ស្លាប់១នាក់ របួស១នាក់ ក្នុងករណីគ្រោះថ្នាក់គ្រាប់បែកចង្កោមនៅផ្ទុះក្នុងខេត្តបន្ទាយមានជ័យ 

(បន្ទាយមានជ័យ)៖ ករណីផ្ទុះគ្រាប់បែកចង្កោមមួយ បានកើតឡើងនៅវេលាម៉ោង ១១៖៣០នាទី ថ្ងៃទី១៩ ខែមីនា ឆ្នាំ២០២៦ ស្ថិតនៅភូមិបឹងស្នោ ឃុំស្លក្រាម ស្រុកស្វាយចេក បណ្តាលឲ្យបុរសម្នាក់ស្លាប់ភ្លាមៗនៅកន្លែងកើតហេតុ និងម្នាក់ទៀតរងរបួសធ្ងន់។

តាមព័ត៌មានពីសមត្ថកិច្ច បានឲ្យដឹងថា ជនរងគ្រោះដែលស្លាប់មានឈ្មោះ ចាន់ សារ៉េត ភេទប្រុស អាយុ ៤៤ឆ្នាំ ខណៈដែលអ្នករងរបួសឈ្មោះ តា ចាស់ ភេទប្រុស អាយុ ៤៧ឆ្នាំ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យមិត្តភាព កម្ពុជា-ជប៉ុន មង្គលបូរី។

ប្រភពដដែលបានបញ្ជាក់ថា មូលហេតុនៃគ្រោះថ្នាក់នេះ គឺបណ្តាលមកពីជនរងគ្រោះឈ្មោះ ចាន់ សារ៉េត បានយកគ្រាប់បែកចង្កោមមកបោកលេងនៅផ្ទះឈ្មោះ តា ចាស់ បណ្តាលឲ្យផ្ទុះឡើងយ៉ាងសាហាវ។

ជាមួយគ្នានេះ អាជ្ញាធរមីនបានអំពាវនាវយ៉ាងតឹងរឹងដល់បងប្អូនប្រជាពលរដ្ឋទាំងអស់ នៅពេលប្រទះឃើញមីន គ្រាប់មិនទាន់ផ្ទុះ គ្រាប់បែកចង្កោម ឬវត្ថុសង្ស័យផ្សេងៗ សូមកុំប៉ះពាល់ កែច្នៃ ឬយកទៅចល័តឡើយ ព្រោះអាចបង្កគ្រោះថ្នាក់ធ្ងន់ធ្ងរ ដល់ជីវិត និងរាងកាយបានគ្រប់ពេល។

អាជ្ញាធរបានណែនាំឲ្យប្រជាពលរដ្ឋ រាយការណ៍ជាបន្ទាន់ទៅអាជ្ញាធរមានសមត្ថកិច្ចជិតបំផុត ដូចជា ប៉ុស្តិ៍នគរបាល មេភូមិ មេឃុំ ឬក្រុមការងារបោសសម្អាតមីន តាមរយៈលេខទូរស័ព្ទ៖ 012 800 473, 011 38 39 37, 097 489 5600, 066 612 613 និង 063 96 34 99 ដើម្បីចូលរួមទប់ស្កាត់គ្រោះថ្នាក់អាចកើតមានជាបន្តបន្ទាប់៕