រន្ធត់! ការខូចខាតប្រាសាទព្រះវិហារ លើសការរំពឹងទុក រដ្ឋមន្ត្រី ភឿង សកុណា ចុះពិនិត្យផ្ទាល់

(ព្រះវិហារ)៖ កាលពីថ្ងៃទី២០ ខែមីនា ឆ្នាំ២០២៦ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញដឹកនាំប្រតិភូជាន់ខ្ពស់ ចុះពិនិត្យ និងវាយតម្លៃស្ថានភាពខូចខាតនៅ ប្រាសាទព្រះវិហារ ដែលបណ្តាលមកពីជម្លោះប្រដាប់អាវុធកាលពីខែកក្កដា និងខែធ្នូ ឆ្នាំ២០២៥ កន្លងទៅ។ ក្នុងដំណើរបេសកកម្មនេះ មានការចូលរួមពីឯកឧត្តម គីម រិទ្ធី អភិបាលខេត្តព្រះវិហារ ឯកឧត្តម គង់ ពុទ្ធិការ អគ្គនាយកអាជ្ញាធរជាតិព្រះវិហារ ឯកឧត្តម ហង់ ពៅ អគ្គនាយកអាជ្ញាធរជាតិអប្សរា ព្រមទាំងមន្ត្រីជំនាញពាក់ព័ន្ធជាច្រើនរូប។

ក្នុងអំឡុងពេលចុះពិនិត្យផ្ទាល់ លោកជំទាវបណ្ឌិតសភាចារ្យ និងប្រតិភូទាំងអស់ បានសម្តែងនូវមនោសញ្ចេតនារន្ធត់ ក្តុកក្តួល និងតក់ស្លុតយ៉ាងខ្លាំង ចំពោះការខូចខាតដ៏ធំធេងលើបេតិកភណ្ឌពិភពលោកមួយនេះ ដែលជាសម្បត្តិរួមរបស់មនុស្សជាតិទាំងមូល។ លោកជំទាវរដ្ឋមន្ត្រីបានគូសបញ្ជាក់ថា ការខូចខាត បាក់បែក ដែលបានឃើញដោយផ្ទាល់ភ្នែក មានទំហំធ្ងន់ធ្ងរជាងរបាយការណ៍ដែលបានកត់ត្រាមុននេះយ៉ាងច្រើន ដោយរបាយការណ៍ចាស់បានបង្ហាញពីការខូចខាតសរុបចំនួន ៥៦២កន្លែង ប៉ុន្តែការពិនិត្យជាក់ស្តែងបង្ហាញថា មានទំហំខូចខាតលើសពីនេះជាច្រើនដង។

លោកជំទាវក៏បានរំលឹកថា បេតិកភណ្ឌវប្បធម៌ គឺជាតម្លៃរួមរបស់មនុស្សជាតិ ហើយគ្រប់ប្រទេសទាំងអស់មានកាតព្វកិច្ចការពារ និងថែរក្សា មិនឲ្យក្លាយជាគោលដៅនៃការវាយប្រហារ ទោះស្ថិតក្នុងកាលៈទេសៈណាក៏ដោយ ដោយផ្អែកលើគោលការណ៍នៃ UNESCO តាមអនុសញ្ញាឆ្នាំ១៩៧២ ស្តីពីបេតិកភណ្ឌពិភពលោក និងអនុសញ្ញាឆ្នាំ១៩៥៤ ស្តីពីការការពារសម្បត្តិបេតិកភណ្ឌវប្បធម៌ក្នុងពេលមានជម្លោះប្រដាប់អាវុធ។

គួរបញ្ជាក់ថា ប្រាសាទព្រះវិហារ បានរងការខូចខាតចំនួន ១៤២កន្លែង ក្នុងការវាយប្រហារកាលពីខែកក្កដា ហើយបានបន្ថែមចំនួន ៤២០កន្លែងទៀត បន្ទាប់ពីខែធ្នូ ឆ្នាំ២០២៥ ដោយការខូចខាតរាលដាលចាប់ពីចំណុចពើយតាឌី តាមរយៈគោបុរៈទី១ ដល់គោបុរៈទី៥ រួមទាំងការខូចខាតលើការដ្ឋានគម្រោងសហប្រតិបត្តិការរបស់ប្រទេសឥណ្ឌា នៅគោបុរៈទី៥ ការដ្ឋានជួសជុលជណ្តើរខាងជើង ដែលជាជំនួយរបស់ស្ថានទូតសហរដ្ឋអាមេរិក និងវត្តកែវសិក្ខាគិរីស្វរៈផងដែរ។

ហេតុការណ៍នេះ មិនត្រឹមតែប៉ះពាល់ដល់បេតិកភណ្ឌជាតិប៉ុណ្ណោះទេ ប៉ុន្តែជាការប៉ះពាល់ដល់មរតកវប្បធម៌ពិភពលោក ដែលតម្រូវឲ្យមានការយកចិត្តទុកដាក់ និងការសហការពីសហគមន៍អន្តរជាតិ ដើម្បីការពារ ថែរក្សា និងស្តារឡើងវិញឲ្យបានគង់វង្សសម្រាប់ជំនាន់ក្រោយ៕