ក.អ.ក. បើកកិច្ចប្រជុំថ្នាក់ដឹកនាំ ពង្រឹងប្រសិទ្ធភាពការងារ និងលើកកម្ពស់បរិយាកាសវិនិយោគ

(ភ្នំពេញ)៖ នៅព្រឹកថ្ងៃទី១៩ ខែមីនា ឆ្នាំ២០២៦នេះ ឯកឧត្ដម ស៊ុន ចាន់ថុល ឧបនាយករដ្ឋមន្ត្រី និងអនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) បានអញ្ជើញដឹកនាំកិច្ចប្រជុំថ្នាក់ដឹកនាំ ក.អ.ក. ដោយមានការចូលរួមពីឯកឧត្ដម ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធានទី២ ក.អ.ក. និងឯកឧត្ដម កែវ រតនៈ រដ្ឋមន្ត្រីក្រសួងរ៉ែ និងថាមពល អនុប្រធានទី៣ ក.អ.ក. ព្រមទាំងថ្នាក់ដឹកនាំជាន់ខ្ពស់ជាច្រើនរូប រួមមានអគ្គលេខាធិការ អគ្គលេខាធិការរង និងប្រធាននាយកដ្ឋានចំណុះ។

កិច្ចប្រជុំនេះត្រូវបានរៀបចំឡើង ដើម្បីពិភាក្សាលើរបៀបវារៈសំខាន់ៗមួយចំនួន ដោយផ្តោតលើការបន្តលើកកម្ពស់ប្រសិទ្ធភាពការងារក្នុងស្ថាប័ន កែលម្អបរិយាកាសវិនិយោគឱ្យកាន់តែអំណោយផល និងស្វែងរកយុទ្ធសាស្ត្រថ្មីៗ ដើម្បីទាក់ទាញវិនិយោគិនបន្ថែម។ ជាមួយគ្នានេះ ក៏បានជំរុញការពង្រឹងកិច្ចសហប្រតិបត្តិការជាមួយដៃគូអភិវឌ្ឍន៍នានា ឱ្យកាន់តែមានភាពរឹងមាំ និងមានប្រសិទ្ធភាពខ្ពស់ផងដែរ។

គួរបញ្ជាក់ផងដែរថា កិច្ចប្រជុំនេះ ក៏ជាឱកាសសំខាន់មួយសម្រាប់ស្វាគមន៍ជាផ្លូវការ ចំពោះឯកឧត្ដម កែវ រតនៈ ដែលត្រូវបានតែងតាំងបន្ថែមជាអនុប្រធានទី៣ នៃក.អ.ក. ក្រោមព្រះរាជក្រឹត្យដ៏ខ្ពង់ខ្ពស់របស់ ព្រះមហាក្សត្រនៃព្រះរាជាណាចក្រកម្ពុជា ដើម្បីចូលរួមបន្តជំរុញការអភិវឌ្ឍសេដ្ឋកិច្ចជាតិឱ្យកាន់តែរីកចម្រើន៕