ដំណឹងល្អ! ផ្លូវជាតិលេខ៧ ពីស្គន់–ក្រុងកំពង់ចាម សម្រេចជិត ៩០% 

(ភ្នំពេញ)៖ គម្រោងពង្រីក និងលើកកម្រិតផ្លូវជាតិលេខ៧ ជាបួនគន្លង ដែលភ្ជាប់ពីស្គន់ ទៅក្រុងកំពង់ចាម ខេត្តកំពង់ចាម កំពុងឈានទៅដល់ដំណាក់កាលបញ្ចប់ ដោយសម្រេចលទ្ធផលការងារបានជិត ៩០% ហើយ គិតត្រឹមខែមីនា ឆ្នាំ២០២៦នេះ។

គម្រោងមានប្រវែងសរុបប្រមាណ ៤៥,៥០៤ គីឡូម៉ែត្រ កំពុងអនុវត្តយ៉ាងរលូន និងមានល្បឿនលឿនខ្លាំង ដោយក្រុមការងារបានដាក់កម្លាំងពេញទំហឹង ដើម្បីបញ្ចប់ឲ្យបានមុនផែនការដែលបានគ្រោងទុក និងអាចដាក់ឲ្យប្រើប្រាស់ក្នុងឆ្នាំ២០២៦នេះ។

ផ្លូវជាតិលេខ៧ ត្រូវបានគេចាត់ទុកថាជាខ្សែផ្លូវសំខាន់មួយ សម្រាប់សេដ្ឋកិច្ចជាតិ ព្រោះវាមានតួនាទីដូចជា “សរសៃឈាម” ក្នុងការភ្ជាប់តំបន់ផលិតកម្ម ទីប្រជុំជន និងទីផ្សារ។ ការពង្រីកទៅជាបួនគន្លង នឹងធ្វើឲ្យការធ្វើដំណើរកាន់តែងាយស្រួល សុវត្ថិភាព និងលឿនរហ័ស កាត់បន្ថយពេលវេលា និងថ្លៃដើមដឹកជញ្ជូន។

មិនត្រឹមតែប៉ុណ្ណោះ គម្រោងនេះក៏ជាគន្លឹះសំខាន់ក្នុងការជំរុញវិស័យកសិកម្ម កសិ-ឧស្សាហកម្ម និងទេសចរណ៍ ឲ្យកាន់តែរីកចម្រើន ព្រមទាំងលើកកម្ពស់សកម្មភាពសេដ្ឋកិច្ច-សង្គមនៅតាមបណ្តោយខ្សែផ្លូវឲ្យកាន់តែមានជីវិតជីវា។

ជាមួយនឹងការអភិវឌ្ឍយ៉ាងឆាប់រហ័សនេះ ផ្លូវជាតិលេខ៧ កំពុងក្លាយជាគម្រោងគំរូមួយ ដែលបង្ហាញពីសក្តានុពល និងចក្ខុវិស័យរបស់កម្ពុជា ក្នុងការកសាងហេដ្ឋារចនាសម្ព័ន្ធសម្រាប់អនាគត៕