាក់ទាញអ្នកចូលលេងមិនតិច។
អ្វីដែលធ្វើឲ្យមហាជនភ្ញាក់ផ្អើល មិនមែនគ្រាន់តែសកម្មភាពល្បែងនោះទេ ប៉ុន្តែជាការដំណើរការយ៉ាងបើកចំហ ដោយមិនឃើញមានវិធានការបង្ក្រាបពីអាជ្ញាធរមានសមត្ថកិច្ចឡើយ។ ប្រភពពីអ្នកចូលលេងបានបញ្ជាក់ថា ចំនួនអ្នកលេងកើនឡើងជាបន្តបន្ទាប់ ហើយបរិយាកាសនៅទីនោះ “មានសុវត្ថិភាព” ដល់ថ្នាក់មិនភ័យខ្លាចការចាប់ខ្លួន។ សំណួរមួយត្រូវបានលើកឡើងថា តើមានអ្វីនៅពីក្រោយភាពស្ងប់ស្ងាត់នេះ?
មិនត្រឹមតែវង់ល្បែងបែបប្រពៃណីទេ បណ្តាញឆ្នោតយួន ឬកន្ទុយលេខ ក៏ត្រូវបានគេរាយការណ៍ថា កំពុងដំណើរការយ៉ាងសកម្មនៅចំណុចជាច្រើនក្នុងក្រុងដែរ។ ប្រជាពលរដ្ឋបានអះអាងថា មានការរៀបចំជាបណ្ដាញ មានមេខ្សែប្រមូលលេខ និងបញ្ជូនបន្តទៅក្រៅ ប្រតិបត្តិការជារៀងរាល់ថ្ងៃ ដោយមិនមានការរារាំងអ្វីឡើយ។
សម្រាប់ប្រជាពលរដ្ឋរស់នៅជុំវិញតំបន់ទាំងនេះ ក្តីបារម្ភកាន់តែច្រើនឡើង ព្រោះល្បែងស៊ីសងមិនត្រឹមតែប៉ះពាល់ដល់សេដ្ឋកិច្ចគ្រួសារ ប៉ុន្តែអាចបង្កឲ្យមានបទល្មើសផ្សេងៗ និងអសន្តិសុខសង្គម។ ពួកគេបានលើកឡើងថា សកម្មភាពបែបនេះផ្ទុយនឹងគោលការណ៍របស់ក្រសួងមហាផ្ទៃ ដែលតែងតែជំរុញឲ្យមានការបង្ក្រាបល្បែងស៊ីសងខុសច្បាប់។
យ៉ាងណាមិញ ការឆ្លើយតបពីលោកស័ក្ដ៥ ពេជ្រ សារ៉ែន អធិការនគរបាលក្រុងបាត់ដំបងថា “បានធ្វើកិច្ចសន្យាហើយ” ហាក់មិនអាចបំបាត់ការសង្ស័យរបស់មហាជនបានឡើយ ព្រោះសកម្មភាពនៅតែបន្តកើតមានជាក់ស្តែង។ កាន់តែធ្ងន់ធ្ងរជាងនេះទៅទៀត ករណីដែលអ្នកសារព័ត៌មានមិនអាចទទួលបានព័ត៌មានបន្ថែម និងត្រូវបានបិទការទំនាក់ទំនងពីលោកស័ក្ដ៥ ពេជ្រ សារ៉ែន បានបង្កឲ្យមានសំណួរថា តើមានអ្វីដែលត្រូវលាក់លៀម?
បញ្ហានេះមិនមែនជារឿងតូចទេ។ វាសំដៅទៅលើភាពជឿជាក់របស់ប្រជាពលរដ្ឋលើការអនុវត្តច្បាប់ និងតួនាទីរបស់អាជ្ញាធរ។ ប្រសិនបើមិនមានការចុះស្រាវជ្រាវ និងអនុវត្តច្បាប់យ៉ាងតឹងរ៉ឹងទេ នោះល្បែងស៊ីសងអាចនឹងបន្តរីករាលដាល និងបង្កផលប៉ះពាល់យ៉ាងធ្ងន់ធ្ងរដល់សង្គម។
ដូច្នេះ មហាជនកំពុងរង់ចាំឃើញចម្លើយជាក់ស្តែងពីអាជ្ញាធរ និងសមត្ថកិច្ចពាក់ព័ន្ធ ថាតើនឹងមានវិធានការដាច់ខាត ដើម្បីបញ្ឈប់សកម្មភាពល្បែងស៊ីសងខុសច្បាប់ទាំងនេះ ឬបន្តឱ្យកើតមានក្រោមភាពស្ងៀមស្ងាត់ដដែល៕
