មន្ទីរសាធារណការខេត្តកំពតបន្តសកម្មភាពថែទាំផ្លូវជាប្រចាំ ធានាសុវត្ថិភាព និងគុណភាពធ្វើដំណើរ

(កំពត)៖ នៅថ្ងៃពុធ ទី១៨ ខែមីនា ឆ្នាំ២០២៦ ក្រុមការងារថែទាំប្រចាំនៃមន្ទីរសាធារណការ និងដឹកជញ្ជូនខេត្តកំពត បានបន្តអនុវត្តសកម្មភាពថែទាំហេដ្ឋារចនាសម្ព័ន្ធផ្លូវយ៉ាងសកម្ម ដើម្បីធានាបាននូវគុណភាពផ្លូវ និងសុវត្ថិភាពក្នុងការធ្វើដំណើររបស់ប្រជាពលរដ្ឋ។

ក្នុងវិស័យសាធារណការ ការងារថែទាំជាប្រចាំត្រូវបានអនុវត្តជាបន្តបន្ទាប់ ដោយផ្តោតលើផ្លូវសំខាន់ៗជាច្រើនខ្សែ។ ជាក់ស្តែង ក្រុមការងារបានបន្តការងារថែទាំផ្លូវកម្រាលកៅស៊ូ លើផ្លូវជាតិលេខ ៣១អា ដោយធ្វើការកាយស្រទាប់ចាស់ ស្រោចកៅស៊ូ និងកិនបង្ហាប់ឡើងវិញ ចន្លោះគីឡូម៉ែត្រ ០៦+០០០ ដល់ ០៧+០០០ និងបន្តនៅចន្លោះគីឡូម៉ែត្រ ២៨+០០០ ដល់ ២៩+០០០។

ជាមួយគ្នានេះ ក្រុមការងារក៏បានបន្តសម្អាត និងលាបថ្នាំបង្គោលគីឡូឡើងវិញ លើផ្លូវជាតិលេខ ៣ ចន្លោះគីឡូម៉ែត្រ ៩៦+០០០ ដល់ ១៥៦+០០០ ដើម្បីបង្កើនភាពច្បាស់លាស់ក្នុងការណែនាំទិសដៅ និងសុវត្ថិភាពចរាចរណ៍។ មិនតែប៉ុណ្ណោះ ការងារដូចគ្នានេះក៏ត្រូវបានអនុវត្តលើផ្លូវខេត្តលេខ ១៣១៥ ចន្លោះគីឡូម៉ែត្រ ០០+០០០ ដល់ ១១+០០០ ផងដែរ។

សកម្មភាពថែទាំទាំងនេះ បង្ហាញពីការយកចិត្តទុកដាក់របស់មន្ទីរសាធារណការ និងដឹកជញ្ជូនខេត្តកំពត ក្នុងការរក្សា និងលើកកម្ពស់គុណភាពហេដ្ឋារចនាសម្ព័ន្ធផ្លូវឲ្យមានភាពប្រសើរឡើង ជួយសម្រួលដល់ការធ្វើដំណើរ ការដឹកជញ្ជូន និងជំរុញសេដ្ឋកិច្ចក្នុងតំបន់ឲ្យកាន់តែរីកចម្រើន៕