ស្នងការខេត្តកណ្ដាលដឹកនាំកម្លាំងអមដំណើរ អភិបាលខេត្ត ពង្រឹងសន្តិសុខបង្ក្រាប Scam Online

(កណ្ដាល)៖ លោកឧត្ដមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាលបានបង្ហាញតួនាទីយ៉ាងសកម្មក្នុងការដឹកនាំកម្លាំងអមដំណើរ និងការពារសុខសុវត្ថិភាពជូនឯកឧត្តម គួច ចំរើន ក្នុងឱកាសចុះត្រួតពិនិត្យទីតាំងក្រុមហ៊ុន និងកាស៊ីណូដែលបានបិទសៀល ពាក់ព័ន្ធបទល្មើស Scam Online នៅក្រុងសំពៅពូន និងស្រុកលើកដែក ខេត្តកណ្ដាល កាលពីថ្ងៃទី១៩ ខែមីនា ឆ្នាំ២០២៦។

ការចូលរួមដឹកនាំផ្ទាល់របស់លោកស្នងការខេត្តបានបង្ហាញពីការយកចិត្តទុកដាក់ខ្ពស់ក្នុងការធានាសន្តិសុខ សុវត្ថិភាព និងការអនុវត្តច្បាប់ឱ្យមានប្រសិទ្ធភាព ព្រមទាំងជាភស្តុតាងនៃកិច្ចសហប្រតិបត្តិការល្អរវាងអាជ្ញាធរខេត្ត និងស្នងការដ្ឋាននគរបាល ក្នុងការបង្ក្រាប និងទប់ស្កាត់បទល្មើសបច្ចេកវិទ្យា។

ក្នុងឱកាសនោះ ឯកឧត្តមអភិបាលខេត្តបានណែនាំឱ្យអាជ្ញាធរ និងកងកម្លាំងពាក់ព័ន្ធ បន្តពង្រឹងការការពារតាមទីតាំងដែលបានបិទសៀល ដោយហាមឃាត់អ្នកគ្មានភារកិច្ចចូល និងថែរក្សាវត្ថុតាងឱ្យបានម៉ឺងម៉ាត់ សម្រាប់ដំណើរការតាមនីតិវិធីច្បាប់បន្ត។

ជាមួយគ្នានេះដែរ អាជ្ញាធរបានអំពាវនាវដល់ប្រជាពលរដ្ឋឱ្យមានការប្រុងប្រយ័ត្នក្នុងការជួលអគារ និងសហការផ្តល់ព័ត៌មានទៅសមត្ថកិច្ច បើឃើញសកម្មភាពសង្ស័យ ដើម្បីចូលរួមការពារសន្តិសុខសង្គមឱ្យបានរឹងមាំ។

សកម្មភាពនេះ បានបង្ហាញយ៉ាងច្បាស់ពីភាពសហការល្អ និងការប្តេជ្ញាចិត្តរួមគ្នារវាងអភិបាលខេត្ត និងកងកម្លាំងនគរបាល ក្នុងការរក្សាសុវត្ថិភាពសង្គម និងបង្ក្រាបបទល្មើស Scam Online ឱ្យមានប្រសិទ្ធភាពខ្ពស់៕ ដោយ៖ ពូសកម្មជនហ្វេសប៊ុក